Read Uab Meto 2 SAMUEL 11 Bible Online

2 SAMUEL 11 - Uab Meto bible

2 SAMUEL 11

¹Ale kesel sin antak hen maken anbi neno oefat namsopu. Ma anbi ton nane leka neno oefat namsopu te Nai Daud anlelu Nai Yoab anao hen maken fun in nok ale to meo nakaf ma to meo Israel ok-oke; oke te sin nis ma anbe'u atoni Amon ma sin niusnan kot Raba. Mes Nai Daud in nabalah anbi Yerusalem.

²Anbi neno mabe mese, laka Nai Daud anfen na'ko ankuson, in na'oinson anbi in sonaf a'pupun manela. Na'ko bale nane in ankiso nit bife mese naniu, ma bife nane in human mas le'uf kun.

³Oke te Nai Daud anlelu natoti bife nane sekau, ma naton neune nak bife nane in kanan bi Batsyeba; in amaf kanan Nai Eliam ma in mone Nai Uria atoni Het.

⁴Nai Daud anlelu nunan bife nane, ma leka in nem antia sonaf, Nai Daud antup nokan. (Bi Batsyeba fe naknino'on na'ko funan.) Oke te bi Batsyeba anfani neu in ume.

⁵Tabu fauk-fauk namuni te bi Batsyeba in naapu, oke te in ansonu hanaf neu Nai Daud antom lasi nane.

⁶Nok labah Nai Daud anfe plenat neu Nai Yoab nak, “Amlelu Nai Uria atoni Het nane nem neu kau.” Ma Nai Yoab anlelu Nai Uria anao naeku nok Nai Daud.

⁷Leka Nai Uria nem naeku nok Kesel Nai Daud, kesel natoti neu Nai Yoab anbi aomina ka ma to meo Israel, ma makenat anao onme.

⁸Nalali te Nai Daud nak neu Nai Uria nak, “Amfani nai meo ho ume ma musnas nai fa akle'o.” Leka Nai Uria nasaitan sonaf, Nai Daud ansonu atnatas neu Nai Uria ume.

⁹Mes Nai Uria kan fani fa neu in ume mes in antup anbi eno naek sonaf matan nok ale kesel in apaot sin.

¹⁰Fun natonan Nai Daud neu lasi nane. Es nane te in natoti Nai Uria nak, “Ho fe amfani aum mu'ko lanan a'lo, nansa' es ho kam fani fa meu ho ume?”

¹¹Nai Uria natae nak, “To meo Israel ma Yehuda fe sin anmabe'u nok matani ma Pet Fef Bela UISNENO nok sin; ma Nai Yoab hai meo pa'e nakaf ma in to meo nakaf sin natua anbi um-ume anbi mnela. Leka me au he fani eu au ume ma au uah ma inu ma he tup ok au fenai? Natuin au Usi ho monim ma ho ate au monik, ho ate au of ka mo'e fa lasi nane!”

¹²Oke te Nai Daud nak neune nak, “Neu namautu nai, ho musnas amteni neno i anbi i ma noka fa nok-noka of au ufetin ko he hom nao.” Es nane te Nai Uria nabalah anbi Yerusalem anbi neno nane. Anbi neno noka fa Nai Daud anhone Nai Uria he anbukae.

¹³Ma in anbukae ma anfe neune mninut talantia in anmafu. Mes anbi fai nane Nai Uria amsa kan fani fa neu in ume, mes in antup an aikanunu in tainusat anbi apao sonaf sin ke'an.

¹⁴Ma noka fa onane Nai Daud antui sulat neu Nai Yoab, ma ansonu sulat nane anbi Nai Uria in niman.

¹⁵Nai Daud antui anbi sulat nane nak, “Amtao Nai Uria antomat, anbi makenat le maput le'uf, oke te ho amhelom mu'ko bale nane mes in kais nahin, he nati' in anmate anbi makenat in nanan.”

¹⁶Ma leka Nai Yoab in fe niusnan kot nane, in anlelu Nai Uria anao neu bale le in nahin musu anpao nok matani.

¹⁷Leka to meo musu anpoi na'ko kot ma anmaken ma anmanua nok Nai Yoab in to meo sin, onane te namate Nai Daud in to meo nakaf fauk-fauk, Nai Uria anmate nok amsa.

¹⁸Nalali te Nai Yoab ansonu hanaf neu Nai Daud ma naton neune neu makenat in anaon ok-oke.

¹⁹Nai Yoab naplenat haef nane nak, “Leka usi in nen lasi makenat nane in anaon ok-oke le ho muton neune,

²⁰oni in nato' ma natoti neu ko nak, ‘Nansa' him haumak mis neu kot nane? Ai hi ka mihin fa nak musu mes naklao ki na'ko baki lape tunan?

²¹Ai hi amnikan neu afi onme Nai Abimelekh Nai Gideon anmone anmate anbi Tebes? Ai in kan mate fa natuin bife mese anpolin fatu fole ut na'ko baki lape tunan neune? Es nane te, nansa' him haumak mis neu baki lape nane?’ Leka Usi natoti onane neu ko, ho mutae meune mak, ‘Nai Uria ho nakaf amakenat nane, in amsa anmate!’ ”

²²Oke te haef nane in anao ma naeku nok Nai Daud ma naton neune sa' le Nai Yoab anfe plenat neune.

²³Haef nane nak, “Hai musu nane nabe'i anesin kai ma sin anpoi na'ko kot ma anmaken ma anmanua nok kai anbi mnela. Mes hai mihelnom nok matani ma amli'u sin naen anfani neu baki lape kot enon.

²⁴Oke te na'ko baki lape fafon sin naklao kai, ma Usi ho nakaf amakenat fauk-fauk nok Nai Uria sin anbel ma anmate anbi makenat in nanan.”

²⁵Nai Daud nak neu haef nane nak, “Amhatani Nai Yoab nekan ma muton neune he nati' in nekan kais an ole, natuin hit ka tahin fa neu sekau es of anmate anbi makenat nane. Muton neune he nati' in nape' kot nane nok matain le'uf anesin anteni talantia in nis ma anbe'u nan kot nane.”

²⁶Leka Nai Uria in fe anen nak in mone anmate, onanete in ankae natuin in mone anmate.

²⁷Leka neno kaet kulut namsopu, Nai Daud anlelu anhone bife nane neu sonaf ma anfani Nai Daud in fenai. Funan fauk namuni te in nahonis li'anmone mese. Mes UISNENO kan lomi fa nok Nai Daud in taos in mo'et nane.