Read Uab Meto 2 SAMUEL 17 Bible Online

2 SAMUEL 17 - Uab Meto bible

2 SAMUEL 17

¹Ka lo fa na'ko nane, Nai Ahitofel nak anteni neu Nai Absalom nak, “Mufetin kau he au beti an atoni 12.000. Anbi fai i of au fen ma nao he li'u Nai Daud.

²Au of upeni in ma au laban in anbi tabu in fe anhae ma an ole anmate. Au of uskeken in, talantia in amnokten of sin naen nasaitan in. Ma alaha Kesel Nai Daud es of au umate in.

³Mes in amnokten sin ok-oke of au fe ufani sin neu ko on bife fe'u anfani neu in mone. Ait au Usi ko alaha hom sinmakan atoni mese in amonin ka? Le bian of au ka mo'e fa sa'-sa' neu sin.”

⁴Nai Absalom nok ale mnasi-mnasi Israel sin ankiso lasi fainekat nane lo leko kun.

⁵Maski onane Nai Absalom nak, “Mo'en Nai Husai he in nem fe; he hit nen in tenab onme.”

⁶Leka Nai Husai in nem antia, Nai Absalom naton Nai Ahitofel in salit, oke te in nak, “Of hit he tatuin fainekat nane ka? Kalu kahaf, hom fe lasi molok bian anteni.”

⁷Nai Husai natae nak, “Nai Ahitofel in fainekat hae mese le i ka leko fa.

⁸Usi ho muhin nak Nai Daud ma in amnokten le nane meo pa'e matani. Sin maufinuken onle asu fui ainaf le naneku in ana. Oke anteni te Nai Daud nane meo pa'e mahine le in kan tup nit fa nok in to meo sin.

⁹Oni anbi tabu i amsa in fe natolo' anbi nuat mese in nanan ai bale bian. Es nane te, kalu onle Nai Daud in to meo sin anlaban ho amnokten, ma anmu'i amates, ma sekau amsa le sin nen lasi nane of sin namolok nak sin nis ma anbe'u nalali Nai Absalom in amnokten.

¹⁰Es nane te atoni-atoni le abe'it ma matani le'uf onle meo asu amsa of sin anfani namtau. Natuin ale atoni Israel sin nahin ok-oke nak ho Ama nane meo pa'e kun, ma in amnokten amsa atoni meo pa'e kun.

¹¹Es nane te, au lasi fainekat on i: Mubuab ale atoni Israel ok-oke na'ko pah nanan ok-oke, talantia sin amfauken on asnaen anbi tasi in ninen. Oke te Usi ho meknom amtopu amnao mat neu makenat.

¹²Hit of taeku Nai Daud anbi bale me le in anbine amsa, ma hit atlaban in leka in fe ka nahin fa neu sa' le hen bol. Katit fa es neu he nafetnon, he Nai Daud ai in amnokten.

¹³Leka in naen neu kot mese in nanan, hit to ok-oke of naiti ale tani ma anhel kot nane oke te nabelat nani neu nonof le anhaumak anbi nane. Fatu mese amsa of ka nabala fa anbi tubu nane in tunan.”

¹⁴Leka sin nen lasi fainekat nane Nai Absalom ma atoni Israel ok-oke sin nak, “Lasi fainekat Nai Husia naleko nesi na'ko fainekat Nai Ahitofel.” Namneo, UISNENO natetab nalali neu he nale'un lasi fainekat Nai Ahitofel alekot nane, he nati' amle'ut nem neu Nai Absalom.

¹⁵Oke onane te Nai Husai naton lasi nane neu Ana' Fuat Knino Nai Zadok ma Ana' Fuat Knino Nai Abyatar neu lasi fainekat Nai Ahitofel ma in lasi fainekat neu Nai Absalom ma ale anaet Israel.

¹⁶Nai Husai nak, “Maen nai labah! Mitonan Nai Daud he nati' kais in antup anbi bale toi tlaka noe anbi mnela snaen. In mes anlak Noe Yordan nok lab-labah. Kalu kahaf, in ma ale in to meo ok-oke of nale'un naskuku sin.”

¹⁷Nai Yonatan Nai Abyatar anmone ma Nai Ahimaas Nai Zadok anmone sin fe anpao anhaumak oe mata En-Rogel, anbi kot Yerusalem ninen. Sin kan taman fa neu kot natuin sin namtau neu es he nit sin. Onle anlek nani, ate bife mese natiaba neu sin hanaf le mes sin he naton nani neu Kesel Nai Daud.

¹⁸Mes hae esle' i li'mone mese nit sin, ma in naton lasi nane neu Nai Absalom. Es nane te nok labah sin anao ma natolo' anbi atoni mese in ume anbi kuan Bahurim. Anhaumak atoni nane in ume anmu'i oe mata mese ma sin antam neu oe mata nane in nanan.

¹⁹Ume tuaf nane in fenai na'ben pilu mese anbi oe mata nane fafon, ma in anhoi ane kase anbin, talantia oe mata nane ka mnita fa.

²⁰Atoni-atoni le Nai Absalom anlenu sin nane sin nem neu ume nane ma sin natoti bife nane nak, “Nai Ahimaas ma Nai Yonatan sin eseun me ka?” In natae nak, “Sin fe anlak noe nane.” Sin nami atoni munif nua en nane, mes sin ka nit fa sin, oke te sin neki anfani neu Yerusalem.

²¹Nai Ahimaas ma Nai Yonatan sin anpoi na'ko oe mata nanan, oke te sin anao nok lab-lab natef nok Kesel Nai Daud ma naton ale lasi nane ok-oke neu in. Sin nak, “Nai Ahitofel anfe lasi fainekat neu sin he nati' sin nem hen laban ma anken Usi ko. Es nane te amfen ma amnao nai esle' i amsa ma amlak noe i nai.”

²²Oke te Nai Daud nok in amnokten sin anlak Noe Yordan, ma sin antia noe aon bian anbi nok-nok ana fe anmeusab.

²³Leka Nai Ahitofel in nahin nak sin ka natuin fa in fainekat, in napeni in bikase luke mnanu oke te in neki anfani kun neu in kot. Leka in naloitan nalali ale sa'-sa' in nafiki nison kun, oke te ansub in anbi in ume nanan sin naukel.

²⁴Nai Daud in nem antia nalali kot Mahanaim, leka Nai Absalom fe anlak Noe Yordan, fun atoni Israel sin natuin in. (

²⁵Nai Absalom in naiti Nai Amasa anfani solalus nakaf anseka Nai Yoab. Nai Amasa nane Nai Yitra anmone atoni Ismael; in ainaf bi Abigail Nai Nahas anfeto, Nai Zeruya in fetof Nai Yoab in ainaf.)

²⁶Nai Absalom nok in amnokten sin nahakeb sin um-ume anbi pah Gilead.

²⁷Leka Nai Daud in nem antia Mahanaim, Nai Sobi Nai Nahas anmone na'ko kot Raba anbi Amon, ma Nai Makhir Nai Amiel anmone na'ko Lodebar, ma Nai Barzilai na'ko Rogelim anbi Gilead, sin nem ma ansenu in.

²⁸Sin neki pika, tasu, hala tupa neu Nai Daud ma in amnokten, onane amsa sin neki ane kase, sain, ane kase seka, fua me', fua me' naek, oni hau, susu lite, ma bibi kase fauk-fauk. Sin nahin nak Nai Daud ma in amnokten sin namnahan, anmeno ma anhae natuin lanan le a'lo anbi mnela snaen.