Read Uab Meto 2 SAMUEL 19 Bible Online

2 SAMUEL 19 - Uab Meto bible

2 SAMUEL 19

¹Atonas natonan Nai Yoab nak, Nai Daud ankae ma ankulu neu Nai Absalom.

²Es nane te lasi mnisat neno nane nabain'on ma anfani on kulut kaet neu Nai Daud in to meo ok-oke natuin sin nen nak kesel ankae neu in anmone.

³Sin anfani neu kot nok a'ten-tena, onle solalus le anmae natuin sin naen na'ko makenat.

⁴Kesel ankub in human ma ankae nok hana naek nak, “Oh au anmone! Au anmone Nai Absalom! Nai Absalom au anmone!”

⁵Nai Yoab anao ma naeku nok kesel ma nak, “Anbi neno i au Usi ho mumaeba Usi ho amnokten, mes sin es nafetin Usi ho monim, ho anhen naimnuke ma fetnai sin, ho fenai ma ho fenai kliko sin monin.

⁶Usi hom nek atoni-atoni le namusu nok Usi ko, mes Usi ho muto'an atoni-atoni le sin anek Usi ko! Nok mat-mat Usi ho muton mak ale ho solalus nakaf sin ma ale Usi ho solalus sin ka maota fa sa'-sa' neu Usi ko. Ma atkisot Usi of ho malin anae le'uf anbi neno i kalu Nai Absalom in fe anmoni ma hai al-al kai mate oke!

⁷So nati' Usi hom fen nai ma ampoi hem fe tainine neu Usi ho amnokten sin nekan. Ho ate au sup natuin UISNENO kanan, kalu Usi ho kam poi fa he mueku mok sin, anbi fai le i amsa atoni mese amsa kan lomi he natuin au Usi ko. Lasi nane of anfani lasi amle'ut anaek mese le Usi ho mueku mokan anbi Usi ho monim.”

⁸Nalali te kesel anfen ma anpoi, ma antoko anhaumak eno naek enon. In amnokten sin nen nak in es bale nane, oke te sin al-al sin nem ma naeku nok in. Anbi tabu nane solalus Israel sin al-al sin naen nalali ok-oke, ma anfani neu sin ume mese-mese.

⁹Anbi uf Israel lasi matoes mabanat anbol. Sin nak, “Kesel Nai Daud nafetin nalali kit na'ko atoni Filistin ma nafetin kit na'ko musu-musu bian, mes neno i in naen nafetin in aon na'ko Nai Absalom ma nasaitan pah i.

¹⁰Nai Absalom hit tasaeba talali in anfani kesel, mes neno i in anmate nalalien anbi makenat in nanan. Nansa' talantia katit fa es amsa le he nami lanan he nati' Kesel Nai Daud anfani nem?”

¹¹Uab molok nane nem antia Kesel Nai Daud. Es nane te in anlenu Ana' Fuat Knino Nai Zadok ma Ana' Fuat Knino Nai Abyatar he sin natoti mnasi-mnasi Yehuda nak on i, “Nansa' es him fani amunit hem senu ma miauba kesel hen fani nem neu in sonaf?

¹²Ai au ka bia benu ka es fa hi ma ai au ka nuif ma ka nesaf ka es fa hi ka? Leka me hi es mimuni mis hem toti he au fani aum ka?”

¹³Nai Daud anlenu sin amsa natonan Nai Amasa onane amsa, nak, “Ai au nuif ma au nesa ka es fa ho ka? Naubon na'ko neno i au aiti ko amfani solalus nakaf amnanut amseka Nai Yoab. So nati' Uisneno namate kau kalu au ka unaoba fa lasi nane!”

¹⁴Onle nane Nai Daud in nis nan atoni Yehuda sin nekan ok-oke talantia sin ansonu haef neu kesel he nati' in anfani nem bua'-bua' nok ale in ameput sin.

¹⁵Oke te kesel anfen ma anao ma nem antia Noe Yordan, fun ale atoni-atoni Yehuda sin amsa nem antia nalali Gilgal hen senu kesel ma naauba in hen lak noe nane.

¹⁶Nai Simei Nai Gera anmone, atoni Benyamin nane in neki atoni nifun mese na'ko uf Benyamin ma nok lab-lab in nem nabua nok atoni Yehuda nane hen senu kesel. Onane amsa Nai Ziba ate na'ko Nai Saul ume nanan, nok in anmone sin bo'es am nim ma in ate sin bo'nua; sin anlak nalali Noe Yordan leka kesel fe ka nem antia fa.

¹⁸Sin anbab kesel in ume nanan nalakab sin ma anmo'e ale sa' le kesel anlenu sin. Leka Nai Daud hen lak noe, Nai Simei anli'tu ma nabes ma nak,

¹⁹“Ho ate au toti ko Usi, he nati' Usi kais hom kiso kau usanab ubalah. So hom lomi koi Usi hom nikan sa' le ho ate mo'e ulali leka Usi musaitan Yerusalem.

²⁰Ho ate au uhin ulali, nak ho ate au mo'e ulali sanat, ma es nane te, ale uf-uf le natua anbi bian a'li ho ate au es aum uhunu ma au senu ko Usi anbi neno i.”

²¹Leka Nai Abisai Nai Zeruya anmone in nen lasi nane te in nak, “Nai Simei mes hen mate natuin in ansukat nalali kesel le UISNENO anbeti nalali in.”

²²Mes Nai Daud nak neu Nai Abisai ma neu in tataf Nai Yoab nak, “Kais him selo mok. Nansa' hi misusab kau? Anbi neno i au sae fani teni kesel neu Israel, ma ka nabe'i fa he atoni Israel mese amsa hen mate.”

²³Nalali te kesel ansup neu Nai Simei nak, “Au manta'en nak of ka namate ko fa.”

²⁴Onane amsa Nai Mefiboset Nai Saul upuf in amsa nok ma ansenu kesel. In kan boe fa in haen, ma kan eu fa in konon, ma kan fase fa in bale pake na'ko neno Kesel Nai Daud nasaitan Yerusalem talantia in anfani nem nok aomina.

²⁵Leka Nai Mefiboset nem na'ko Yerusalem hen senu kesel, kesel nak neune nak, “Nansa' ho ka mok kau fa anbi neno nane, Mefiboset?”

²⁶In natae nak, “Koi Usi Apinat, Usi ho muhin neu ho ate hae hela kau. Au lenu au ate ankap au bikase luke mnanu le nabe'i neki kau he utuin ko Usi. Mes au ate nane in an aneb kau.

²⁷Ma in nale'un au kanak anbi au Usi ho matam. Mes au Usi ko on ahake Uisneno. Es nane te ho mo'e nai sa' le Usi hom naben in leko kun.

²⁸Ale ho ate au Ama ume nanan namneo-namneo Usi ho mes he mumate sin, mes ho ate kau le i Usi ho mufetin kau he bukae ok ko anbi sonaf in nanan. Neno i ho ate kau ka toti fa sa'-sa' anteni na'ko au Usi ko.”

²⁹Kesel natae nak, “Ka nabe'i fa he ho mumolok sa'-sa' anteni. Au ufek ulali he fe neu ko ma neu Nai Ziba ale Nai Saul in amu'in.”

³⁰Oke te Nai Mefiboset natae nak, “Maut he Nai Ziba in naiti sin oke. Ho ate au naben au nekak anmalin nalali natuin Usi hom fani aum nok aomina.”

³¹Onane amsa Nai Barzilai atoni na'ko Gilead nane in nem na'ko Rogelim he natuin kesel ma anlak Noe Yordan.

³²Nai Barzilai in namnasi anae le'uf, in ton bo'fanu. In atoni amu'it mese ma afi neno kesel natua anbi Mahanaim in es nabalab bukae neu kesel.

³³Kesel nak neune nak, “Mutuin kau nai neu Yerusalem, au of ubalab ale sa' neu ho monim anbi nane.”

³⁴Mes Nai Barzilai natae nak, “Ho ate of au ka moni fa a'lo anteni. Es nane te maota sa' ka au he ok ko neu Yerusalem?

³⁵Ho ate kau au ton bo'fanuen, ma katit af sa' es anteni le he neki amlilat neu ho ate kau. Ho ate kau au ka naben fa sa' le ho ate au uah ai sa' le au inu, ma au ka nen ateni fa leka atoni ansi. Au alaha of afani mafena mese neu au Usi ko.

³⁶Ho ate au ka tam fa ota he simo lasi seunbanit anaene onle nane. Au alaha sinmak he utuin ko a'lak haef mese am nua anbi Noe Yordan in ninen.

³⁷Ma oke onane te mufetin ho ate he eki fani neu ho ate au ume ma au mate haumak ho ate au mnasi sin naukel, mes ho ate au anah Nai Kimham es i. Mufetin in he in nok ko ma Usi ho mo'e sa' neu in le Usi hom kiso te naleko.”

³⁸Kesel natae nak, “Au of ok Nai Kimham ma of au mo'e neune sa' le hom lomi, ma sa' le hom toti of au unokab ani.”

³⁹Nalali te Nai Daud nok ale in amnokten ok-oke anlak Noe Yordan. Oke te Nai Daud in anek Nai Barzilai ma anbation nokan. Nalali onane te Nai Barzilai anfani neu in ume.

⁴⁰To meo Yehuda ok-oke ma aonbian na'ko to meo Israel sin natuin kesel ma anlak noe. Oke te kesel anfini neu Gilgal, ma Nai Kimham nok in.

⁴¹Nalali te atoni Israel sin nem ok-oke natef nok kesel ma nak neune nak, “Koi Usi, nansa' hai biaf sin atoni-atoni Yehuda nane sin nakle'at kai nak sin es hen senu ko ma anpanat Usi ko mok ho ume nanan sin ma Usi ho amnokten he him lak Noe Yordan?”

⁴²Oke te atoni Yehuda sin natae nak, “Lasi nane namneo, natuin kesel nane naf mese ma nesaf mese nok kai. Nansa' hi mito'an kai? Ai kesel ansutai hai monim, ai anfe tnatas neu kai?”

⁴³Atoni Israel sin natae nak, “Hai mu'i hak neu kesel haef bo'mese anesi na'ko hi hak, maski kesel naf mese ma nesaf mese nok ki. Nansa' hi amkiso amsae mana kai ka? Kais amnikan natuin ahun-hunut hai es mimolok neu he meki kesel anfani nem!” Mes atoni Yehuda sin na'uab nahel anesi na'ko atoni Israel ma kan lomi fa nanebtok.