Read Uab Meto 2 SAMUEL 24 Bible Online

2 SAMUEL 24 - Uab Meto bible

2 SAMUEL 24

¹UISNENO nato'an anteni Israel, oke te nak neu Nai Daud he nasanut mafena neu to. UISNENO nakua a'an neune nak, “Amso'i ho to nai anbi Israel ma Yehuda.”

²Oke te Nai Daud nak neu in solalus nakaf amnanut nak, “Amnao nai mok ale ho solalus nakaf sin neu ale uf Israel anbi pah Israel ok-oke hem so'i ale to in amfaun. Au lomi he uhin to in amfaun ok-oke.”

³Mes Nai Yoab nak neu kesel nak, “So nati' Usi ho UISNENO ansato to Israel anten-teni antia natun mese na'ko sin amfauken neno i, ma so nati' Usi ho fe amoni fe he nati' ho mit sin. Mes neu sa ka au Usi hom lomi hem so'i smanaf i?”

⁴Mes kesel nahel neu in aplenat nane. Es nane te Nai Yoab nok ale in solalus nakaf sin anfen ma anao hen so'i to Israel.

⁵Leka in anlak nalali Noe Yordan, Nai Yoab nok in amnokten sin nahakeb sin um-ume anbi Aroer bian a'ne'u, kot mese anbi anonof atnanan anbi pah Gad. Na'ko nane sin anfen ma anao neu Yaezer bian a'li,

⁶oke te anao piut neu Gilead ma neu Kades anbi pah atoni Het. Nalali te sin anfen ma anao neu Dan, oke te na'ko Dan sin anao bian a'li, neu Sidon.

⁷Na'ko bale nane sin anfen ma anao neu Tirus bian a'ne'u kot mabaki lape nane. Oke te sin anao neu ale kot atoni Hewi ma atoni Kanaan, ma nalali te sin anao neu Bersyeba anbi Yehuda bian a'ne'u.

⁸Sin anfun ma natef pah ok-oke anbi funan sio ma neno bo'nua. Oke onane te sin anfani nem neu Yerusalem,

⁹ma natonan kesel neu lasi so'i smanaf nane. Atoni le nabe'i hen tam makenat amfaun atoni 800.000 anbi Israel ma atoni Yehuda amfaun 500.000.

¹⁰Mes leka Nai Daud anso'i nalali to nane ok-oke, in naben nasanab, oke te in nak neu UISNENO nak, “Koi UISNENO, au usanab anae le'uf! Amsako kau fa au sanat sin, natuin au taos ma au mo'et nane lasi mono anae le'uf kun.”

¹¹UISNENO nakua a'an neu Mafefa Knino Nai Gad le anfani amneki hanaf neu Nai Daud ma UISNENO nak, “Amnao nai ma mutonan Nai Daud mak Au fe neune lasi nono tenu he nati' in anbeti. Sa' le es in anbeti of Au unaoba ani.” Noka fa onane te, leka Nai Daud anfen na'ko tupas.

¹³Nai Gad nem neu kesel ma naton neune UISNENO In aplenat nane, nak, “Usi ho hem beti lasi me: Amnahas nem neu pah i ton tenu in a'lon, ai Usi ho maen natuin musu anli'u ko piut-piut funan tenu in a'lon, ai menas amle'ut nem neu pah i neno tenu in a'lon? Mufek nai anbi neno le i sa' le au mes he utiaba neu UISNENO.”

¹⁴Nai Daud natae nak, “Koi! Namneo au umle'u! Na'ko atoni pah pinan es hen fe kau kasat, leko nesi hit al-al kit UISNENO ankas kit oke, natuin In manekan anae le'uf kun.”

¹⁵Es nane te UISNENO nasanut menas amle'ut nem neu atoni Israel ok-oke na'ko nok-noka talantia tabu le UISNENO natetab nalali. Atoni 70.000 anmate anbi Israel ok-oke.

¹⁶Ahake UISNENO le neki lasi maten nane nem antia nalali ume teli ane kase Nai Arauna, atoni Yebus nane ini. Leka UISNENO nit nak ahake nane nabalab nalali he nale'un Yerusalem, UISNENO nabaina In lasi tfeka nane, ma In nasnas na'ko ankas to nane. In nakua In a'an neu ahake nane nak, “Namautu nai! Musnas nai!”

¹⁷Nai Daud in nit ahake le fe namate to nane oke te in nak neu UISNENO nak, “Au es usanab natuin au es anmo'e lasi sanat nane. Mes to asusal nane sin nasanab sa' ka? Amkas neu kau ma au ume nanan sin!”

¹⁸Anbi neno nane amsa Nai Gad in nem neu Nai Daud ma nak neune nak, “So nati' Usi hom sae meu Nai Arauna in bale teli ane kase, ma muhakeb baki tulu neu UISNENO.”

¹⁹Es nane te Nai Daud in anfen ma anao matom nok UISNENO In aplenat le nataiba nalali neu in anao nok Nai Gad.

²⁰Anbi tabu nane amsa Nai Arauna fe ankiso neki ansanu, ma in nit kesel nok in amnokten sin nem neu in. Nai Arauna in anli'tu naluli ma nabes anbi Nai Daud in human ma in matan,

²¹ma in natoti nak, “Nansa' es Usi ho aum neu kau ka?” Nai Daud natae nak, “Au he sos an ho bale teli ane kase i, natuin au he uhakeb baki tulu neu UISNENO anbi bale i, he nati' menas amle'ut i in nannas.”

²²Nai Arauna natae nak, “Usi ho maiti bale nane, ma mutulu neu UISNENO sa' le Usi ho mutenab leko. Ale bijae i sin amsa neu fua tulu mnotu ma neu hau hopit Usi hom pake bijae i sin hau nobi ma ale a'bena teli ane kase.”

²³Nai Arauna in anfe ale nane ok-oke neu kesel, ma in nak, “So nati' Usi ho UISNENO ansimo Usi ho fua tulu.”

²⁴Mes kesel natae nak, “Kaisa! Au lomi he sos ale sa'-sa' nane ok-oke. Au ka lomi fa he utulu neu au UISNENO sa'-sa' le au upeni nok lum-luman.” Oke te Nai Daud in ansos bale teli ane kase nane ma ale in bijae nane neki noni muti bo'nim.

²⁵Oke te Nai Daud nahakeb baki tulu anbi bale nane neu UISNENO ma natulu fua tulu mnotu ma tulu lasi halan. UISNENO ansimo Nai Daud in onen totis, oke te menas amle'ut nane nasnas anbi Israel.