Read Uab Meto KEJADIAN 8 Bible Online

KEJADIAN 8 - Uab Meto bible

KEJADIAN 8

¹Uisneno kan nikan fa Nai Nuh ma ale mu'it le nok in anbi bnao in nanan. Uisneno nasanut anin nem ma anfu talantia oe anhelak ma ansanu.

²Ale oe mata anbi pah pinan in kupun ma ale eno na'ko oe anbi neno tunan maeka. Ulan nasnas

³ma oe anhelkon piut. Neno 150 nane anfin ma oe ka namnanu anteni fa.

⁴Anbi fun hitu antam neno bo'es am hitu, bnao le nane namtut anbi netu mese anbi tubu Ararat in tunan.

⁵Oe ansanu piut ma anbi fun bo' antam neno mese, atkiso tit tubu-tubu sin tunan.

⁶Leka neno bo'ha nane anfin, Nai Nuh anfai bnao nane in eno ana,

⁷ma nafetin kolo ka' mese. Kolo nane kan fani nem fa neu bnao mes in natpen neumnem talantia oe nane ansanu nani oke.

⁸Fun onane te, Nai Nuh nafetin kolo ot kase mese he nati' nahin ai oe nane namneo ansanu nani oke.

⁹Mes natuin oe fe anaek ankub pah pinan funam natef, kolo nane ka napeni fa bale he in antoko. Es nane te in anfani nem neu bnao; Nai Nuh anheke ma natam nafani in.

¹⁰Nai Nuh anpao neno hitu anteni, ma nafetin anteni kolo ot kase nane.

¹¹Anbi neno anmabe' kolo nane anfani nem neu in neki bub fua mina non alekot mese anbi in lulun. Tabu nane Nai Nuh nahin nak oe anmeto nalali.

¹²Leka in anpao neno hitu anteni, in nafetin anteni kolo ot kase nane; ma haef le i kolo ot kase nane kan fani nem fa.

¹³Anbi tabu Nai Nuh in nan ton 601, anbi fun mese antam neno mese, oe nani anmeto anfin. Nai Nuh anfai bnao nane in toben, ma in ankiso anfun natef. In ankiso afu anmeto nalali.

¹⁴Anbi fun nua antam neno bo'nua ma hitu pah pinan anmeto oke.

¹⁵Oke te Uisneno namolok neu Nai Nuh nak,

¹⁶“Ampoi musaitan bnao nane mok ho fenai, ho anah sin ma es-es nok in fenai.

¹⁷Mupoitan ale kolo ma le mu'it bian, anaet ma a'baut, he nati' sin anpe' ma namfau, ma nasitbok nahenu pah pinan.”

¹⁸Oke te Nai Nuh anpoi nasaitan bnao nane nok in fenai, in anah sin es-es nok in fenai.

¹⁹Ale kolo ma ale mu'it pah meto anpoi na'ko bnao nane, es-es nabua nok in masan.

²⁰Nai Nuh nahakeb baki fuat mese neu UISNENO. In naiti es na'ko kolo masaf mese-mese ma mu'it le ka nanuni fa, ma natulu anfani fua tulu mnotu anbi baki fuat nane in fafon.

²¹Fua tulu mnotu nane in fomenin antom nek UISNENO, ma in natenab anbi in nekan nak, “Au of ka fe fa kasat anteni neu pah pinan natuin mansian in taos in mo'et; Au uhin nak leka in munif, mansian in tenab nane maufinu kun. Au of ka ule'un ateni fa ale amonit le nane'o onle Au fe anmo'e le i.

²²Leka pah pinan le i fe anbin, of anmu'i piut eti ma tabu het sen ma atseki, oe tene ma maputu, fauk nais ma oe fat, fai ma manas.”