Read Uab Meto KEJADIAN 9 Bible Online

KEJADIAN 9 - Uab Meto bible

KEJADIAN 9

¹Uisneno anfe tetus neu Nai Nuh ma in anah sin ma In namolok nak, “Ampe' ma mimfau nai, he nati' hi sufam nane natua pah pinan funam natef.

²Ale kolo ma ika ma ale mu'it bian of namtau ma nasman neu ko. Sin alsin anbi ho kuasat.

³Ale nane ok-oke nabe'i anfani ho mnahat, onle luet-luet nomate amsa; Au fe sin neu ko anfani ho mnahat.

⁴Lasi mese le ka nabe'i fa he hi miahan esle' sisi le in na' fe anbin, natuin smanaf nane anbi na' in nanan.

⁵Atoni mese-mese ma mu'it le namate mansian of Au kas umate in.

⁶Au mepu mansian nane onle Au amsa; es nane, sekau namate mansian of namate in amsa.

⁷Namneo, of hi misuf ma mika'u, mimfau ma mitua pah pinan anfunam natef.”

⁸Uisneno namolok neu Nai Nuh nok in anah sin nak,

⁹“Leku le i Au mo'e ani Au fef bela oke ki ma oke hi sufam,

¹⁰ma oke ale amonit le nane'o, esle' kolo-kolo ma ale mu'it anbi pah meto esle' sin alsin le anpoi na'ko bnao le nane nok ki.

¹¹Le i Au fef bela oke ki: Au manta'en ak ale amonit le nane'o of Au ka ule'un ateni fa eki noe sako. Of kan mu'in teni fa noe sako le nale'un pah pinan le i anteni.

¹²Anfani on ataka neu Au fef bela nane anhaek nabal, le Au mo'e ani oke ki nok ale amonit le nane'o,

¹³es nane te Au tao ani Au enus anbi nope anfani ataka neu Au fef bela oke pah pinan.

¹⁴Anbi haef-haef, leka Au amu neno tnanan eki nope, oke te hit mit enus nane,

¹⁵Au of umnau Au manta'en oke ki, ma neu ale amonit le nane'o, esle' nak noe sako of ka nale'un anteni fa ale amonit.

¹⁶Leka mit enus anbi neno atnanan, Au of it in, ma Au umnau Au manta'en le nabal-bal nane anbi Kau oke ale amonit anbi pah pinan.

¹⁷Le nane anfani ataka neu Au manta'en le Au fe ani neu ale amonit anbi pah pinan.”

¹⁸Nai Nuh in anah-anah sin le napoi na'ko bnao nane esle' Nai Sem, Nai Yafet ma Nai Ham. (Nai Ham nane amaf Kanaan.)

¹⁹Nai Nuh in anah teun sin le nane es anfani on atoni pah pinan sin naifine.

²⁰Nai Nuh atoni amepu lene, ma in es anfani atoni ahunut le anmepu lene tua min kase.

²¹Leka Nai Nuh ninu nalali in tua min kase, in anmafu. In ankasu nani in blua pake sin ma in antup nok monas anbi in um-ume in nanan.

²²Leka Nai Ham le anfani amaf atoni Kanaan, in nit nak in amaf anmonas, in anpoi ma naton lasi nane neu in biafin nua sin.

²³Nalali onane te Nai Sem ma Nai Yafet sin naiti sobalu betkone mese ma sin nauf anbi sin benan. Sin anhone koti ma antam neu um-ume in nanan ma an amu sin amaf neki sobalu betkone nane. Sin nao neki sin kotin ma sin kan kiso neu fa sin amaf le anmonas nane.

²⁴Leka Nai Nuh in matan anmeu na'ko mafu ma in nahin sa' le in anah ahet susu anmo'e neu in,

²⁵in nak, “Sukat neu ko Kanaan! In of anfani ate amle'ut neu in biafin.

²⁶Ampules UISNENO, Nai Sem in Uisneno! Kanaan of anfani ate neu Nai Sem.

²⁷So nati' Uisneno ansato anteni In tetus neu Nai Yafet ma anhenua in bale maika. So nati' in sufan natua nok Nai Sem in sufan. Kanaan of anfani ate neu Nai Yafet.”

²⁸Noe sako nane anfin, Nai Nuh fe in anmoni anteni ton 350.

²⁹In anmate anbi tabu in nan ton 950.