Read Uab Meto 2 SAMUEL 16 Bible Online

2 SAMUEL 16 - Uab Meto bible

2 SAMUEL 16

¹Leka Nai Daud fe anfini akle'o tubu tunan, Nai Ziba Nai Mefiboset ate nok askeken in nem neki bikase luke mnanu nua le nasaeb neki utunu' pisa natun nua ma tua min kase fua meto ki' natun mese, ma hau fua mate futu natun mese ma tua mina mtasa alu' mese.

²Kesel Nai Daud natoti in nak, “Ale i ok-oke he neu sa' ka?” Nai Ziba natae nak, “Ale bikase luke mnanu i neu Usi ho ume nanan hem sae meu sin, utunu' ma ale hau fua i neu Usi ho atuthaes sin, ma tua mina mtasa i neu sin le anhae nok ko anbi mnela snaen.”

³Oke te kesel natoti in nak, “Nai Mefiboset Nai Saul upuf nane in es me ka?” “In fe nabalah anbi Yerusalem,” Nai Ziba natae onane, “natuin in nahin nak neno i atoni Israel of anfe nafani in na'if Nai Saul aplenat neu in.”

⁴Oke te kesel nak neune Nai Ziba nak, “Na'ko neno i Nai Mefiboset in amu'in ok-oke anfani ho ini.” “Au simo ho manekam koi Usi,” Nai Ziba natae onane. “So nati' Usi hom lomi ho ate kau piut!”

⁵Leka Nai Daud in nem antia Bahurim, atoni mese nem na'ko bale nane, fun in anhaumak Nai Daud nok in amnokten ma in ansukat Nai Daud. Atoni nane in kanan Nai Simei Nai Gera anmone, na'ko Nai Saul ume nanan.

⁶Nai Simei anpoli Nai Daud ma in ameput sin neki fatu, maski nak Nai Daud in amnokten ma in solalus anakaf sin anfun natef nan in.

⁷Nai Simei ansukat Nai Daud neki uab a'at nak, “Hom nao nai! Amnao nai! Atoni a'opan na'! Atoni amaufinut!

⁸Ho musik mulali Nai Saul in aplenat! Neno i UISNENO anfe neu ko kasat natuin ho mumate atoni amfau le'uf na'ko Nai Saul ume nanan. UISNENO naiti nalali ho plenat ma anfe nalali neu ho anmone Nai Absalom. Neno i ho mate amle'u nai, hoi atoni a'opan na'!”

⁹Nai Abisai Nai Yoab olif Nai Zeruya anmone, in nak neu kesel nak, “Nansa' Usi ho mufetin atoni ale'un nane hen sukat Usi? Mufetin ho ate kau he au ote ufek in to'an ai in neon nane!”

¹⁰Mes kesel nak neu Nai Abisai ma in tataf Nai Yoab nak, “Kais amlae in. Namautu he in ansukat kau. Natuin kalu UISNENO es anlenu in, sekau ka nabe'i he natoti nak nansa' in anmo'e onane?”

¹¹Oke te Nai Daud nak anteni neu Nai Abisai ma neu in ate sin ok-oke nak, “Au anhoni in neknon kun nami lanan he namate kau; nansa' him sanmak amkiso taos mo'et na'ko atoni Benyamin i? UISNENO es anlenu in hen sukat kau; es nane te kais anmo'e sa'-sa' neu in ma mautu he in ansukat kau.

¹²UISNENO of In nail au nukat i maanfe neu kau tetus on seunbanit mese neu sukat nane.”

¹³Oke te Nai Daud nok in amnokten sin nao anfini, mes Nai Simei in nao lab-lab natuin sin ma anpoli sin neki fatu ma nain.

¹⁴Kesel nok in amnokten ok-oke sin anhae anmate leka sin nem antia Noe Yordan, oke te sin nasnas anbi nane.

¹⁵Anbi tabu nane Nai Absalom ma ale atoni Israel le natuin in sin nem antam anbi kot Yerusalem, ma Nai Ahitofel in nok amsa.

¹⁶Leka Nai Husai Nai Daud in sob leko nane naeku nok Nai Absalom, Nai Husai ankoa nak, “Kesel amoni nai! Kesel amoni nai!”

¹⁷Mes Nai Absalom natoti neune nak, “Ho lasi ki'at neu ho sob leko Nai Daud es me ka? Nansa' ho ka mutuin fa in?”

¹⁸Nai Husai natae nak, “Au utuin neu atoni le UISNENO anbeti in, neu atoni-atoni i, ma neu atoni Israel ok-oke. Atoni nane es of au utuin in.

¹⁹Ma anes-nesi, au of he tuthae teni sekau ka? Ait ka au Usi anmone fa ka? On afi au tuthae au Usi ho Ama, onane amsa neno i of au tuthae au Usi ko.”

²⁰Nalali te Nai Absalom nak neu Nai Ahitofel nak, “Ho muton neu kau sa' le hit het mo'e.”

²¹Nai Ahitofel natae nak, “Amnao nai meu Usif ho Ama in fenai kliko sin le in namaika sin hen panat sonaf, ma amtup mok sin. Israel ok-oke of nahin nak nok Usif ho mo'et nane, Usif ho Ama ankiso ko on in musu. Ma ale Usif ho atuin sin be'in of ansato nok matani.”

²²Es nane te, anmo'e um-ume mese neu Nai Absalom anbi sonaf apupun manela nane. Oke te ale atoni sin nit Nai Absalom in antam neu um-ume nane ma antup nok in Amaf in fenai kliko sin.

²³Anbi batan nane ale fainekat na'ko Nai Ahitofel ansimo onle a'an Uisneno kun; leko Nai Daud ma Nai Absalom sin natuin ale fainekat-fainekat le nane.