Read Uab Meto 2 SAMUEL 22 Bible Online

2 SAMUEL 22 - Uab Meto bible

2 SAMUEL 22

¹Leka UISNENO nafetin nalali Nai Daud na'ko Nai Saul ma na'ko ale in musu bian sin, Nai Daud ansi sit i neu UISNENO nak: [

²Au nek umnau Ko, koi UISNENO, au be'ik au matanik es Ko.]

³UISNENO on baki lape matani bale au uhaoftok a'bi In. Au Uisneno on tubu fatu, bale au uhaoftok a'bi In. In on ben besi tika le nanini kau, ma anpanat kau he nati' au tainine piut.

⁴Au anbai neu UISNENO le nabe'i he maliatas, In nafetin kau na'ko au musu-musu sin.

⁵Fun lasi maten anfun natef nan kau, ma noe sako amle'ut in nae nan kau.

⁶Fun lasi maten anfun natef nan kau, a'la'u lasi maten anbi au humak au matak.

⁷Anbi malelat au anbai neu UISNENO, au o'en Uisneno au toti hen bab kau. Na'ko In sonaf In nen au hanak ma In natae au han anbait.

⁸Oke te pah pinan na'beko ma antainunu, tubu sin uken nabeko ma anlilitai natuin Uisneno In to'as!

⁹Ai masu anpoi na'ko In panan, ai ma flae anpoi na'ko In fefan.

¹⁰In anpisu neno tnanan, oke te In ansanu, neki nope mesokan anbi In haen nanan.

¹¹In naplel neki ahake neno tunan; In naplel anbi anin In ninen fafon.

¹²In an'amu nan In aon neki mesokan; nope metan mafaun anius nan In.

¹³Na'ko limat ma kenat anbi In human In matan, nope anpoi, ul sen-sene ma ai.

¹⁴Oke te UISNENO anfe lotos na'ko neno atnanan, Anesit Afinit naklile ma naton In hanan.

¹⁵In naklao neki In as'anef sin, ma nasitib ma nasana musu. In neso neki limat hae'-hae' ma anmo'e sin talantia sin naenan.

¹⁶Tasi pinan natonon ma pah pinan in sukin nalil'on anbi neno UISNENO ansali In musu sin nok to'as.

¹⁷UISNENO In nenu In nukun na'ko fafon; In ana' kau ma anfiti kau na'ko oe amnanut.

¹⁸In nafetin kau na'ko musu abe'it ma matani ma na'ko atoni le anunto'an to'an neu kau natuin sin nabe'i nesin kau.

¹⁹Sin anlaban kau anbi tabu amle'ut anbolan kau mes UISNENO antuntaku kau ma anbab kau.

²⁰In nafetin kau na'ko amle'ut ma anfe aomina neu kau natuin In anlomi kau.

²¹UISNENO anseubani au taos au mo'et amneot; In anfe tetus neu kau natuin au ka usanab fa.

²²Au utuin UISNENO In aplenat sin, ma au ka usaitan fa au Uisneno.

²³Au panat In aplenat sin, In aplenat sin au ka usaitan fa sin.

²⁴In nahin nak au ka malahi kau fa ma au uskotun au aok na'ko lasi sanat.

²⁵Es nane te UISNENO anseunbanin au taos au mo'et amneot natuin in nahin au ka usanab fa.

²⁶Koi UISNENO, Ho mu'ki neu atoni-atoni le na'ki neu Ko ma Ho leko ko neu atoni le in leko neu Ko.

²⁷Neu atoni knino Ho muklile Ho akninom, mes neu atoni amle'ut Ho mumusu mok sin.

²⁸Atoni nek amnebet Ho mufetin sin; mes atoni nek a'moko Ho munebet sin.

²⁹Ho mupina au paku; UISNENO au Uisneno antana kau anbi au mesokan.

³⁰Ho muhelan kau he nati' au ule'un musu; natuin au Uisneno anbab ma antuntaku kau onane te au upe' musu in bale makenat.

³¹Taos ma mo'et Uisneno lo knino kun, UISNENO In fef bela lo nabe'i tateb tani! In onle ben besi tika neu sin al-al sin le nahaoftok anbine.

³²Natuin alaha UISNENO In es Uisneno kun; alaha Uisneno es nanini ma natau kit.

³³In kun Uisneno le anfe neu kau be'it ma matani ma anmo'e au lanan antainine.

³⁴In nahelan au haek sin on lus in haen, ma anpanat au monik anbi neten in tunan.

³⁵In nanoina kau he maken, talantia au hel ube'i aklaot le matani le'uf.

³⁶Koi UISNENO, Ho muneo ma muhafo kau ma Ho mufetin kau, ma Hom tuntaku kau meki Ho kuasat ma au is ma be'u natuin Ho taos Ho mo'et.

³⁷Hom panat kau he nati' kais anheke nan kau ma au ka uspae ma ka bel it fa.

³⁸Au li'u au musu ma au is ma be'u sin, ma au ka aen uskotu fa talantia sin namle'u.

³⁹Au eson sin talantia sin kan fen anteni fa, sin anbel ma kan mu'i fa nenuf anbi au haek.

⁴⁰Hom fe kau be'it ma matani he maken ma manua, ma Hom fe neu kau lasi mnisat neu au musu-musu sin.

⁴¹Hom tao ma mo'e au musu sin talantia sin naen na'ko kau; ma atoni-atoni le anunto'an neu kau au ule'un sin.

⁴²Sin anhunun ma ankoa, mes katit fa esle' hen bab ma antuntaku sin, sin anbai neu UISNENO, mes In ka natae fa sin.

⁴³Au uskuku sin onle afu skuku le nasan'on, ma au pik ma na'ko sin onle homa anbi lanan.

⁴⁴Ho mufetin kau na'ko to amle'ut, ma Ho mo'e kau uplenat ale uf-uf; to le au ka uhin fa sin anfani au ate sin.

⁴⁵Atoni-atoni anao amnemat sin naluli ma nabes neu kau, ma sin natuin leka sin anen au plenat.

⁴⁶Sin be'in sin matanin namneku nalalien; sin namtau ma anlilitai ma anpoi na'ko sin kot.

⁴⁷UISNENO nane amonit! Pules ma liatas neu au apesit ma aninit! Mituna ma milatan Uisneno, au afe aomina!

⁴⁸In anfe kau lasi mnisat neu au musu sin, In nis ma anbe'u uf-uf anbi au humak ma au matak,

⁴⁹In nafetin kau na'ko au musu sin le anlaban kau. Koi UISNENO, Hom fe lasi mnisat neu kau talantia au is ma be'u au musu sin, Ho muneo ma muhafo kau na'ko atoni amaufinut ma abulalut sin.

⁵⁰Es nane te au utuna ma ulatan Ko anbi ale uf-uf, ma au aiti sit pules neu Ko.

⁵¹Uisneno anfe lasi mnisat anae le'uf neu kesel le In anbeti ma naki'ab In nek ma namnau piut atoni le In anbeti nani, esle' Nai Daud ma in sufan sin talantia nabal-bal.