Read Uab Meto KEJADIAN 7 Bible Online

KEJADIAN 7 - Uab Meto bible

KEJADIAN 7

¹Nalali onane te UISNENO namolok neu Nai Nuh nak, “Au ail al ho mes kum atoni le nanaoba nani Au lomit. Es nane te amtam nai meu bnao in nanan mok ho in-ini sin.

²Meki ale kolo ma mu'it le ka nuni fa pasan hitu, ma mu'it fui nuni kun pasan mese na'ko masaf mese. Anmo'e mani onane he nati' na'ko ale mu'it masaf mese-mese nafetnon na'ko maten ma anpe' ma namfau anteni anbi pah pinan.

⁴Al neno hitu anteni Au of usanut ulan le of ka maeka fa anbi neno bo'ha ma fai bo'ha in nanan, he nati' ale amonit le nane'o le Au mepu ulali sin nane anmate.”

⁵Oke te Nai Nuh nanaoba nani ale plenat le UISNENO anfe neu in.

⁶Nai Nuh in nan ton 600 leka noe sako ansanu anbi pah pinan.

⁷Nai Nuh nok in fenai, ma in anah sin es-es nok in fenai, antam neu bnao nane he nafetin sin aon na'ko noe sako.

⁸Naif mese ma ainaf mese na'ko ale kolo ma mu'it masaf mese-mese — leko le ka nanuni ma le nanuni, —

⁹antam ma nabua nok Nai Nuh anbi bnao in nanan, namnes nok Uisneno In aplenat.

¹⁰Neno hitu namuni onane te noe sako ansanu ma anbobok pah pinan.

¹¹Anbi tabu Nai Nuh in nan ton 600, anbi fun nua antam neno bo'es am hitu, ale oe mata anbi pah pinan in kupun natfai ma nat'op. Ale oe anbi neno tnanan sin eno natfai,

¹²ma ulan nasaunton nan neno bo'ha ma fai bo'ha.

¹³Anbi neno nane amsa, Nai Nuh nok in fenai antam neu bnao in nanan nok in anah sin tenu sin esle' Nai Sem, Nai Yafet ma Nai Ham nok es-es in fenai.

¹⁴Ale kolo ma mu'it bian, leko aem ma fui, he naek ma abaut antam nok sin amsa.

¹⁵Naif mese ma ainaf mese na'ko ale amonit masaf mese-mese antam neu bnao le nane nok Nai Nuh,

¹⁶namnes nok Uisneno In aplenat neu in. Leka sin alsin antam nalali, UISNENO an ek bnao nane in eno.

¹⁷Noe sako nane ansanu piut anbi neno bo'ha in nanan, ma oe nane ansae talantia bnao le nane natboe.

¹⁸Oe ansae piut, ma bnao nane natboe-boe anbi oe in tunan.

¹⁹Oe nane ansato ma ansae piut talantia, ankub ale tubu-tubu amnanut anesit.

²⁰Oe nane ansae piut ma anfinin ale tubu-tubu sin tunan talantia meter hitu.

²¹UISNENO namate ale amonit le nane'o anbi pah pinan le i: Tuaf, kolo ma mu'it abit pah meto leko a'baut ma anae. Le kan mate fa alkun Nai Nuh ma ale sin ok-oke le nok in anbi bnao in nanan.

²⁴Oe nane kan sanu nit fa talantia neno 150.