Read Uab Meto 2 SAMUEL 4 Bible Online

2 SAMUEL 4 - Uab Meto bible

2 SAMUEL 4

¹Nai Saul ume nanan bian es Nai Mefiboset, Nai Yonatan anmone. In anse'al fe in ton nim, anbi neno Nai Saul ma Nai Yonatan anmate. Natuin leka sin nen hanaf neu Nai Saul ma Nai Yonatan anmate sin nem na'ko kot Yizreel, Nai Mefiboset in ain pafa naskau in ma oke te sin naenan; mes natuin bife nane naen nok manapat aseke, li'ana nane anmofu talantia anfani hae se'al. Leka Nai Isyboset Nai Saul anmone in nen nak namate nalali Nai Abner anbi Hebron, in nekan namneku, ma to Israel ok-oke namtau ma anlilitai. Nai Isyboset anmu'i nakaf makenat nua le anfani nakaf amakenat anbi makenat; es in kanan Nai Baana ma es te anteni kanan Nai Rekhab. Nai Rimon anhenu na'ko Beerot na'ko uf Benyamin. (Beerot antam pah Benyamin. Kuatuafen sin naen nalali neu Gitaim ma sin natua anbi nane.)

⁵Nakaf amakenat nua en nane, esle' Nai Rekhab ma Nai Baana sin anfen ma anao neu Nai Isyboset fe nasnasbon anbi neno namtetu.

⁶Bife apao ume fe ansesa ai anleuk leka in fe nakmeu ane kase, oke te in antup. Es nane te Nai Rekhab ma Nai Baana anhaitnok ma antam.

⁷Sin antam anfin antia ke'an tupa le fe Nai Isyboset antup anbine oke te sin napau in talantia anmate. Sin anketu nan in anakan ma sin neki anao. Fai teme mese sin anao nok Anonof Yordan.

⁸Nalali te sin nana'at Nai Isyboset in anakan neu Nai Daud anbi Hebron ma sin nak, “Nai Isyboset, Nai Saul anmone, Usi ho musu le nami lanan he namate Usi in anakan es i. Neno i UISNENO anseunbanin Nai Saul in ume nanan sin mo'et neu Usi.”

⁹Mes Nai Daud natae nak, “UISNENO amonit, le nafetin nalali kau na'ko ale amle'ut, In nahin nak lasi sa' le au uton le i namneo kun.

¹⁰Leka au bi Ziglak ma amnemat nem ma naton kau neu Nai Saul nasaebon, in natenab nak in neki lasi alekot. Mes au heke in ma au umate ulali in.

¹¹Mes au lasi kasat mafena nesi anteni neu amaufinut le namate nalali atoni le ka nasanab fa ma le fe in antup anbi in ume nanan! Neno i au toti seunbanit neu lasi matan nane, ma au uneku ki na'ko pah pinan!”

¹²Oke te Nai Daud anfe plenat neu in amnokten he namate Nai Rekhab ma Nai Baana. Leka namate nalali sin, oke te in anketu nan sin nimken ma sin haeken ma naboni sin anhaumak nifu. Mes Nai Isyboset in anakan nane sin naiti ma ansub anbi kot nane amsa anbi Nai Abner in naukel nanan.