Read Uab Meto 1 RAJA-RAJA 10 Bible Online

1 RAJA-RAJA 10 - Uab Meto bible

1 RAJA-RAJA 10

¹Usif fenai na'ko pah Syeba in nen beno antom Nai Salomo neu in kanan mateka kun. Es nane te in nem neu Yerusalem hen su' Nai Salomo neki han totis le matain le'uf kun.

²In nem nok amnokat le amfau le'uf ma in neki bikase paha snaen le nasaeba atu fomeni le anae le'uf. Leka in naeku ma natef nok Nai Salomo, usif fenai nane in nauab ma natiaba neu Nai Salomo ale han totis le in natenab nani.

³Ale han totis nane Nai Salomo in natae sin ok-oke, katit fa es amsa le he mafena neu Nai Salomo.

⁴Usif fenai nane in neknon ansaksi kun neu Nai Salomo in mahin le'uf kun. In nit sonaf le Nai Salomo nahakeb nani,

⁵ma ale mepu na'ko ale in ameput-ameput sin anbi in sonaf, ma ale pake le papmese kun na'ko in ameput-ameput sin ma ale in ume sin. In nit ale bukae ma mninut le naloitan ma nabalab sin, ma taos mo'et na'ko ale in atuthaes sin leka sin antuthae anbi fesat, ma ale tulu tnatas le Nai Salomo natulu anbi Ume UISNENO. Ale lasi i ok-oke antao ma anmo'e usif fenai na'ko pah Syeba nane ansanmak ma nekan namneku nunfin.

⁶Oke te in nak neu Kesel Nai Salomo nak, “Ale sa' le au nen anbi au pah antom ko Usif ma Usif ho mahinem, lo namneo kun kesel.

⁷Afi au ka uteb fa, mes leka au aum ma saksi ale lasi nane eki au matak, oke te au uteb ani. Namneo-namneo ale sa' le au nen au it nane fe ka lasi aon bian fa amsa. Namneo ho mahinem ma Usif ho mu'im in anesi anae le'uf kun na'ko sa' le naton neu kau.

⁸Ale Usif ho fenai-fenai sin namneo-namneo sin ua alekot kun! Ma ua alekot neu ale ho Usif ameput sin le anmepu piut neu Usif ko natuin sin napeni noina mahine na'ko ko!

⁹Pules maliatas neu UISNENO, Usif ho Uisneno! Nok In naiti ko hom fani Kesel Israel, UISNENO In nalile nak In anmalin anae le'uf neu Usif ko. In nek ma namnau Israel piut ka nas-nas nit fa ma ka natfek nit fa; es nane te In naiti ko hom fani kesel neu sin, he nati' Usif ho mumepan lasi plenat ma lasi amneot ma amnonot.”

¹⁰Nalali te usif fenai pah Syeba nane in anfe ale sa'-sa' le in neki neu Nai Salomo, mnatu anesi na'ko kilo 4.000 ma ale fatu maupa amfau le'uf ma ale atu fomeni. Nai Salomo in kan simo anteni fa atu fomeni le amfaune onle usif fenai pah Syeba anfe nani neune. (

¹¹Ale abnao Nai Hiram le neki mnatu na'ko Ofir neu Nai Salomo, sin neki amsa fatu maupa amfau le'uf ma hau meni.

¹²Nai Salomo anpake ale hau meni nane anbi eno kiso Ume UISNENO ma anbi kesel sonaf; ma in anpake amsa hen mo'e biola ma a'heo neu asit sin. Ale hau meni nane hau meni alekot anesit le neki antam neu Israel; katit fa es anteni le he nit hau meni alekot onane.)

¹³Nai Salomo in anfe neu usif fenai pah Syeba nane sa' le in antak hen fe neu sekau le nem neu in, mes in anfe neune amsa ale sa' le in antoti. Nalali te usif fenai pah Syeba nane in neki anfani kun neu in pah nok ale in amnokten.

¹⁴Anbi ton mese Kesel Nai Salomo in ansimo mnatu ala kle'ot antia kilo 23.000,

¹⁵fe kan so'i fa ale mnisa anbi sosa, ma noni poni na'ko ale atoni asosa, kesel-kesel Arab ale kumlol Israel.

¹⁶Nai Salomo in anmo'e ben besi tika anaek 200 na'ko mnatu le antutu sin. Mnatu le in anpake neu ben besi tika nane mese te mnatu anesi na'ko kilo hitu.

¹⁷In anmo'e amsa ben besi tika mnatu 300 le nabau. Mnatu le in anpake neu ben besi tika abaut nane oni mnatu kilo nua, ok-oke mnatu le antutu sin. Ale ben besi tika nane in antao sin anbi ume le antek nak Ume Naek Nasi Libanon.

¹⁸In anmo'e amsa toko plenat anaek mese le an amu neki sikal ma anpake noas nani neki mnatu knino.

¹⁹Toko nane manima, ma anbi aon bian am bian anmu'i meo asu malunat. Ma anbi toko nane in kotin anmu'i bijae nakaf malunat. Toko nane amsa anmu'i elak a'teli ana' ne.

²⁰Ma anbi elak a'teli ana' nane tunan a'li ma a'ne'u anmu'i meo asu malunat ok-oke bo'es am nua. Katit fa toko plenat onle nane anbi plenat me amsa.

²¹Ale bale mninut Nai Salomo anmo'e sin na'ko mnatu, ma ale bale anbi Ume Naek Nasi Libanon amsa anmo'e sin na'ko mnatu knino. Katit fa le hen mo'e na'ko noni muti, natuin anbi batan Nai Salomo atoni ankiso noni muti ka maupa fa.

²²Nai Salomo anmu'i abnao naek namfau le anlak tasi bua-bua nok ale abnao Kesel Nai Hiram. Fun hae tenu anbi ton mese ale abnao nane anfani nem ma neki mnatu, noni muti, sikal, belo ai kelo ma kolo sasi amasat.

²³Kesel Nai Salomo in anmu'i anesi kun ma ahinet anesi kun na'ko ale kesel me amsa anbi pah pinan.

²⁴Ale atoni anbi pah pinan ok-oke sin nami lanan he naeku ma natef nok Nai Salomo he nen ma natnin noina mahine le Uisneno anfe neune.

²⁵Mese-mese sin nem neki tnatas neu Nai Salomo. Sin anfe ale bale noni muti, mnatu, bale pake, bale manuat, atu fomeni, bikase ma bikase luke mnanu. Onle nane ton anseka ton.

²⁶Nai Salomo nahakeb pukan makenat le in amfaun sin nane aklet makenat 1.400 ma solalus asae bikase 12.000. In antao bian anbi Yerusalem ma nesin in antao sin anbi kot bian.

²⁷Anbi batan Nai Salomo in aplenat, noni muti nathoe anbi Yerusalem onle fatu, ma hau aijob Libanon namfau anes-nesi onle hau bubuk.

²⁸Nanete natuin kesel in asosa ma asau sin, sin neki bikase nem na'ko Mesir ma Kilikia,

²⁹ma ale aklet makenat sin neki nem na'ko Mesir. Bikase mese in osan noni muti 150, ma aklet makenat mese in osan noni muti 600. Nalali te nanete natuin ale asosa ma asau sin amsa nasosa anteni ale bikase ma ale aklet makenat nane neu kesel-kesel Het ma kesel-kesel Siria.