Read Uab Meto 1 RAJA-RAJA 14 Bible Online

1 RAJA-RAJA 14 - Uab Meto bible

1 RAJA-RAJA 14

¹Anbi tabu nane Nai Yerobeam in anmone Nai Abia anmofu menas.

²Nai Yerobeam nak neu in fenai nak, “Muloitan ma mubalab nai he hom nao meu Silo meu Mafefa Knino Nai Ahia in ume le afi in nak neu kau nak of au fani Kesel Israel. Mes nati' hoom senuom he nati' es kais nahin ko nak ho sekau ko.

³Meki utunu' pisa bo'mese neu in, kokis akle'o ma oni hau botol mese. Mutoti in sa' ka es of anbol neu hit anmone Nai Abia. Mafefa knino nane of naton nani neu ko.”

⁴Ma Nai Yerobeam in fenai anao neu Mafefa Knino Nai Ahia in ume anbi Silo. Mafefa knino nane in ka nit fa anteni natuin in namnasi anmate.

⁵Mes UISNENO naton neune nak Nai Yerobeam in fenai nem neune he natoti in antom in anmone menas. Ma UISNENO amsa naton neu Mafefa Knino Nai Ahia neu sa' le mes in he naton nani neune. Leka Nai Yerobeam in fenai nem antia bale nane, in amoe'son on fenai bian kun.

⁶Mes leka Mafefa Knino Nai Ahia in nen in haen asme'un anlak eno, in nauab nak, “Amtam aum nai, au uhin ho Nai Yerobeam in fenai ko. Kais ho moe'som. Anmu'i lasi le'uf antom ko.

⁷Amfani nai ma mutonan ho mone Nai Yerobeam mak le i lasi le UISNENO Israel, naton neu kit nak, ‘Au beti ulali ko na'ko ale Au to ma amfani kesel neu au to Israel.

⁸Au fe ulali ko plenat le Au usik ani na'ko Nai Daud sufan. Mes ho ka onfa Au ate Nai Daud. In na'ki namneo neu Kau ma natuin ale Au plenat sin. In anmo'e sa' le Au lomi.

⁹Mes ho mo'e lasi amle'ut le anae le'uf kun anesi na'ko sin le ana' aplenat nahunun ko. Ho musaitan Kau ma mufena Au to'as natuin ho mo'e ale uisneno teta ma ale le'u mahuma na'ko noni molo ma mululi mubes neune.

¹⁰Es nane te of Au usanut amle'ut nem neu ho ume nanan. Ale anmone na'ko ho sufam sin, sin a'tokon nane he sa' am sa' ka, of namate nani sin. Of Au uneku ani ho ume, nanan onle atoni anpik ma ansako nani ma'lafu.

¹¹Ho ume nanan sin le anmate anbi kot of asu neku nani sin, ma le anmate anbi kot in kotin of kolo neku nani sin. Mumnau, Au UISNENO es ukua Au a'ak!’ ”

¹²Ma Mafefa Knino Nai Ahia nauab anteni neu Nai Yerobeam in fenai nak, “Nah, amfani nai esle' i. Anbi tabu ho amtam meu kot, ho anmone nane of anmate.

¹³To Israel ok-oke of sin ankae ma ankul ma ansub nani in. In le nane anmes kun na'ko Nai Yerobeam in ume nanan sin le of ansub in neki lasi tola, natuin ala in anmes kun in amonin es anmatom nok UISNENO, Israel sin Uisneno, In alomin.

¹⁴UISNENO of anfe kesel mese neu Israel le of nasopu toko plenat na'ko Nai Yerobeam sufan on kesel. In neno nem antia nalali. Naubon na'ko neno i

¹⁵UISNENO of anfe kasat neu Israel talantia of in na'beko on tefu masaf anbi oe in nanan. UISNENO of anbok to Israel na'ko pah alekot i le In anfe nalali neu sin amaf sin. In of nasitab ma nasana sin neu Noe Efrat aon bian natuin sin nafena In to'as natuin sin anmo'e uisneno teta Fenai Asyera.

¹⁶UISNENO of nasaitan Israel natuin Nai Yerobeam in nasanab nalali talantia anhel atoni Israel ma sin nasanab amsa.”

¹⁷Oke onane te Nai Yerobeam in fenai anfen ma anao neu Tirza. Anbi tabu in antam neu in ume, in anah amsa anmate.

¹⁸To Israel sin ankae ma ankul oke te sin ansub in onle UISNENO naton nalali nanete natuin In ate, Mafefa Knino Nai Ahia.

¹⁹Lasi nu'un bian antom Kesel Nai Yerobeam, esle' in aplenat ma makenat le in nanaoba nalali, antui nalali sin anbi Sulat Anaof na'ko ale Kesel Israel.

²⁰Ton bo'nua am nua in a'lon Nai Yerobeam in naplenat on kesel, nalali te in nasaebon ma ansub in. In anmone kanan Nai Nadab anseka in on kesel.

²¹Leka Nai Rehabeam, Nai Salomo anmone, anfani Kesel Yehuda, in uan to bo'ha mese. In naplenat ton bo'es amhitu anbi Yerusalem. Na'ko Israel ok-oke kot nane UISNENO anbeti ma nateta nani on bale luli besa neu In. Nai Rehabeam in ainaf bi Naama na'ko uf Amon.

²²Uf Yehuda sin anmo'e lasi amle'ut anbi UISNENO In matan. Sin taos ma sin mo'et nafena UISNENO In to'as anfini nesi na'ko sin amaf sin taos sin mo'et.

²³Anbi neten-neten sin tunan ma anbi hau naek sin ukenu, sin nahakeb ale bale luli besa neu uisneno teta, ma nahakeb hau le'u ma fatu le'u ma le'u mahuma Fenai Asyera he naluli ma nabes neu sin.

²⁴Anbi bale-bale nane sin antao ma anmo'e lasi koke ma mapaisa on fua tulu neu uisneno teta. Ma atoni mone sin amsa sin nanaoba mepu on akaket ma amapaisa. Atoni Yehuda sin antao ma anmo'e ale taos mo'et amanisit le uf-uf anbi pah nane sin anmo'e le UISNENO anli'u nalali sin anbi tabu atoni Israel antam neu pah nane.

²⁵Anbi tabu ton nim Nai Rehabeam in naplenat, Nai Sisak, Kesel Mesir in nape' ma anken Yerusalem.

²⁶In nasik nani ale bale maupa anbi Ume UISNENO ma anbi kesel sonaf, in naiti amsa ale ben besi tika mnatu a'pao aof le Nai Salomo anmo'e nalali sin.

²⁷Ma Nai Rehabeam anmo'e anseka sin fun in anmo'e ale ben besi tika a'pao aof na'ko niti molo, ma in anfe sin neu ale solalus nakaf le anpao eno baki lape kesel in sonaf.

²⁸Anbi tabu kesel hen tam neu Ume UISNENO, ale apanat ma apaot sin neki ale hen besi tika a'pao aof nane, nalali te antao nafani sin neu apaot sin ke'an.

²⁹Lasi nu'an bian antom Kesel Nai Rehabeam antui nalali sin anbi Sulat Anaof na'ko ale Kesel Yehuda.

³⁰Anbi batan Nai Rehabeam in ana' aplenat, makenat anbol piut anbi Nai Rehabeam ma Nai Yerobeam.

³¹Namuni te Nai Rehabeam in nasaebon ma ansub in anbi kesel sin naukel anbi Nai Daud in Kot. Nai Abiam, in anmone anseka in anfani on kesel.