Read Uab Meto 2 SAMUEL 14 Bible Online

2 SAMUEL 14 - Uab Meto bible

2 SAMUEL 14

¹Nai Yoab nahin nak Kesel Nai Daud nekan ansinmak anae le'uf neu Nai Absalom,

²es nane te in anlelu no'en bife ahinet mese le natua anbi Tekoa. Leka bife nane nem antia, Nai Yoab nak neune nak, “Ho mes amtaonom on akulut ma akaet; ho ampake bale pake kulut ma kaet, ma kais ampake min fomeni. Amtaonom onle bife le a'lo le'ufen ankae neu atoni le in nek nisan.

³Nalali te hom nao meu kesel, muton neune mak on i.” Oke te Nai Yoab naton neune sa' le mes in he namolok.

⁴Oke te bife nane anao neu kesel, ma anli'tu ma nabes ma in nak, “Au Usif Apinat, ambab fa ho ate kau!”

⁵“Ho mu'i lasi sa' ka?” kesel natoti neune onane. Bife nane natae nak, “Ho ate kau le i bife banu amamu'it mese. Au mone amsa anmate nalali.

⁶Ho ate au mu'i anmone nua, ma anbi neno mese sin anmabanan anbi mnela. Natuin katit fa es he nasone sin, es na'ko sin nua sin namate es.

⁷Ma antia neno i, au ume nanan sin ok-oke namusu nok ho ate ma naseke ho ate he una'at ho ate au anah le namate in benuf nane neu sin, he nati' sin nafek lasi neune ma namate in, natuin in namate nalali in benuf. Leka ho ate una'at li'ana nane, alaha ho ate a'mes. Sin of nale'un naskuku ho ate au panet ma afnekat mes-mese nane ma ka mu'i fa anmone mese anteni he nasuf ma naka'u neu ho ate au mone in monin.”

⁸“Amfani nai,” kesel natae onane, “au of a'tae lasi nane.”

⁹“Koi au Usif Apinat,” bife nane natae nak, “lasi sa' le of au Usif ho mo'e amsa, ho ate ma ho ate ume nanan sin hai es of amsutai in amnekin nane; au Usif ma au Usif ho ume nanan hi ka misanab fa.”

¹⁰Kesel natae nak, “Leka anmu'i atoni le ansali ko, meki in nem neu kau, ma in of ka naunu anteni ko fa.”

¹¹Bife nane nak, “So nati' au Usif hom onen toti neu ho UISNENO, he nati' atoni le hen seunbanin au anah in maten nane kais in anmo'e amle'ut anteni le anae le'uf anesi anteni natuin namate ho ate au anah es anteni.” Nai Daud natae nak, “Anbi UISNENO amonit, ho anah nane of kan mo'e fa sa'-sa' neune maski akle'o amsa kahaf.”

¹²Oke te bife nane namolok nak, “Koi au Usif Apinat, mufetin fa ho ate kau he au umolok a'teni fa akle'o.” Kesel natae nak, “Leko.”

¹³Bife nane nak, “Nok au Usif ho a'am nane, au Usif am au mulali mak au Usif ho musanab natuin ho ka mufetin fa au Usif ho anmone hen fani nem na'ko bale mapolin. Nansa' Usif ho mo'e sanat onle nane neu Uisneno In nonot ka?

¹⁴Hit al-al kit of atmate; hit le i onle oe le nat'op neu nain le ka ta'bua tafani fa. Uisneno amsa of ka namonib nafani fa atoni le anmate nalali; es nane te so nati' au Usif mami lanan he nati' atoni mapolin nane nabe'i in anfani nem anteni.

¹⁵Ho ate au aum eo ko Usif natuin atoni ansali kau. Oke te ho ate utenab leko nesi au umolok ok au Usif nok afnekat au Usif of amsimo au han totis.

¹⁶Ho ate utenab au Usif of amnen kau ma mufetin ho ate kau na'ko atoni le nami lanan he namate kau nok au anah. Sin natenab hen li'u na'aenab kai na'ko pah le Uisneno anfe nani neu In nonot.

¹⁷Ho ate uteb nak au Usif ho lasi manba'an nane of anpanat ho ate au monik natuin au Usif onle ahake Uisneno, le ambeti muhin lasi me es alekot ma lasi me es amle'ut. So nati' UISNENO au Usif ho Uisneno In nok au Usif ko!”

¹⁸Kesel natae nak, “Au he utoti lasi sa' es neu ko, nati' ho mutae nok amneot.” Bife nane natae nak, “Mukua ho a'am nai koi au Usif.”

¹⁹Kesel nakua a'an nak, “Nai Yoab es anlelu ko ka?” Bife nane natae nak, “Natuin au Usif ho monim, ho ate ka usuan fa au Usif ho han totis. Namneo Usif, Nai Yoab es naton nalali kau sa' le mes au he mo'e ma umolok.

²⁰Mes in anmo'e onane neu he naleko lasi nane nok leko. Au Usif ho mahinem onle ahake Uisneno talantia ho muhin ale sa' le anbol.”

²¹Nalali onane te kesel no'en Nai Yoab ma nak neune nak, “Ho lomim nane of au unokab. Amnao nai he muman Nai Absalom ma meki in anfani nem neu i.”

²²Nai Yoab anli'tu ma nabes anbi Nai Daud human, ma in nak, “So nati' Uisneno anfe tetus neu ko Usi! Neno le i au uhin nak Usi hom lomi ho ate kau natuin Usi hom simo mulali au han totis.”

²³Oke te Nai Yoab anfen ma anao neu Gesur anhone Nai Absalom hen fani neu Yerusalem.

²⁴Mes kesel ka nafetin fa Nai Absalom he natua anbi sonaf. Kesel nak, “Au ka lomi fa he it in human.” Es nane te Nai Absalom anao anfini neu in ume, ma ka naeku nok fa kesel.

²⁵Anpules Nai Absalom natuin in namas anae le'uf anbi Israel ok-oke. Katit fa esle' in namasan nesi na'ko in. Na'ko in haen nanan talantia in anakan funun tunan katit fa in amle'un.

²⁶In nakan funu amfau le'uf, ma ton mese te hae mese in ankateli in anakan funun natuin in naben mafen le'uf kun. In nakan funun le ankateli sin le nane in mafenan anesi na'ko kilogram nua natuin kesel in atnais.

²⁷Nai Absalom anmu'i anmone tenu ma anfeto mese le mas le'uf kun, in kanan bi Tamar.

²⁸Nai Absalom natua anbi Yerusalem nan ton nua, mes in fe ka naeku nok fa kesel.

²⁹Es nane te anbi neno mese in no'en Nai Yoab, hen lelu in he nao neu kesel, mes Nai Yoab in kan lomi fa he nem. Nai Absalom no'en in hae mese anteni, mes Nai Yoab in kan lomi fa he nem amsa.

³⁰Nalali te Nai Absalom nak neu in ate-ate sin nak, “Hi mihin Nai Yoab in lene es au lene aon bian le ansen sain esan? Hi motu mani lene nane.” Sin amsa anao ma sin notu nani lene nane.

³¹Es nane te Nai Yoab nem neu Nai Absalom ume ma natoti nak, “Nansa' ho ate-ate sin notu au lene?”

³²Nai Absalom natae nak, “Natuin ho kam lomi fa he aum leka au o'en ko. Au he sonu ko hem nao meu kesel ma mutiaba au han totis i mak, ‘aota sa' ka au usaitan Gesur ma au aum eu i ka? Leko nesi au utua ubalah a'bi nane.’ ” Ma Nai Absalom in nak anteni nak, “Ho mami lanan he au nao utef ok kesel, ma leka kesel fe natenab nak au usanab ubalah, au lomi he namate kau.”

³³Nalali te Nai Yoab in anao neu Kesel Nai Daud ma natiaba han totis Nai Absalom. Oke te kesel no'en Nai Absalom, ma Nai Absalom in nem anli'tu ma nabes anbi kesel in human in matan. Ma kesel ansimo in ma anek in.