Read Uab Meto 1 RAJA-RAJA 1 Bible Online

1 RAJA-RAJA 1 - Uab Meto bible

1 RAJA-RAJA 1

¹Fun Kesel Nai Daud in namnasi anae le'ufen. Maski nak ankub in neki tainusat mafaun, in anmainiki piut.

²Onane te ale in ameput sin nak neune nak, “Usi Apinat, leko nesi hai mami li'feto munif aotemef mese he natua nok ko Usi ma anpaloli ko Usi. In of antup nok ko Usi he nati' Usi hom naben maputu.”

³Oke te sin nami li'feto munif aotemef mese le namas kun anbi Israel ok-oke. Ma sin napeni li'feto munif aotemef mese le amasat kun in kanan bi Abisag na'ko Sunem. Sin neki in nem neu kesel, oke te in anpao kesel ma anpaloli in. Mes kesel kau mo'efa taos aof mese nok in.

⁴

⁵Natuin Nai Absalom anmate nalalien, onane te Nai Adonia, Nai Daud anmone le natuin Nai Absalom in es anfani anmone anaet. In ainaf kanan bi Hagit. Nai Adonia atoni amasat mese. In amaf ka nato'an nit fa in leka in anmo'e sanat. Nai Adonia in ansinmak anae le'uf hen fani kesel, es nane te in naloitan neu in aon kun aklet makenat fauk-fauk ma solalus asae bikase ma apaot le anpao in aon kun atoni bo'nim.

⁶

⁷Oke te in anao ma namolok Nai Yoab ma Ana' Fuat Knino Nai Abyatar. Nai Yoab in ainaf bi Zeruya. Nai Yoab ma Ana' Fuat Knino Nai Abyatar sin anlomi hen pesi Nai Adonia neu lasi nane.

⁸Mes Ana' Fuat Knino Nai Zadok, Nai Benaya Nai Yoyada anmone, Mafefa Knino Nai Natan, Nai Simei, Nai Rei ma apaot le anpao Nai Daud in aon kun sin kan pesi fa Nai Adonia.

⁹Anbi neno mese fun anbi bale mese le antek nak Fatu Kaun Koko anhaumak oe mata En-Rogel, Nai Adonia natulu fua tulu bibi kase, bijae keso ma bijae tipu le apokat. In anhone Kesel Nai Daud anmone bian sin, ma ameput-ameput anbi sonaf nanan na'ko uf Yehuda neu fesat fua tulu nane.

¹⁰Mes in olif Nai Salomo, ma Mafefa Knino Nai Natan ma Nai Benaya ma apaot le anpao Kesel Nai Daud in aon kun kan hone fa sin.

¹¹Fun Mafefa Knino Nai Natan in anao naeku nok bi Batsyeba, Nai Salomo ainaf, oke te nak neune nak, “Ai Ain Le'u ho fe kam nen fa ka neu Nai Adonia, bi Nai Hagit anmone naiti kun in aon ma anfani kun kesel, mes Kesel Nai Daud in ka nahin fa sa'-sa' neu lasi nane?

¹²Kalu Ain Le'u hom lomi he nati' Nai Salomo ma Ain Le'u he mipeni aomina, au fainek ko

¹³hom nao nai lab-lab he mueku mok Kesel Nai Daud, ma muton neune mak on i: ‘Ai Usi ho ka meknom fa amsub neu kau mak au anmone Nai Salomo es of anfani kesel anseka Usi ko ka? Nansa', neno i Nai Adonia es anfani kesel?’ ”

¹⁴Nai Natan in nak anteni nak, “Leka, Ain Le'u fe ho mumolok mok kesel, of au tam he uhelan sa' le Ain Le'u ho mumolok mulali.”

¹⁵Es nane te bi Batsyeba in anao ma naeku nok kesel anbi in ke'an nanan. Kesel anbi tabu le nane in namnasi anae le'ufen, ma bi Abisag, li'feto munif aotemef na'ko Sunem nane, fe antuthae in.

¹⁶Bi Batsyeba anli'tu anbi kesel in human, oke te kesel natoti nak, “Ho hem lomi sa' ka?”

¹⁷Bi Batsyeba natae nak, “Koi Usi Apinat, Usi hom sup mulali neu kau anbi UISNENO, au Usi ho Uisneno, mak au anmone Nai Salomo in es of anfani kesel hen seka au Usi ko.

¹⁸Mes neno i nok Usi ho ka muhin fa, Nai Adonia in anfani nalali kesel.

¹⁹In natulu nalali bibi kase namfau, bijae keso ma bijae tipu le apokat. In anhone nalali amsa neu fesat nane Usi ho anmone sin ma Ana' Fuat Knino Nai Abyatar ma Nai Yoab, Usi ho solalus nakaf amnanut. Mes, in kan hone fa Nai Salomo.

²⁰Koi Usi Apinat, to Israel ok-oke neno i sin anpao lasi tfeka na'ko Usi neu sekau es of anseka ko Usi hen fani kesel.

²¹Kalu Usi ho kam fe fa lasi tfeka nane, lo of namneo leka Usi ho musaebom, au ma au anmone of anmo'e kai on a'aneb.”

²²Leka bi Batsyeba fe in namolok, Mafefa Knino Nai Natan in nem antia anbi sonaf.

²³Oke te sin natonan kesel neu Nai Natan in nem. Bi Batsyeba anpoi, ma Nai Natan antam, oke te in anli'tu anbi kesel in human.

²⁴Nai Natan in nauab nak, “Koi Usi Apinat, ai Usi ho muton mulali neu to neu Nai Adonia of anseka ko Usi ma anfani kesel?

²⁵Neno i amsa in natulu nalali bibi kase namfau, bijae keso ma bijae tipu le apokat. Usi ho anmone sin in anhone sin. Onane amsa Usi ho solalus nakaf amnanut, ma Ana' Fuat Knino Nai Abyatar. Neno i sin fe anfesat nok in ma sin anhunun ma ankoa nak, ‘So nati' amoni Kesel Nai Adonia!’

²⁶Mes, in kan hone kau fa. Ana' Fuat Knino Nai Zadok ma Nai Benaya ma Nai Salomo amsa.

²⁷Ai Usi ho es amlelu in hen mo'e ale lasi i, ma ho ka mutonan fa ale ho ameput sin neu sekau es of anseka ko Usi?”

²⁸Kesel Nai Daud nak, “Mo'en bi Batsyeba nai.” Mafefa Knino Nai Natan anpoi ma bi Batsyeba antam anfani naeku nok kesel.

²⁹Oke te Kesel nak neune nak, “Namneo au manba'an ulali neu ko, anbi UISNENO In kanan, Uisneno Israel, neu Nai Salomo ho anmone in es of anseka kau anfani kesel. Nah, neno i au manba'an neu ko anbi UISNENO amonit, le In nafetin nalali kau na'ko ale au susal mafena sin, nak anbi neno i amsa au of unokab au lasi manba'an neu ko.”

³⁰

³¹Ma bi Batsyeba anli'tu naluli ma nabes ma in nak, “So nati' ho moni nai Kesel Apinat talantia nabal-bal!”

³²Oke te Kesel Nai Daud anlelu ma no'en Nai Zadok, Nai Natan ma Nai Benaya. Leka sin nem antia,

³³kesel nakua a'an neu sin nak, “Hi mo'en ale au solalus nakaf sin ma amnao nai meu Nai Salomo au anmone. Misaeba in neu au bikase luke mnanu, ma meki in neu oe mata Gihon.

³⁴Anbi bale nane Nai Zadok ma Nai Natan mes hi miki'ab in hen fani Kesel Israel. Oke onane te hi mes amfu to'is ma amhunun ma amkoa mak, “So nati' amoni Kesel Nai Salomo!’

³⁵Nalali te hi mauban in amfani aim meu i he in antunon anbi au toko mnatu, natuin au es a'beti ulali in hen fani kesel anseka kau he naplenat Israel ma Yehuda.”

³⁶“Leko, koi Usi Apinat,” Nai Benaya in natae, “so nati' UISNENO, au Usi ko ho Uisneno, In nahelan au Usi ho plenat nane.

³⁷Fun onle UISNENO In nok nalali ko Usi, so nati' In amsa In nok Nai Salomo. So nati' UISNENO anmo'e in aplenat anaek anesin Usi ho plenat.”

³⁸Oke te Nai Zadok, Nai Natan, Nai Benaya ma apaot le anpao kesel in aon sin anhone Nai Salomo ansae neu kesel in bikase luke mnanu, oke te sin nauban in anao neu oe mata Gihon.

³⁹Nalali te Nai Zadok in naiti mina bub fua mina in balan le in neki nani na'ko Um-ume UISNENO, oke te in naki'ab Nai Salomo anpake mina bub fua mina nane. Ma sin anfu to'is ma to le sin nok anbi nane sin anhunun ma ankoa nak, “So nati' Kesel Nai Salomo amoni nai!”

⁴⁰Nalali te sin al-al sin nauban in ma sin anfani ma sin anhunun ma ankoa ma sin nabae bobi, talantia nain on hen pe' natuin lasi amlilat ma am oket nane.

⁴¹Nai Adonia nok in-ini sin le in anhone sin fe sin anfesat nalali, sin nen lasi amlilat am oket nane. Leka Nai Yoab in nen to'is hanan, onane te in natoti nak, “Lasi sa' ka es anbol anbi kot nanan talantia amlilat ma am oket anae le'uf?”

⁴²Nai Yoab fe ka namolok nalali fa te, nok askeken Nai Yonatan Ana' Fuat Knino Nai Abyatar anmone in nem. Nai Adonia nak, “Aum hem tam.” “Ho atoni alekot ko, es nane te namneo lasi sa' le ho meki nane, lasi alekot kun amsa.”

⁴³Nai Yonatan natae nak, “Kais musesu kau, ka lasi alekot fa.” “Kesel Nai Daud in naiti nalali Nai Salomo anfani kesel!

⁴⁴Nai Zadok, Nai Natan, Nai Benaya ma kesel in apaot neu in aon kun anlelu nalali sin he nauban Nai Salomo. Sin nasaeba nalali in neu kesel in bikase luke mnanu,

⁴⁵ma Nai Zadok nok Nai Natan sin naki'ab nalali in anbi oe mata Gihon. Tabu le sin neki anfani neu kot ma sin anhunun ma ankoa nok amlilat ma am oket, ma kot ok-oke antainun. Nane lasi amlilat ma am oket le lelon hi amnen.

⁴⁶Nai Salomo in anfani nalali kesel anbi neno i.

⁴⁷Ma ale solalus nakaf na'ko kesel sin anao nalali neu Kesel Nai Daud he natiaba lasi aomina neune. Sin nak, ‘So nati' Uisneno Usi ho anmone Nai Salomo makana ma mateka anesin ko; so nati' Nai Salomo in aplenat anaek anesin Usi ho aplenat.’ Nalali te anbi in bale tupa, Kesel Nai Daud naluli ma nabes neu Uisneno,

⁴⁸ma in onen toti nak, ‘Pules maliatas neu Ko, koi UISNENO, le nonot Israel naluli ma nabes Ko. Neno i es na'ko au ume nanan Ho maiti mulali in anfani kesel anseka kau. Ma Ho amkolan kau he fe au moni he ai it eki au matak neu lasi nane!’ ”

⁴⁹Nai Adonia in-ini sin le in anhone sin namtau, talantia sin anhake oke te sin anao, mese-mese anao natuin in lanan kun.

⁵⁰Nai Adonia in namtausan Nai Salomo anae le'uf kun, talantia in naen neu Um-ume UISNENO ma in ana' sunaf-sunaf baki tulu anbi nane.

⁵¹Ma sin natonan Nai Salomo lasi nane. Sin naton nak natuin Nai Adonia in namtausan Nai Salomo anae le'uf, es nane te in anao nalali neu baki tulu ma in ana' sunaf-sunaf baki tulu nane ma in nak, “Au of ka nao u'ko fa bale i nahun na'ko Nai Salomo fe kan sup fa neu kau nak in of ka namate kau fa.”

⁵²Nai Salomo natae nak, “Kalu in anmo'e alekot, of kan fe neune fa kasat an-ana mese amsa, mes kalu in anmo'e amle'ut, mes he namate in.”

⁵³Oke te kesel anlelu atoni anao ma neki Nai Adonia na'ko baki tulu nane. Nai Adonia in nem neu kesel, ma anli'tu ma naluli nabes anbi kesel in human in matan. Oke te kesel nakua a'an neune nak, “Ho nabe'i amfani nai!”