Read Uab Meto 2 SAMUEL 15 Bible Online

2 SAMUEL 15 - Uab Meto bible

2 SAMUEL 15

¹Oke onane te naloitan neu in aon aklet makenat mese nok bikase ma atoni atuin sin bo'nim.

²Neno-neno Nai Absalom anfen nok-noka oke te anhake anbi lanan ninen anhaumak eno naek sonaf enon. Ale atoni le he nao he natlak in lasi neu kesel, Nai Absalom no'en sin ma natoti sin nak, “Ho mu'ko uf me ka?” Ma leka atoni nane natae nak, “Au u'ko uf i ai uf nane,”

³Nai Absalom nak, “Natuin aplenat, ho amtom, mes neu katit fa es hen fani ababat neu kesel le anlomi he natnin ho lasi tlakas.”

⁴Oke te in nak anteni nak, “Ma bait, onle au es a'fani alef lasi, sekau le anmu'i lasi masulit ai he natlak in lasi nabe'i in nem neu kau ma of au ufek in lasi nok amneot.”

⁵Kalu anmu'i atoni le anhaumak Nai Absalom hen li'tu ma nabes neune, Nai Absalom in nona' in niman, oke te anho atoni nane ma anek in.

⁶Onle nane Nai Absalom in anmo'e neu ale atoni Israel le he natlak in lasi neu kesel, ma nok nane te Nai Absalom in naiti nekaf ma anfutu nekaf atoni Israel.

⁷Leka ton ha namsopu, Nai Absalom nak neu Kesel Nai Daud nak, “Amkolan kau fa Ama, he au nao eu Hebron he au unokab au lasi fef bela neu UISNENO.

⁸Natuin afi fe au utua bi Gesur pah Siria, au ubela fef bela neu of au nao eu Hebron he ululi ma ubes leka UISNENO nafetin kau fani aum eu Yerusalem.”

⁹Kesel natae nak, “Amnao nai nok aomina.” Oke te Nai Absalom anfen ma anao neu Hebron.

¹⁰Mes nahunu na'ko nane in ansonu nalali ale haef neu ale uf Israel ok-oke neki a'at nak, “Leka him nen to'is in hanan, al-al ki ankoa mak, ‘Nai Absalom ansae nalali kesel anbi Hebron!’ ”

¹¹Na'ko Yerusalem atoni natun nua es natuin Nai Absalom anao neu Hebron. Sin ka nahin fa sa'-sa' neu malokin lasi nane ma sin anao nok nek amneot.

¹²Oke te Nai Absalom natulu fua tulu, in amsa ansonu haef neu kot Gilo he no'en Nai Ahitofel, afainekat mese na'ko Kesel Nai Daud. Onle nane malokin lasi anlaban kesel nane anmatani kun, ma atuin-atuin Nai Absalom ansato piut.

¹³Oke te amneki hanaf mese naton lasi nane neu Nai Daud nak, “Atoni-atoni Israel sin anpesi nalali Nai Absalom.”

¹⁴Oke te Nai Daud nak neu in ameput sin anbi Yerusalem nak, “Aim he hit tatnani. I lanan alekot mese neu kit he nati' hit tafetnok ta'ko Nai Absalom. Ka lo fa anteni in of nem. Milab nai, kais-kaisa in anli'u kit ma in nis ma anbe'u kit, talantia tuafen kot nanan ok-oke in namate sin!”

¹⁵“Leko, Usi,” sin natae onane. “Hai amsimo ho plenat ma minaoba Usi ho lomim.”

¹⁶Oke te kesel anfen ma anao ma ale in ume nanan sin ma in ameput sin natuin in, alah in fenai kliko bo'mese le in namaika sin hen pao sonaf.

¹⁷Anbi tabu kesel ma ale in amnokten sin anao nasaitan kot, sin nasnasan anhaumak ume amsoput anbi kot.

¹⁸Kesel in ameput sin anhake anbi kesel in aon bian leka to meo apaot kesel sin anao naketin ma anfinin in. Onane amsa to meo natun ne le natuin in na'ko Gat, sin anao naketin anbi in matan.

¹⁹Leka kesel nit sin in nak neu Nai Itai nakaf neu to meo natun ne nane nak, “Nansa' ho mok kai amsa? Leko nesi ho meki amfani ma mutua mubua mok kesel fe'u nane. Ait ho ka atoni anao amnemat ko fa, atoni atnanis le ho mu'lo mu'ko ho pah?

²⁰Ho mutua anbi i fe ka lo fa, leka me au he lenu ko he mok kau het nao teu me-me ka? Au amsa ka uhin fa fe neu of au he nao eu me ka. Amfani nai ma meki ho biafen le hi nonot mese nane ok-oke, so nati' UISNENO In nek ma namnau ki ma In na'ki nok ki.”

²¹Mes Nai Itai natae nak, “Koi Usi Apinat, anbi UISNENO amonit ma anbi au Usi ho monim, anbi bale me au Usi hom koenom anbine, ho ate kau of utuin ko amsa, maski taeku tok lasi maten.”

²²“Leko!” Nai Daud natae onane. “Amnao mat piut nai!” Onane te Nai Itai in anao bua'-bua' nok in to meo sin ma in ume nanan sin.

²³Ale to ok-oke ankae nok hanan anaek leka Nai Daud nok in to meo sin ok-oke anao nasaitan kot. Oke te kesel anlak ana' Noe Kidron ma ale in to ok-oke natuin in, oke te sin anao an ali neu mnela snaen.

²⁴Ana' Fuat Knino Nai Zadok ma Ana' Fuat Knino Nai Abyatar sin amsa nok anbi nane nok ale atoni Lewi le sin neki Peti Fef bela UISNENO. Sin nabela Peti Fef bela nane ma ka naiti fa leka to ok-oke fe ka nasaitan fa kot nane.

²⁵Oke te kesel nak neu Nai Zadok nak, “Ho meki mufani Peti Fef Bela nane neu kot. Leka UISNENO anlomi kau, of In nafetin kau he au fani aum ma au it Peti Fef bela nane anteni nok in bale maika nane.

²⁶Mes leka UISNENO kan lomi kau fa, fun alaha au una'tok neu In alomin antom au monik.”

²⁷Oke te kesel nak anteni neu Nai Zadok nak, “Ho mutonan Nai Ahimaas ho anmone ma Nai Yonatan Nai Abyatar anmone; he hi amfani nai meu kot nok tainine.

²⁸Of au pao ki anhaumak bale-bale toi tlaka noe anbi mnela snaen talantia au simo hanaf na'ko ki.”

²⁹Oke te Nai Zadok ma Nai Abyatar sin neki Peti Fef Bela nane anfani neu kot Yerusalem ma sin natua anbi nane.

³⁰Oke te Nai Daud ansefi napoitan in peni haef sin. In nok in amnokten ok-oke ansae Tubu Zaitun fun sin ankae nok ma ansakatenu sin anakan on ataka neu sin ankulu ma ankae.

³¹Leka sin natonan Nai Daud nak Nai Ahitofel amsa in nok anbi buat amle'ut Nai Absalom, onane te Nai Daud in onen toti nak on i, “Koi, UISNENO, so nati' Ho mule'un Nai Ahitofel in fainekat.”

³²Leka Nai Daud in nem antia bale le antak he naluli ma nabes neu UISNENO, Nai Husai atoni Arki Nai Daud in sob leko in nem ma ansenu Nai Daud. Nai Husai in blua pake pisu-pisu ma in antao afu neu in anakan.

³³Nai Daud nak neune nak, “Leka ho mok kau, hom fani mafena neu kau.

³⁴Mes nabe'i hom bab kau, leka hom fani meu kot ma ho mak neu Nai Absalom, mak ho hem fani atuthaes neu in nok aki'at, on afi hom tuthae in amaf anbi neno ahunut. Nok lanan nane te ho mule'un ale fainekat na'ko Nai Ahitofel.

³⁵Ana' Fuat Knino Nai Zadok ma Nai Abyatar sin nua sin amsa anbi nane. Ho muton neu sin ale lasi sa' le hom nen anbi sonaf nanan.

³⁶Nai Ahimaas Nai Zadok anmone ma Nai Yonatan Nai Abyatar anmone sin amsa nok sin amfen, es nane te sin anbi nane amsa. Li'ana-li'ana le nane es hom lenu sin he sin nem neu kau he natiaba neu kau ale lasi le hom nen.”

³⁷Nai Husai Nai Daud sob leko nane in anfani neu Yerusalem, matom nok tabu Nai Absalom amsa in nem antia anbi nane.