Read Uab Meto 2 SAMUEL 18 Bible Online

2 SAMUEL 18 - Uab Meto bible

2 SAMUEL 18

¹Kesel Nai Daud nabuab in amnokten ok-oke, oke te anbati sin anbi pukan mese-mese le pukan mese te atoni nifun mese ma bian atoni natun mese. Nalali te puknes te naiti solalus nakaf mese hen fani nakaf neu sin.

²Oke onane te anlenu sin anfen ma nao mat hen makenan anbi pukan tenu, Nai Yoab Nai Abisai Nai Yoab olif ma Nai Itai na'ko Gat es-es te anfani nakaf neu pukan mese. Kesel nak neu in amnokten nak, “Au amsa au ok ki.”

³Mes atoni-atoni nane sin nak, “Kaisa Usi. Natuin leka anli'u naseke kai ma hai maen, ai maski bian na'ko kai hai mate, musu naken fe kan malin fa, natuin sin nami natesan ko Usi. Usi ho osam papmese on atoni nifun bo'mese na'ko kai. Leko nesi Usi hom sonu kai tuntakus ma babat na'ko kot nanan.”

⁴Oke te kesel nak, “Leko, es kun hi lomim.” Nalali te in anhake anbi kot ninen, ma ale solalus nakaf ok-oke sin anao maakatuinen ma sin anpoi neu to meo pukan mese-mese le puknes te atoni nifun mese ma bian anteni atoni natun mese.

⁵Oke te kesel anfe plenat neu Nai Yoab, Nai Abisai ma Nai Itai, nak, “Kais hi mipapa' Nai Absalom anmunif nane natuin au.” Ale to meo ok-oke sin nen plenat Nai Daud nane.

⁶Oke te Nai Daud in to meo sin anao ma anken to meo Israel, ma sin anmakenan anbi nasi Efraim.

⁷Nai Daud in to meo sin nis ma anbe'u to meo Israel; makenat nane anae le'uf, talantia atoni 20.000 anmate anbi neno nane.

⁸Makenat ma manuat nane anfenus ma anao neu pah ok-oke, ma atoni anmate namfau nesi natuin anmate anbi nasi nanan na'ko anmate anbi makenat ma manuat nanan.

⁹Anbi tabu Nai Absalom ansae neu in bikase luke mnanu, nok askeken in naen anfinin hau mese le anaek ma na'pal, ma Nai Absalom in anakan na'bake anbi hau nane in toef mese. In bikase luke mnanu nane naen piut mes Nai Absalom in na'bake nabalah ma nafikion nabalah anbi nane.

¹⁰Atoni mese na'ko Nai Daud in solalus nit in ma naton lasi nane neu Nai Yoab nak, “Koi Usi, lelon au it Nai Absalom nafikion anbi hau naek mese!”

¹¹Nai Yoab natae nak, “Ho mak sa'? Ho mit in? Nansa' ho ka mumate fa in? Fun namneo of au fe neu ko noni muti bo'mese ma pasu futu mese.”

¹²Mes atoni nane natae nak, “Maski hom fe neu kau noni muti 1.000, au ka lomi fa he umenab kesel in annaimnuke. Hai al-al kai haim nen sa' le kesel naplenat neu au Usi ko ma neu Nai Abisai ma neu Nai Itai, he nati' kais mipapa' Nai Absalom anmunif nane natuin kesel.

¹³Ma onle lelon au umate Nai Absalom, namneo kesel mes in nahin lasi nane, natuin kesel in of anen ale lasi sa' — ma au Usi ko amsa namneo of ho kam pesi kau fa.”

¹⁴“Namautu nai! Tabu oke alaha het matotin tok ko,” Nai Yoab nak onane. Oke te Nai Yoab in naiti auni nono' tenu ma napau natam sin neu Nai Absalom in a'basan le anbi tabu nane fe anmoni ma le nafikion anbi hau.

¹⁵Oke te Nai Yoab in solalus sin bo'mese sin nem nabua ma namate Nai Absalom.

¹⁶Nai Yoab anfu in to'is talantia in solalus sin nasnas ma kan li'u anteni fa solalus Israel.

¹⁷Oke te sin naiti Nai Absalom in aon ta'un ma anpolin natam neu oe mata mese in nanan anbi nasi nanan. Sin ankub oe mata nane neki fatu talantia namnanu. Solalus Israel ok-oke sin naen anfani neu sin ume mese-mese.

¹⁸Leka Nai Absalom in fe anmoni in nahakeb ni fatu mese neu in aon anbi Nonof Kesel, natuin in kan mu'i fa anmone he nasuf ma naka'u neu in ume nanan. Ni fatu nane in nakanab natuin in kanan, ma talantia neno i ni fatu nane antek nak Ni Fatu Nai Absalom.

¹⁹Nalali te Nai Ahimaas Nai Zadok anmone nak neu Nai Yoab nak, “Mufetin kau he au aen anao neu kesel ma uton neune lasi amlilat nak UISNENO nafetin nalali kesel na'ko in musu.”

²⁰“Kaisa,” Nai Yoab nak onane, “haef es anteni. Neno i ka nabe'i fa he ho meki beno, natuin kesel in anmone anbel ma ankua nalalien.”

²¹Nalali te Nai Yoab nak neu in ate mese na'ko Sudan nak, “Amnao nai ma mutonan kesel neu lasi sa' le ho mit mulali.” Ate nane anli'tu ma nabes oke te in anao nok te naen nok.

²²Mes Nai Ahimaas naseke Nai Yoab nak, “Sa' amsa ka le hen bol, mufetin kau amsa he au eki beno.” “Nansa' ho muhelnom maneun le'uf onane he ho amnao amsa?” Nai Yoab natoti neune. “Ho of kam simo fa sa'-sa' neu lasi nane.”

²³“Ka sa'-sa' fa,” Nai Ahimaas natae anteni, “Au of he nao.” Nai Yoab nak, “Kalu onane, amnao nai.” Onane te Nai Ahimaas in naen natuin lanan le nao nok Nonof Yordan, ma ka lo fa te in naen nahunun ate Sudan lelon.

²⁴Nai Daud fe antoko anbi ke'an eno naek nanan ma eno naek kot kotin nane atnanken. Apaot ansae neu baki lape fafon ma anhake ma anhake anbi eno naek nane a'pupun. Leka in naiti in matan ma ankiso, in nit atoni mese anao nem nok naen.

²⁵Apaot nane ankoa neu abiten apinan he naton lasi nane neu kesel, ma kesel nak, “Kalu in anmesnon, namneo in neki lasi alekot.” Leka atoni nane anhaumak he nem antia,

²⁶apaot nane in nit atoni mese anteni anao nem naen nok amsa. Es nane te in ankoa nak, “Amkiso! Anmu'i atoni mese anteni le in naen nem anmes-mes non.” Kesel natae nak, “Namneo amsa in neki lasi alekot.”

²⁷Apaot nane nak, “Atoni ahunut nane Nai Ahimaas. Au uhin na'ko in amnaenan.” “In atoni alekot,” kesel nak onane, ‘oni in neki lasi alekot.”

²⁸Nok han koa Nai Ahimaas anfe han alekot neu kesel, oke te anli'tu ma nabes ma nak, “Pules ma liatas neu UISNENO Usi ho, le nana'at nalali neu au Usi ko atoni-atoni le anlaban au Usif ko!”

²⁹Kesel natoti nak, “Nai Absalom atoni munif nane in es aomina ka?” Nai Ahimaas natae nak, “Koi Usi, lelon Nai Yoab anlelu kau, ho ate au it aslutuf anae le'uf, mes ho ate ka uhin fa neu lasi sa' hen bol.”

³⁰Kesel nak, “Amhake nai anbi aon bian nane;” ma Nai Ahimas anao neu aon bian ma anhake anbi nane.

³¹Nalali te Nai Yoab in ate nem antia, ma in nak neu kesel nak, “Ho ate au eki lasi alekot neu au Usi ko! Anbi neno i UISNENO anfe nalali lasi mnisat neu Usi ko neu bale atoni le anlaban Usi ko.”

³²Kesel natoti neune nak, “Nai Absalom atoni munif nane in es aomina ka?” Oke te ate nane natae nak, “Ale Usi ho musu sin, ale atoni le anlaban au Usi ko sin natef nok monit papmese onle anmunif nane.”

³³Leka kesel in nen lasi nane in nasusbon anae le'uf, oke te in ansae neu ke'an anbi eno naek fafon ma ankae nok han anaek nak, “Oh au anmone! Au anmone Nai Absalom! Absalom, au anmone! Leko nesi au es anmate aseka ko, koi au anmone! Absalom, au anmone!”