Read Uab Meto 2 SAMUEL 5 Bible Online

2 SAMUEL 5 - Uab Meto bible

2 SAMUEL 5

¹Oke onane te ale mnasi uf-uf Israel ok-oke sin nem neu Nai Daud anbi Hebron ma sin nak neune nak, “Hai le i nuif ma nesaf mese mok ko Usi.

²Na'ko ahunut, afi fe Nai Saul naplenat kai, Usi ho amsa es amna' to meo Israel anbi makenat ma manuat nanan, ma UISNENO In es neknon kun nahakeb fef bela neu ko Usi nak Usi ho es of mutuku In to ma amfani kesel neu sin.”

³Nai Daud anmo'e fef bela nok mnasi-mnasi Israel nane, oke te sin naki'ab in anfani Kesel Israel.

⁴Nai Daud in ton bo'tenu anbi tabu in anfani kesel, ma in naplenat nan ton, bo'ha in a'lon.

⁵Anbi Hebron in naplenat Yehuda ton hitu ma funan ne in a'lon, ma anbi Yerusalem in naplenat Israel ma Yehuda ok-oke ton bo'tenu am tenu.

⁶Anbi neno mese Kesel Nai Daud ma in amnokten anfen ma anao he nape' Yerusalem. Atoni Yebus kot nane tuaken, sin natenab nak Nai Daud of ka nis ma anbe'u fa Yerusalem. Es nane te sin nak neune nak, “Ho of ka nabe'i fa hem tam aum anbi i; atoni-atoni matfolo ma atoni-atoni hae se'al sin nabe'i anli'u naaenab ko.”

⁷Nai Daud nak neu in amnokten nak, “Anmu'i anbi i ka atoni le kan lomi fa atoni Yebus onle au ka lomi fa sin ka? Sin kan lomi fa sin talantia sin amlomi he namate sin ka? Kalu onane, amtam mituin lan oe ma mipe' ma amken atoni-atoni hae se'al ma matfolo le au ka lomi fa sin le nane.” (Es nane te amnakat nak, “Atoni matfolo ma atoni hae se'al ka nabe'i fa hen tam neu Ume UISNENO.”) Nai Daud in nis ma anbe'u ma antet nan Sion kot mabaki lape nane ma antoko natua nani. In nakanab kot nane nak, “Nai Daud in Kot”. In nafena kot nane mabaki lape anfun am natef, na'ko neno saen tubu le namnanub nani neki afu.

¹⁰Nai Daud in anfonat ma anao mat piut nabe'i ma anmatani piut, natuin UISNENO, Akuasat Afin-finit anbab in.

¹¹Kesel Hiram na'ko pah Tirus ansonu in haefen neu Nai Daud, ma neki hau aijob Libanon ma ale apakae hau he nahakeb Nai Daud in sonaf.

¹²Es nane te Nai Daud in nahin nak UISNENO naki'ab nalali in on Kesel Israel, ma namepan in aplenat neu UISNENO In to.

¹³Leka Nai Daud natnani na'ko Hebron anao neu Yerusalem, in anmafe anteni bife fauk-fauk anfani in fenai ma in naiti bife fauk-fauk anfani in fenai kliko sin; ma in napeni an'atoni ma an'bife namfau.

¹⁴In anmone le nahonis sin anbi Yerusalem esle': Nai Syamua, Nai Sobab, Nai Natan, Nai Salomo,

¹⁵Nai Yibhar, Nai Elisua, Nai Nefeg, Nai Yafia,

¹⁶Nai Elisama, Nai Elyada ma Nai Elifelet.

¹⁷Leka atoni Israel sin nen nak nasaeb nalali Nai Daud anfani Kesel Israel, sin nem hen heke in. Mes Nai Daud in nen lasi nane, oke te in anao ma antam neu kot mabaki lape nanan.

¹⁸Atoni Filistin sin nem antia Anonof Refaim ma antoko anbi nane.

¹⁹Nai Daud natoti UISNENO nak, “Au mes he nao ka he laban atoni Filistin nane ka? Ho of amfe neu kau lasi mnisat ka?” “Amlaban sin nai!” UISNENO natae onane, “Au of a'fe neu ko lasi mnisat!”

²⁰Nalali te Nai Daud in anao neu Baal-Perasim ma anbi nane in nis ma anbe'u to meo pukan Filistin sin. Oke te in nak, “UISNENO nale'un nalali au musu sin bale makenat, onle noe sako ansako neki ale sa'-sa' anbi smela mese.” Es nane te bale nane antek nak Baal-Perasim.

²¹To meo pukan Filistin nane sin naen ma kan mu'i fa sona he neki ale sin le'u mahuma. Nai Daud in amnokten sin naiti ale le'u mahuma nane.

²²Ma ka lo fa onane te atoni Filistin sin nem anteni ma antoko natau nan Anonof Refaim.

²³Hae mese anteni Nai Daud antoti lekat lulut na'ko UISNENO. UISNENO natae nak, “Kais amlaban sin na'ko i, mes hom nao amfun sin mupe' ma amken sin na'ko kotin, anhaumak ale hau murbei.

²⁴Leka hom nen aslutuf on atoni anao naketbon anbi hau nane sin tunken, hom nao mat nai, natuin Au of anao uhunun ko he nati' ho mis ma ambe'u to meo Filistin nane.”

²⁵Nai Daud nanaoba ale sa' le UISNENO anfe plenat neune, ma in nis ma anbe'u anli'u na'aenab atoni Filistin na'ko Geba antia Gezer.