Read Uab Meto 1 RAJA-RAJA 15 Bible Online

1 RAJA-RAJA 15 - Uab Meto bible

1 RAJA-RAJA 15

¹Anbi tabu ton bo'es amfanu Kesel Nai Yerobeam in naplenat Israel, Nai Abiam in anfani Kesel Yehuda

²ma in naplenat ton tenu anbi Yerusalem. In ainaf bi Maakha, Nai Abisalom in anfetnai.

³Nai Abiam anmo'e ale sanat on in amaf. In ka natnat fa in nekan ok-oke he na'ki neu in UISNENO, ka onfa Nai Daud in am uf nane.

⁴Mes, natuin Kesel Nai Daud, onane te UISNENO, Nai Daud in Uisneno le in naluli ma nabes neune, anfe anmone mese neu Nai Abiam hen seka in ma naplenat anbi Yerusalem ma natau nahelan kot nane.

⁵UISNENO anmo'e lasi nane natuin Nai Daud antao natuin In alomin. Nai Daud in kan tanhai nit fa UISNENO In aplenat sin, so al anbi lasi Nai Uria atoni Het nane.

⁶Lasi makenat anbi Nai Rehabeam ma Nai Yerobeam nane le sin anfatan anbi batan Nai Rehabeam fe anao piut anbi tabu Nai Abiam in naplenat.

⁷Ma lasi bian antom Nai Abiam nane antui nalali sin anbi Sulat Anaof na'ko ale Kesel Yehuda.

⁸Nai Abiam amsa nasaebon ma ansub in anbi Nai Daud in kot. In anmone Nai Asa anfani kesel anseka in.

⁹Anbi tabu ton bo'nua Kesel Nai Yerobeam naplenat anbi Israel, Nai Asa anfani kesel anbi Yehuda.

¹⁰In naplenat ton bo'ha mese in a'lon anbi Yerusalem. In baif es bi Maakha, Nai Abisalom in anfetnai.

¹¹In on Nai Daud, in na'if mahoni nane, Nai Asa anhalin UISNENO In nekan.

¹²Ale anmo'e lasi kake ma amapaisa le anmepu anbi bale-bale luli besa neu uisneno teta in naneku nani sin, ma ale hau le'u ma fatu le'u le kesel naplenat nahunun in le sin nahakeb nalali sin in naneku nani sin na'ko pah ok-oke.

¹³In baif, bi Maakha, in nasanut nani na'ko in atokon on Ain le'u, natuin in anmo'e hau le'u ma fatu le'u le neki lasi kake ma mapaisa neu Asyera, uisneno teta fenai amliat nane. Nai Asa natseleb nale'un ale hau le'u ma fatu le'u nane ma in notu nani sin anbi Anonof Kidron.

¹⁴Maski ale bale luli besa neu hau le'u ma fatu le'u Nai Asa ka nale'un naskuku nani fa sin ok-oke, mes in nekan na'ki piut neu UISNENO anbi in monin ok-oke.

¹⁵Ale noni mnatu ma noni muti le in amaf natulu neu UISNENO, in neki sin neu Ume UISNENO, onane amsa noni mnatu ma noni muti, in-ini sin in natulu nani sin.

¹⁶Anbi batan Kesel Nai Asa in naplenat na'ko Yehuda ma Kesel Nai Baesa na'ko Israel anmu'i makenat piut anbi kesel nua en nane.

¹⁷Nai Baesa in nape' ma anken Yehuda ma namepan kot Rama neu hen ek lanan he na'oni ma antam neu Yehuda.

¹⁸Es nane te Kesel Nai Asa in naiti ale noni mnatu ma noni muti le fe anbi Ume UISNENO ma kesel sonaf oke te in ansonu sin neu Damsyik neu Nai Benhadad kesel Siria, Nai Tabrimon anmone, Nai Hezion in upuf. Ale bale nane in ansonu sin nanete natuin in ameput-ameput sin anbi sonaf nanan, neki uab a'at i,

¹⁹“Aum he hit taiti lasi mafutus sob leko, onle afi hit amnasi sin anmo'e nalali. Nanete natuin haefen le i au sonu noni mnatu ma noni muti neu ko on atnatas, ma au toti ko he ho mufek ho lasi malutas mok Nai Baesa Kesel Israel, he nati' in anhel nafani in solalus sin na'ko au pah.”

²⁰Nai Benhadad in anlomi natuin lasi totis nane oke te in ansonu ale in solalus nakaf sin nok sin solalus sin ma sin anao ma nape' ma anken kot-kot Israel. Sin nis ma anbe'u Iyon, Dan, Abel-Bet-Maakha ma Kinerot anhaumak Nifu Galilea ma pah Naftali ok-oke.

²¹Leka Nai Baesa in nen lasi nane, in nasnas na'ko makenat nahelan Rama. In anao neu Tirza ma in nasnas akle'o na'ko lasi makenat.

²²Oke onane te, Kesel Nai Asa, anlenu ale to ok-oke anbi Yehuda ka namaika fa es amsa he naiti ale fatu ma hau le Nai Baesa anpake anbi Rama neu he nahelan kot nane. Ale fatu ma hau nane Nai Asa anpake sin hen mepu nahelan kot Mizpa ma Geba, kot mese anbi pah Benyamin.

²³Lasi nu'un bian antom Kesel Nai Asa, in on atoni meo pa'e ma kot-kot le in nahelan sin, antui nalali sin anbi Sulat Anaof na'ko ale Kesel Yehuda. Anbi neno in namnasi Nai Asa napeni menas anbi in haen nua sin.

²⁴In nasaebon ma ansub in anbi naukel ale kesel anbi Nai Daud in kot. In anmone Nai Yosafat, anfani kesel anseka in.

²⁵Anbi ton nua Kesel Nai Asa naplenat anbi Yehuda, Nai Nadab Nai Yerobeam anmone anfani kesel anbi Israel ma in naplenat ton nua in a'lon.

²⁶Papmese onle in amaf le afi in naplenat nahunu, in amsa anmo'e lasi amle'ut anbi UISNENO In matan talantia anmo'e atoni Israel sin anmo'e sanat amsa.

²⁷Nai Baesa, Nai Ahia anmone, na'ko uf Isakhar anmalokin lasi ma anlaban Nai Nadab, oke te namate in. Anbi tabu nane Nai Nadab nok in solalus sin fe sin niusnan kot Gibeton anbi pah Filistin.

²⁸Lasi nane anbol anbi tabu Kesel Nai Asa naplenat Yehuda nan ton tenu. Onle nane Nai Baesa anfani Kesel Israel anseka Nai Nadab.

²⁹Leka Nai Baesa in anfani kesel, in namate Nai Yerobeam in ume nanan sin ok-oke. Anmatom nok sa' le afi UISNENO naton nalali nanete natuin In ate, Mafefa Knino Nai Ahia na'ko Silo, es nane te Nai Yerobeam in ume nanan sin ok-oke namate sin, katit fa esle' he nafetnon.

³⁰Nai Yerobeam anmo'e sanat ma nok nane te in anmo'e atoni Israel sin nasanab amsa. Nok nane te Nai Yerobeam nafena UISNENO In to'as, Uisneno le to Israel naluli ma nabes neune.

³¹Lasi nu'un bian antom Nai Nadab nane antui nalali anbi Sulat Anaof na'ko ale Kesel Israel.

³²Anbi batan Kesel Nai Baesa na'ko Israel in naplenat, makenat anbol piut anbi Nai Baesa ma Kesel Nai Asa na'ko Yehuda.

³³Anbi ton tenu Kesel Nai Asa naplenat anbi Yehuda, Nai Baesa Nai Ahia anmone anfani kesel anbi Israel ok-oke. In naplenat anbi Tirza nan ton bo'nua am ha in a'lon.

³⁴Papmese on Kesel Nai Yerobeam le naplenat nahunu, Kesel Nai Baesa amsa anmo'e sanat neu UISNENO ma nok nane te in anmo'e atoni Israel sin anmo'e sanat amsa.