Read Uab Meto 2 SAMUEL 2 Bible Online

2 SAMUEL 2 - Uab Meto bible

2 SAMUEL 2

¹Nalali te Nai Daud natoti UISNENO nak, “Hom lomi ka UISNENO he au fen ma nao he uplenat kot mese anbi Yehuda?” “Leko,” UISNENO natae onane. “Kot me ka?” Nai Daud natoti anteni, “Kot Hebron,” UISNENO natae anteni.

²Oke te Nai Daud anfen ma anao neu Hebron nok in fenainu nua sin: Bi Ahinoam bife Yizreel, ma bi Abigail afi Nai Nabal in fenai na'ko Karmel nane.

³Onane amsa in amnokten nok sin ume nanan sin mese-mese nao natuin Nai Daud, oke te sin natua anbi Hebron ma bale le anhaumak anbi nane.

⁴Nalali te atoni-atoni Yehuda sin nem neu Hebron, ma sin naiti Nai Daud anfani kesel neu Yehuda. Leka Nai Daud in nen nak atoni-atoni Yabesh anbi Gilead sin ansub nalali Nai Saul in aon ta'un,

⁵Nai Daud ansonu haef neu sin ma natiaba hanaf neu sin nak, “So nati' UISNENO anfe tetus neu ki, natuin hi milile lasi alekot ma anki'at neu hi kesel natuin him senan milali in aon ta'un.

⁶Es nane te, so nati' UISNENO nalile In manekan ma in matakun neu ki. Au amsa of anmo'e alekot neu ki natuin hi mo'et alekot nane.

⁷Amhatani hi nekam nai ma amhake nai on meo pa'e! Nai Saul, hi kesel in nasaebon nalalien, mes atoni Yahuda sin naki'ab nalali kau ma au fani kesel neu sin.”

⁸Nai Abner Nai Ner anmone, to meo nakaf Nai Saul, in naen nafetin in aon nok Nai Isyboset Nai Saul anmone, neu Mahanaim anbi Noe Yordan aon bian.

⁹Anbi nane Nai Abner naiti Nai Isyboset anfani kesel neu bale Gilead, Asyuri, Yizreel, Efraim ma Benyamin ma neu Israel ok-oke.

¹⁰Nai Isyboset anbi tabu naiti in anfani kesel anbi Israel in ton bo'ha, ma in ana' aplenat ton nua a'lon. Mes uf Yehuda sin na'ki namep neu Nai Daud,

¹¹ma Nai Daud naplenat anbi Hebron neu Yehuda ton hitu ma funan ne a'lon.

¹²Anbi neno mese Nai Abner in anao na'ko Mahanaim neu kot Gibeon, Nai Isyboset in amnokten sin nok Nai Abner.

¹³Onane amsa Nai Yoab (in ainaf kanan bi Zeruya), in nok Nai Daud in amnokten sin anao neu kot nane. Atoni pukan nua le anmamusun nane sin naeku ma natef anbi nifu Gibeon; Nai Abner nok in-ini sin antokon anbi noe aon bian i, ma Nai Yoab nok in-ini sin antokon anbi noe aon bian nane.

¹⁴Oke te Nai Abner nak neu Nai Yoab nak, “Neu nai, hit elu hit anhenu hen masu' nitan nenuf!” Nai Yoab natae nak, “Leko.”

¹⁵Oke te atoni bo'es am nua na'ko uf Benyamin on Nai Isyboset ini, ma atoni bo'es amnue na'ko Nai Daud amnokten.

¹⁶Sin mese-mese ana' es anakan funun ma napau in musu tain, talantia sin anmate bua'-bua'. Es nane te bale anbi Gibeon nane nakanab nak, “Mnela Suni.”

¹⁷Nalali onane te makenat ma manuat anae le'uf anbol, ma Nai Daud in amnokten sin nis ma anbe'u Nai Abner nok to meo Israel.

¹⁸Bi Zeruya anhen tenu sin le anbi nane esle' Nai Yoab, Nai Abisai ma Nai Asael. Nai Asael in naenat manoene onle lus.

¹⁹ma in anli'u Nai Abner piut-piut.

²⁰Nai Abner nike kotin ma natoti nak, “Ho Nai Asael ko ka?” In natae nak, “Namneo.”

²¹“Kais amli'u kau!” Nai Abner natae onane. “Bati hom heke man es na'ko ale to meo nane ma maiti man in bale manuat sin!” Mes Nai Asael anli'u Nai Abner piut.

²²Hae mese anteni Nai Abner nak neune nak, “Kais hom li'u kau! Nati' au umate ko. Ma of onme, au nabe'i he kiso Nai Yoab ho tataf in human ka?”

²³Leka Nai Asael ka nasnas fa hen li'u Nai Abner, onane te Nai Abner anuan in auni ansali kotin, ma antoman Nai Asael in tain talantia anbolan bati in kotin. Nai Asael anbel ma anmate nani anbi bale nane amsa. Ale atoni le sin nem neu bale Nai Asael anbel ma anmate anbine, sin nasnas oke anbi nane.

²⁴Mes Nai Yoab ma Nai Abisai sin anli'u Nai Abner piut. Leka manas antes, sin nem antia Tubu Ama, anbi Giah aon neno saen, anbi lanan mnela snaen Gibeon.

²⁵Anbi nane atoni na'ko uf Benyamin sin nabua anteni nok Nai Abner, oke te naloitan pukan nane anbi tubu mese tunan.

²⁶Na'ko nane Nai Abner ankoa Nai Yoab nak, “Mes hit he maken ma at manua piut ka? Ho ka muhin fa ka nak makenat i al neki menu neu kit? Hai le i hi biaf benuf es kai ma hit uf mese. Ho fe ampao amteni leka ka ma ho kam lelu fa ho amnokten he nati' sin nasnas na'ko anli'u kai ka?”

²⁷Ma Nai Yoab natae nak, “Anbi Uisneno amonit, leka ho ka mumolok fa onane, namneo au amnokten of anli'u ki piut talantia neno noka.”

²⁸Oke te Nai Yoab anfu knit anfani atakaf neu in amnokten he nati' sin nasnas na'ko anli'u atoni Israel, onane te makenat ma manuat nane nasnas kun.

²⁹Nai Abner nok in amnokten sin anao anbi fai mese in nanan sin anao nok Anonof Yordan, oke te anlak Noe Yordan, ma leka sin anao anteni neno mese anteni, oke te sin antia Mahanaim.

³⁰Leka Nai Yoab nasnas na'ko anli'u Nai Abner, oke te in nabuab ale in amnokten. In amnokten bo'es am sio namneku nok Nai Asael.

³¹Mes Nai Daud in amnokten sin namate atoni 360 na'ko Nai Abner in to meo sin na'ko uf Benyamin.

³²Oke te Nai Yoab ma in amnokten sin naiti Nai Asael aon ta'un ma ansub anbi in Amaf naukel anbi Betlehem. Oke te sin anao piut anbi fai nane in nanan ma sin antia Hebron anbi nok-nok ana.