Read Uab Meto 2 SAMUEL 7 Bible Online

2 SAMUEL 7 - Uab Meto bible

2 SAMUEL 7

¹UISNENO naneo ma nahafo Kesel Nai Daud talantia in natua nabalah nok alekot anbi in sonaf.

²Ma kesel nakua a'an neu Mafefa Knino Nai Natan nak, “Hom kiso, au utua a'bi sonaf le anmo'e na'ko hau aijob Libanon, ma Peti Fef Bela Uisneno nabela in anbi um-ume nanan!”

³Nai Natan natae nak, “Munaoba Usi ho tenab, natuin UISNENO anbab au Usi ko.”

⁴Mes anbi fai nane UISNENO nakua a'an neu Nai Natan nak,

⁵“Hom nao nai ma mutiaba Au a'ak i neu Au ate Nai Daud mak, ‘Ho he muhakeb ume neu kau onme.

⁶Na'ko afi Au ufetin nonot Israel na'ko Mesir talantia neno i, Au fe ka utua it fa anbi ume mese in nanan, so mak Au fun pah ma utua anbi um-ume mese.

⁷Afi fe Au fun pah ok nonot Israel, Au fe ka utoti it fa mnasi-mnasi le Au beti ulali sin, nansa' es hi ka mihakeb fa ume na'ko hau aijob Libanon neu Kau.’

⁸Es nane te, Natan, mutonan Au ate Nai Daud, mak Au, UISNENO Akuasat Afin-finit, ukua Au a'ak neune nak, ‘Au aiti ulali ko na'ko ho mepu mutuku bibi kase anbi mnela ma Au aiti ko amfani kesel neu Au to Israel.

⁹Au ok ulali ko neu ho hem nao meu me amsa, ma ale ho musu Au ule'un ulali sin anbi neno ho maken ma manua. Au of anmo'e ho kanan mateka onle ale anaet anesit anbi pah pinan.

¹⁰Ma oke anteni te, neu Au nonot Israel Au uloitan ulali bale ma Au lelu sin nabalah anbi nane, he nati' sin anmoni nok amlilat, ma katit fa es he na'aunu sin anteni. Na'ko afi sin nem neu bale i, ma Au aiti anaet-anaet neu sin, atoni-atoni amaufinut nape' ma anken sin, mes lasi nane of kan bol anteni fa. Au uhakeb ulali lasi fef bela nak ho of amtainine na'ko ale musu, ma Au of a'fe neu ko sufa ka'uf.

¹²Ma, leka ho tias namsopu, ma ansub ko anbi ho amfen sin naukel, es na'ko ho anmone sin of Au aiti ma anfani kesel. In es of nahakeb Ume neu Kau. In aplenat Au of u'kiab ani ma es na'ko ho sufam of naplenat on kesel talantia nabal-bal.

¹⁴Au of a'fani Amaf neu in, ma in of anfani Au anmone. Leka kalu in anmo'e sanat, Au of a'fe kasat neune on Amaf mese le nanoina in anah.

¹⁵Mes Au of anmo'e alekot piut neune matom nok Au lasi fef bela. Au lasi fef bela neune Au of ana' nabalah, ka on fa le Au mo'e ulali neu Nai Saul le Au utnanib in na'ko toko plenat he nati' nabe'i ho amfani kesel.

¹⁶Sufa ma ka'uf of ho mu'i piut, ma Au of anmo'e ho plenat anhake nabalah antia nabal-bal. Ma es na'ko ho sufam of naplenat on kesel talantia nabal-bal.’ ”

¹⁷Oke te Nai Natan natonan Nai Daud ale lasi le Uisneno naton nani neune.

¹⁸Oke te Kesel Nai Daud antam neu Um-ume UISNENO. In antoko ma an onen toti nak, “Koi UISNENO Anesit Afinit, au ma au ume nanan sin hai kam tam fa ota hem simo ale ho lasi alekot le Ho mo'e mulali neu kau talantia neno i.

¹⁹Fun Ho mo'e anesi na'ko ale lasi nane, koi UISNENO Anesit Afinit; Ho muhakeb mulali lasi fef bela neu au sufa ka'uf sin neu neno amnemat. Ma Ho mulile ma muton mulali lasi nane neu kau, maski au al on atoni pah pinan kau, koi UISNENO Anesit Afinit!

²⁰Sa' anteni ka le nabe'i au he utiaba neu Ko ka? Ho muhin ale lasi nane ok-oke antom ho ate kau le i.

²¹Natuin Ho lasi fef bela ma natuin Ho lomim alekot kun Ho mo'e ale lasi alekot anaek nane neu he munoina Ho ate kau le i.

²²Koi UISNENO, Ho lo anae le'uf Ko kun! Ala Ho mese kum es Uisneno, katit fa esle' he namnes nok Ko. Hai mihin lasi nane natuin naton nalali neu kai na'ko afi neno ahunut.

²³Anbi pah pinan ok-oke katit fa uf mese on Israel. Al kun Israel uf le Ho mufetin mulali hen fani Ho to mabeti kun. Ale lasi anaek ma sanmakat le Ho mo'e neu sin, anmo'e Ho kanam mateka anbi pah pinan ok-oke. Uf-uf bian nok ale sin uisneno teta Hom li'u mulali sin anbi neno Ho to mabeti anao mat hen maken ma anmanua.

²⁴Nonot Israel Ho mo'e mulali sin anfani Ho to mabeti kun talantia nabal-bal, ma Ho koi UISNENO, Hom fani Uisneno neu sin.

²⁵Ma neno i, koi UISNENO, so nati' Hom lomi he muhelan Ho fef bela antia nabal-bal antom au aok ma au ume nanan sin. So nati' Hom lomi he munaoba lasi sa' le Hom ba'an mulali.

²⁶Anbi me-me atoni of natuna nalatan Ho kanam piut-piut ma nak, ‘UISNENO Akuasat Afin-finit In kun Uisneno neu Israel.’ Ma onane te es na'ko au ume nanan of naplenat on kesel neu nonot i talan te nabal-bal.

²⁷Koi UISNENO Akuasat Afin-finit! Au uhelnok ma usaeba onen totis i neu Ko, natuin Ho es meknom muton neu kau mak ale au sufa ka'uf sin anbi au ume nanan Ho mo'e sin anfani kesel neu nonot i.

²⁸Koi UISNENO Anesit Afinit, Ho Uisneno; ale Ho lasi fef bela Ho munokab sin, ma lasi alekot nane Hom ba'an mulali neu kau.

²⁹Es nane te au toti, so nati' Hom fe tetus neu au ume nanan sin he nati' talan te nabal-bal sin annaben Ho manekam piut. Koi UISNENO Anesit Afinit, ale lasi nane Hom ba'an mulali neu kau, onane te au ume nanan sin of Hom fe neu sin tetus piut talan te nabal-bal.”