Read Uab Meto KEJADIAN 5 Bible Online

KEJADIAN 5 - Uab Meto bible

KEJADIAN 5

¹Le i sul ainaf neu Nai Adam in sufan. [Anbi tabu Uisneno anmepu atoni, In anmo'e sin namas on Uisneno kun.

²In anmepu sin atoni ma bife. In anfe neu sin tetus ma athoe neno nalali te In nakanab sin nak, “Atoni”.]

³Leka Nai Adam in nan ton 130, in napeni li'anmone le namnes nok in human, ma in nakanab Nai Set.

⁴Nalali onane te Nai Adam fe' anmoni anteni ton 800 ma napeni anteni li'ana-li'ana bian.

⁵In anmate anbi tabu in nan ton 930.

⁶Anbi tabu Nai Set anmoni nan ton 105, in napeni li'anmone, ma in nakanab Nai Enos.

⁷Nalali onane te Nai Set fe' anmoni nan ton 807 anteni ma napeni anteni li'ana-li'ana bian.

⁸In anmate anbi tabu in nan ton 912.

⁹Anbi tabu Nai Enos in anmoni nan ton 90, in napeni li'anmone, le in kanan Nai Kenan.

¹⁰Nalali onane te Nai Enos fe' anmoni nan ton 815 anteni ma in napeni li'ana-li'ana bian.

¹¹In anmate anbi tabu in nan ton 905.

¹²Anbi tabu Nai Kenan in anmoni nan ton 70, in napeni li'anmone, le in kanan Nai Mahalaleel.

¹³Nai Kenan fe' anmoni nan ton 840 anteni ma in napeni anteni li'ana-li'ana bian.

¹⁴In anmate anbi tabu in nan ton 910.

¹⁵Anbi tabu Nai Mahalaleel anmoni nan ton 65, in nahonis in anmone, le in nakanab Nai Yared.

¹⁶Nalali onane te Nai Mahalaleel fe' anmoni nan ton 830 anteni ma in napeni anteni li'ana-li'ana bian.

¹⁷In anmate anbi tabu in nan ton 895.

¹⁸Anbi tabu Nai Yared anmoni nan ton 162, in nahonis in anmone, le in nakanab Nai Henokh.

¹⁹Namuni onane te Nai Yared fe' anmoni nan ton 800 anteni ma in napeni anteni li'ana-li'ana bian.

²⁰In anmate anbi tabu in nan ton 962.

²¹Anbi tabu Nai Henokh anmoni nan ton 65, in nahonis in anmone, le in nakanab Nai Metusalah.

²²Nalali onane te Nai Henokh nameseb in monin nok Uisneno anbi ton 300 in nanan. In napeni anteni anah-anah bian sin,

²³talantia in nan ton 365.

²⁴Natuin Nai Henokh anmoni anbi matalus nok Uisneno, es nane te, in namneku natuin Uisneno naiti in.

²⁵Anbi tabu Nai Metusalah in moni nan ton 187, in napeni li'anmone mese le in nakanab Nai Lamekh.

²⁶Nalali onane te Nai Metusalah fe' anmoni nan ton 782 anteni ma in napeni anteni li'ana-li'ana bian.

²⁷In anmate anbi tabu in nan ton 969.

²⁸Anbi tabu Nai Lamekh in moni nan ton 182, in napeni li'anmone mese.

²⁹Nai Lamekh namolok nak, “Li'ana le i of anha'kaf nani kit anbi tabu hit atmepu afu le UISNENO ansukat nalali.” Es nane te Nai Lamekh nakanab li'ana nane Nai Nuh.

³⁰Nalali onane te Nai Lamekh fe' anmoni nan ton 595 anteni ma in napeni anteni li'ana-li'ana bian,

³¹ma in anmate anbi tabu in nan ton 777.

³²Leka Nai Nuh in nan ton 500, in napeni li'anmone tenu, esle' Nai Sem, Nai Yafet ma Nai Ham.