Read Uab Meto 1 RAJA-RAJA 11 Bible Online

1 RAJA-RAJA 11 - Uab Meto bible

1 RAJA-RAJA 11

¹Kesel Nai Salomo in nek ma namnau nis fenai anao amnemat namfau. Nai Salomo ka al fa nakaton nok anfetnai Kesel Mesir, mes in amsa nakaton nok anfetnai na'ko Het, Moab, Amon, Edom ma Sidon.

²UISNENO anfe nalali plenat nak atoni Israel ka nabe'i fa hen mafe maselo nok uf-uf nane, natuin sin mes antao ma anmo'e atoni Israel naluli ma nabes neu uisneno teta. Maski onane amsa, Nai Salomo in anmafe kun nok ale fenai teta nane.

³Nai Salomo in anmafe nok anfetnai usif 700, ma in fenai kliko sin 300. Ale in fenai nane sin es antao ma anmo'e Nai Salomo talantia in nasaitan Uisneno,

⁴ma leka in namnasi te ale in fenai sin nane sin anfuli nan in ma naluli ma nabes neu uisneno teta. Nai Salomo amaf, Nai Daud, in na'ki neu UISNENO, in Uisneno, mes Nai Salomo ka on fa in amaf.

⁵Nai Salomo naluli ma nabes neu Asytoret, uisneno teta fenai uf Sidon, ma Molok uisneno teta le neki hanisit le uf Amon sin naluli ma nabes neune.

⁶Onle nane Nai Salomo nasanab neu UISNENO. Nai Salomo amaf Nai Daud, natuin UISNENO nok in nekan ok-oke, mes Nai Salomo ka onfa nane.

⁷Anbi tubu tunan neno saen Yerusalem, in nahakeb bale fuat neu Kamos, uisneno teta atoni Moab, ma neu Molok, uisneno teta atoni Amon — sin nua sin uisneno teta manisit.

⁸Nai Salomo nahakeb amsa bale-bale fuat neu ale in fenai na'ko uf ateta he nabe'i sin notu atu fomeni, ma natulu fua tulu neu sin uisneno teta mese-mese.

⁹Hae nua UISNENO, Israel sin Uisneno, nalile In aon neu Nai Salomo ma namnauba in nak ka nabe'i fa he nati' in naluli ma nabes neu uisneno teta, mes Nai Salomo ka natuin fa UISNENO. Mes in nasaitan kun UISNENO, talantia UISNENO nato'an in.

¹¹UISNENO nakua a'an nak, “Fun natuin hom tanhai ho lasi manba'an mok Kau ma ho ka mutuin fa ale Au plenat-plenat sin, es nane te of Au usik an ufani plenat nane na'ko ko, ma Au fe ani neu ho ate ameput mese.

¹²Maski onane, natuin ho amaf Nai Daud, of Au ka tao ma mo'e fa lasi nane anbi tabu ho fe amoni. Mes anbi batan ho anah in aplenat, of Au tao ma mo'e lasi nane.

¹³Mes of Au ka usik ani fa plenat nane na'kone. Natuin Au ate Nai Daud, ma natuin Yerusalem le Au mo'e ulali anfani Au kot nane of Au uhena uf mese neu ho anmone.”

¹⁴UISNENO anmo'e Nai Hadad, kesel Edom in sufan, in namusu nok Kesel Nai Salomo.

¹⁵A'lo fe na'ko nane, leka Kesel Nai Daud in nis ma anbe'u Edom, Nai Yoab nakaf makenat amnanut Kesel Nai Daud, in anao neu Edom hen sub in atoni-atoni le anmate. Funan ne in a'lon in ma in amnokten sin nabalah anbi Edom. Ma anbi tabu nane sin namate ale atoni ok-oke anbi nane.

¹⁷Mes, Nai Hadad le anbi tabu nane in fe munif, in naen neu Mesir nok atoni Edom fauk-fauk, le in amaf ate sin.

¹⁸Sin anfen na'ko Midian, oke te sin anao neu Paran. Anbi bale nane atoni bian fauk-fauk nabua nok sin, oke te sin al-al sin anao neu Mesir ma sin natef nok Kesel Mesir. Kesel nane anfe neu Nai Hadad ume ma nain neu bale he in natua ma anfe haot fatis neu sin.

¹⁹Ma Nai Hadad amsa in anfani sob leko nok kesel, talantia kesel anfe neune in fenai bi Tahpenes olif anfani Nai Hadad in fenai.

²⁰Nalali te Nai Hadad in fenai nane nahonis anmone mese le nakanab Nai Genubat. Li'anmone nane Kesel Mesir in fenai ansole ma natua anbi sonaf nok kesel in naimnuke sin.

²¹Leka Nai Hadad in nen nak Kesel Nai Daud nasaebonen, ma Nai Yoab nakaf makenat amnanut Israel anmate nalali amsa, Nai Hadad nak neu Kesel Mesir nak, “Mufetin kau he au fani eu au pah.”

²²“Nansa'?” kesel natoti, “Ai hom labu' sa' ka anbi i, talantia ho hem fani meu ho pah?” “Au ka labu' fa sa'-sa',” onane Nai Hadad natae, “mes mufetin kau he au nao.” Esnane te in anfani kun neu in pah.

²³Uisneno antao ma anmo'e Nai Rezon amsa, Nai Elyada anmone, anmamusu nok Nai Salomo. Nai Rezon nane Kesel Nai Hadadezer na'ko Zoba in ate le afi in naen na'ko in usin.

²⁴Kesel Nai Daud afi in nis ma anbe'u Nai Hadadezer le i ma namate Nai Hadadezer in sob leko sin na'ko Siria. Anbi tabu nane Nai Rezon in naen na'ko Nai Hadadezer ma nabuab atoni-atoni le nok in oke te in anfani nakaf neu buat amaufinut nane. In ma in amnokten sin anao neu Damsyik oke te sin natua anbi kot nane. Anbi nane sin naiti in anfani kesel Siria.

²⁵Onle Nai Hadad, Kesel Nai Rezon amsa namusu nok Israel anbi tabu Nai Salomo fe anmoni, ma anmo'e taisibu anbi pah nane.

²⁶Atoni bian le naiti nakan ma anlaban Nai Salomo esle' in ameput mese in kanan Nai Yerobeam. Nai Yerobeam Nai Nebat anmone na'ko Zereda anbi Efraim. In ainaf bife banu mese, kanan bi Zerua.

²⁷Nu'un neu lasi Nai Yerobeam anmalaban on i. Leka fe anae nain anbi Ume UISNENO aon bian a'ne'u, ma naleko baki lape kot nane,

²⁸Nai Yerobeam amsa in nok anmepu anbi nane. Leka Nai Salomo in nit nak Nai Yerobeam nane atoni ameput alekot ma ahinet Nai Salomo anfe neune lasi sutais hen panat mepu maseke anbi pah uf Manasye ma Efraim.

²⁹Anbi neno mese Nai Yerobeam anpoi na'ko Yerusalem. Anbi lanan atnanan anbi mnela Mafefa knino Nai Ahia na'ko Silo nem neune le anbi tabu nane in anpake sobalu betkone fe'u mese.

³⁰Oke te Nai Ahia naini in sobalu betkone, ma anpisu anfani pisa bo'es am nua.

³¹Oke te in nak neu Nai Yerobeam nak, “Ho maiti pisa bo'mese neu ko, natuin UISNENO, Israel sin Uisneno, nakua a'an neu ko nak on i, ‘Of Au usik ani plenat i na'ko Nai Salomo, ma Au fe ko uf bo'mese neu ko.

³²Uf mese es of nabalah neu Nai Salomo, natuin Au ate Nai Daud, ma natuin Yerusalem, le Au beti ulali na'ko pah Israel ok-oke anfani Au kot.

³³Of Au tao ma mo'e lasi nane natuin Nai Salomo in nasaitan nalali Kau ma naluli nabes neu uisneno teta, esle': Asytoret, uisneno teta fenai uf Sidon; Kamos, uisneno teta uf Moab; ma Milkom, uisneno teta uf Amon. Nai Salomo ka natuin fa Au lomik. In ka onfa in amaf Nai Daud le natuin Kau ma nanaoba Au plenat-plenat sin.

³⁴Maski onane of Au ka aiti ani fa plenat nane ok-oke na'ko Nai Salomo. Of Au ufetin in he in naplenat leka fe in anmoni. Lasi nane Au tao ma mo'e natuin Au ate Nai Daud, le Au beti ulali ma le in natuin ale Au plenat sin ma Au lekat lulut sin.

³⁵Plenat i of Au aiti ani na'ko Nai Salomo in anmone ma uf bo'mese of Au fe ani sin neu ko.

³⁶Mes uf mese of Au fe ani neune, he nati' es na'ko Au ate Nai Daud sufan le in naplenat piut neu Kau anbi Yerusalem, kot le Au beti ulali on bale luli besa neu Kau.

³⁷Ma ho, Yerobeam, of Au aiti ko amfani Kesel Israel ma Au lomi ho muplenat ale pah le hom lomi.

³⁸Kalu ho on Au ate Nai Daud, ho mutuin Kau nok ho nekam ok-oke ma ho moni mutuin Au plenat-plenat sin, ma hom halin Au nekak nok hom tao mutuin ale sa' le Au uplenat neu ko, of Au ok ko piut. Of Au aiti ko amfani kesel anbi Israel. Of Au uteta ho sufam of anfani Kesel Israel anseka ko, papmese onle Au mo'e ulali neu Nai Daud.

³⁹Natuin Nai Salomo nasanab, of Au fe lasi kasat neu Nai Daud in sufan, mes ka talantia fa nabal-bal.’ ”

⁴⁰Leka Nai Salomo in nen lasi nane, in nami lanan he namate Nai Yerobeam. Mes Nai Yerobeam in naen neu Kesel Nai Sisak, anbi Mesir, ma namaika anbi nane talantia Nai Salomo in nasaebon.

⁴¹Lasi bian antom Nai Salomo, neu ale sa' le in anmepu nalali ma neu in hinen, antui nalali anbi Sulat le Antui Nai Salomo in Monin.

⁴²Nai Salomo in ana' aplenat ton bo'ha in a'lon anbi Yerusalem neu Israel ok-oke.

⁴³Namuni te Nai Salomo in nasaebon ma anpafa in anbi Nai Daud in Kot. Oke te Nai Rehabeam anfani kesel anseka in amaf Nai Salomo.