Read Uab Meto 2 SAMUEL 8 Bible Online

2 SAMUEL 8 - Uab Meto bible

2 SAMUEL 8

¹Namuni na'ko nane te Kesel Nai Daud nape' ma anken atoni Filistin anteni. In nis ma anbe'u sin ma antet nan sin pah.

²Nai Daud amsa in nis ma anbe'u atoni Moab. Nai Daud anlelu sin antupan anbi afu, oke te in namate atoni nua na'ko atoni tenu. Es nane te, atoni Moab nausi neu Nai Daud ma anbaen noni poni neu in.

³Onane amsa Nai Daud in nis ma anbe'u Kesel Nai Hadadezer Nai Rehob anmone le naplenat anbi Zoba, pah mese anhaumak Damsyik. Anbi neno nane Nai Hadadezer anfun ma anon in pah he nahelan in aplenat neu pah anhaumak Noe Efrat anakan.

⁴Nai Daud anheke nan to meo asae bikase atoni 1.700 ma to meo anao haet atoni 20.000. In nafek ale bikase ahel aklet haeken, al nahena bian, aklet makenat natun mese.

⁵Atoni Siria na'ko Damsyik sin ansonu to meo hen bab Kesel Nai Hadadezer. Mes Nai Daud in nis ma anbe'u sin ma namate atoni 22.000 na'ko sin.

⁶Nalali te Nai Daud nahakeb um-ume to meo anbi sin pah, ma sin nausi neu Nai Daud ma anbaen noni poni neu in. UISNENO anfe mnisat neu Nai Daud anbi bale me amsa le in anmaken.

⁷Suni mnatu-suni mnatu le Nai Hadadezer in to meo sin anpake anbi makenat Nai Daud nasik nan sin ma neki sin neu Yerusalem.

⁸Nai Daud naiti neki niti molo amfau le'uf amsa na'ko Betah ma Berotai, kot-kot le afi Nai Hadadezer naplenat sin.

⁹Kesel Nai Tou na'ko Hamat in nen nak Nai Daud nis ma anbe'u nalali to meo Nai Hadadezer ok-oke.

¹⁰Onane te in ansonu in anmone Nai Yoram he natiaba lasi aomina neu Kesel Nai Daud ma antek alekot neu Nai Daud natuin in lasi nisat nane, fun Nai Hadadezer afi anmaken piut-piut nok Nai Tou. Nai Yoram nem neu Nai Daud neki atnatas amfau le'uf na'ko noni mnatu, noni muti ma niti molo.

¹¹Kesel Nai Daud natulu ale atnatas nane neu UISNENO he nati' anpake sin anbi lasi luli besa. Onane amsa in natulu nani ale bale noni mnatu ma noni muti le in nasik nani sin na'ko Nai Hadadezer ma uf-uf bian le in nis ma anbe'u sin, esle' uf Edom, Moab, Amon, Filistin ma Amalek.

¹³Nai Daud kanan mateka nesi anteni leka in anfani nem na'ko namate atoni Edom 18.000 anbi Nonof Min mali.

¹⁴In nahakeb um-ume to meo anbi Edom ok-oke, ma atoni Edom nane ok-oke nausi neu in. UISNENO anfe lasi mnisat neu Nai Daud anbi bale me le in anmaken anbine.

¹⁵Onle nane Nai Daud naplenat Israel ok-oke ma anpanat he nati' anmo'e lasi amneot ma alekot neu in to piut-piut.

¹⁶Anaet-anaet amnanut le Nai Daud naiti sin esle': Meo pa'e nakaf makenat: Nai Yoab, Zeruya anmone; Lultunis anaet sonaf in nanan: Nai Yosafat Nai Ahilud anmone. Ana' fuat knino-Ana' fuat knino: Nai Zadok Nai Ahitub anmone ma Nai Ahimelekh Nai Abyatar anmone; Lultunis anaek pah in nanan: Seraya.

¹⁸Anakaf apaot neu kesel in aon: Nai Benaya Nai Yoyada anmone. Ana' fuat knino-Ana' fuat knino anbi sonaf in nanan: Nai Daud in anmone sin.