Read Uab Meto 2 SAMUEL 20 Bible Online

2 SAMUEL 20 - Uab Meto bible

2 SAMUEL 20

¹Anbi kot Gilgal anmu'i atoni abulalut mese in kanan Nai Seba. Nai Bikri anmone na'ko uf Benyamin. Nai Seba anfu to'is ma ankoa nak, “Hit kat mu'i fa malutas tok Nai Daud. Hit he tatuin in neu sa' ka? Hoi atoni Israel, neu nai hit atfani nai!”

²Oke te atoni-atoni Israel sin anao anfani ma nasaitan Nai Daud, oke te sin natuin Nai Seba. Mes atoni-atoni Yehuda sin na'ki piut ma sin natuin Nai Daud na'ko Noe Yordan nem antia Yerusalem.

³Leka Nai Daud nem antia in sonaf anbi Yerusalem, in fenai kliko bo'mese le in namaika sin hen pao sonaf, in antao sin anbi ume mese le apaot anpao nani. Ale sa' le antom neu sin amonim in nanokab neu sin, mes Nai Daud in kan tup anteni fa nok sin. Es nane te anpao sin anbi ume nanan ma sin amonin on bife banu talantia sin anmate.

⁴Kesel anfe plenat neu Nai Amasa nak, “Mubuab atoni Yehuda ma mok sin hi aim meu i anbi neno tenu.”

⁵Oke te Nai Amasa in anao ma nabuab sin, mes in kan fani nem fa anbi neno le kesel natetab nani.

⁶Nalali te kesel nak neu Nai Abisai nak, “Nai Seba in of nasusab kit anesi na'ko Nai Absalom. Es nane te ho meki au amnokten ma amli'u in, he nati' kais in antoko kot-kot le mabaki lape, ma oke te in naen na'ko kit.”

⁷Nai Abisai in es ana' makenat nane, ma onane te Nai Yoab in to meo sin ma kesel in to meo le anpao kesel ma to meo bian anteni sin anfen ma anao neu Yerusalem hen li'u Nai Seba.

⁸Leka sin nem antia fatu naek anbi Gibeon, Nai Amasa in naeku nok sin. Nai Yoab anbi tubu nane in anpake bale makenat nok suni le natap le anfutun anbi in atnanan. Leka in anao mat, in suni tapan nafetnon talantia natnani neu in niman a'li.

⁹Nai Yoab nak neu Nai Amasa nak, “Ho meki kit lasi sa' ka, bae?” fun in ana' Nai Amasa in konon neki in niman a'ne'u onle he nek in.

¹⁰Nai Amasa ka nit fa suni anbi Nai Yoab niman a'li. Ma nok asekken Nai Yoab napau Nai Amasa tain neki suni talantia in taifen nasan'ok anbi nain. In anmate anbi tabu nane amsa, talantia Nai Yoab ka napau anteni fa Nai Amasa. Oke te Nai Yoab nok in olif Nai Abisai, sin anli'u Nai Seba piut.

¹¹Nai Yoab in solalus mese le anhake anhaumak Nai Amasa aon ta'un in ankoa nak, “Sekau le anpesi Nai Yoab ma Nai Daud, mituin Nai Yoab nai!”

¹²Nai Amasa in aon ta'un le naniu na' nane antup anbi lanan atnanan. Nai Yoab in solalus nane in nit nak ale atoni le anao nok lanan nane sin anhake anbi nane. Es nane te in anhel Nai Amasa in aon ta'un nane neu lene nanan ma antobe neki beti ai mau'.

¹³Leka sin anhel natnanib Nai Amasa in aon ta'un na'ko lanan, ale atoni sin anao anfini natuin Nai Yoab hen li'u Nai Seba.

¹⁴Nai Seba in anfun natef nalali pah Israel ok-oke, oke te in nem antia kot Abel-Bet-Maakha fun ale Nai Bikri ume nanan sin natuin in.

¹⁵Nai Yoab in solalus sin anen nak Nai Seba anbi kot nane, oke te sin anfun natef nan kot nane. Sin anae baki lape kot nane kotin anfun natef neki afu ma sin anhani afu anbi baki lape nane a'pinan he na'belat kot nane.

¹⁶Anbi kot nane anmu'i bife ahinet mese, ma in anhake anbi baki lape tunan oke te ankoa nak, “Amnen nai! Amnen nai! Mitonan Nai Yoab he in nem neu i; au lomi he umolok ok in.”

¹⁷Oke te Nai Yoab in nem ma bife nane natoti neune nak, “Ho Nai Yoab ko ka?” Nai Yoab natae nak, “Namneo, au Nai Yoab kau.” Bife nane nak, “Amnen nai au hanak, Usi.” Nai Yoab natae nak, “Leko, au nen.”

¹⁸Bife nane natae nak, “Afi ahunut atoni-atoni sin antak namolok nak on i, ‘Kalu hom lomi fainekat, amnao nai meu kot Abel,’ — ma lasi nane sin es anmo'e.

¹⁹Hai kot Abel i anaek, kot mese le nahenu nok tainine ma lasi aki'at anbi pah Israel. Nansa' Usi ho muhelnom he mule'un muskuku in? Hom lomi ka Usi he mule'un pah UISNENO?”

²⁰“Ka onfa nane!” Nai Yoab in natae, “au ka utenab fa he ule'un ma uskuku fa hi kot!

²¹Nane ka hai salit fa es nane. Mes atoni mese kanan Nai Seba Nai Bikri anmone, na'ko neten Efraim, in anfen ma anlaban Kesel Nai Daud. Mina'at in neu kai, oke te of au nao usaitan kot i.” Oke te bife nane nak, “Atoni nane in anakan of haim polin neu ko na'ko baki lape i in tunan.”

²²Oke te in anao ma nok mahine in natiaba in tenab nane neu kot nane tuaken. Oke onane te sin an ote nan Nai Seba in anakan ma anpolin neu Nai Yoab. Nalali te Nai Yoab in anfu to'is ma in solalus sin nasaitan kot nane oke te sin anfani neu sin ume mese-mese. Nai Yoab amsa in anfani neu kesel anbi Yerusalem.

²³Le i Nai Daud in ana' aplenat amnanut le in naiti sin. Solalus nakaf amnanut neu solalus Israel ok-oke es: Nai Yoab. Solalus nakaf apaot neu Nai Daud in aon es: Nai Benaya Nai Yoyada anmone.

²⁴Nakaf neu mepu maseke es: Nai Adoram. Ana' noni pah es: Nai Yosafat Nai Ahilud anmone.

²⁵Lul tunis pah es: Nai Seya. Ana' fuat knino es: Nai Zadok ma Nai Abyatar.

²⁶Ana' fuat knino anbi sonaf nanan es: Nai Ira na'ko kot Yair.