Read Uab Meto 1 RAJA-RAJA 16 Bible Online

1 RAJA-RAJA 16 - Uab Meto bible

1 RAJA-RAJA 16

¹Es nane te UISNENO nakua a'an neu Mafefa Knino Nai Yehu Nai Hanani anmone In nak, “Mutiaba Au a'ak i neu Nai Baesa mak,

²‘Afi ahunut nane ho ka sa'-sa' ko fa, mes Au aiti ko ma amfani kesel neu Au to Israel. Mes ho musanab on Nai Yerobeam ma ho mo'e Au to Israel nasanab, talantia nafena Au to'as.

³Es nane te of Au uneku ani ko ma ho ume nanan sin papmese onle Au mo'e ulali neu Nai Yerobeam.

⁴Ho ini sin anbi ho ume nanan le anmate anbi kot asu of neku nani sin, ma sin le anmate anbi kot kotin kolo of neku nani sin.’ ”

⁵Mafefa Knino Nai Yehu natiaba nani UISNENO In a'an neu Nai Baesa ma in ume nanan sin natuin Nai Baesa anmo'e nalali lasi amle'ut anbi UISNENO In human In matan, ma nafena UISNENO In to'as, ka al fa natuin in namate nalali Nai Yerobeam in ume nanan sin ok-oke. Lasi nu'un bian antom Nai Baesa, antui nalali sin anbi Sulat Anaof na'ko ale Kesel Israel. Nai Baesa in nasaebon oke te ansub in anbi Tirza. In anmone Nai Ela, anseka in amaf Nai Baesa anfani kesel.

⁸Anbi ton bo'nua am ha Kesel Nai Asa naplenat anbi Yehuda, Nai Ela Nai Baesa anmone anfani kesel anbi Israel anbi Tirza nan ton nua in a'lon.

⁹Nai Zimri, solalus nakaf mese le anfani nakaf neu aklet makenat pukan mese, sin anmalokin lasi ma anlaban Nai Ela. Anbi neno mese anbi Tirza, Nai Ela in ninu tua mafu talantia anmafu anmate anbi Nai Arza in ume, nakaf ume toko kesel sonaf nanan.

¹⁰Oke te Nai Zimri antam ma namate Nai Ela, nalali te in anfani kesel anseka Nai Ela. Lasi nane anbol anbi ton bo'nua am hitu leka Kesel Nai Asa naplenat Yehuda.

¹¹Leka Nai Zimri in anfani kesel, in namate Kesel Nai Baesa in ume nanan sin ok-oke. Ma ale Nai Baesa in biafen anmone sin ma sin biafen sin ume nanan sin amsa katit fa es le he nafetnon.

¹²Anmatom nok lasi le UISNENO natiaba nani neu Nai Baesa nanete natuin Mafefa Knino Nai Yehu, Nai Baesa in ume nanan sin ok-oke namate nani sin.

¹³Nai Baesa ma in anmone, Nai Ela, sin naluli nabes neu ale uisneno teta ma nok nane te sin anmo'e nonot Israel sin anmo'e sanat. Es nane te sin nafena UISNENO In to'as, Uisneno le mes nonot Israel he naluli ma nabes neune.

¹⁴Lasi nu'un bian antom Nai Ela antui nalali sin anbi Sulat Anaof na'ko ale Kesel Israel.

¹⁵Anbi ton bo'nua am hitu Kesel Nai Asa naplenat anbi Yehuda, Nai Zimri anfani Kesel Israel ma in naplenat anbi Tirza neno hitu. Anbi tabu nane solalus Israel fe sin aniusnan Gibeton, kot atoni Filistin.

¹⁶Leka sin nen nak Nai Zimri anmalokin lasi ma anlaban kesel ma namate nalali in, anbi neno nane amsa anbi sin um-ume nane, sin al-al sin naiti Nai Omri, sin nakaf amakenat, anfani on Kesel Israel.

¹⁷Oke te Nai Omri ma in solalus sin nasaitan Gibeton ma sin anao nape' ma anken Tirza.

¹⁸Leka Nai Zimri in nit nak kot nane sin nasik nan nalali, in antam neu sonaf nanan ma notu nani sonaf nane bua-bua nok in aon, ma in anmate kun amsa.

¹⁹Lasi nane anbol natuin in anmo'e lasi amle'ut anbi UISNENO In human ma In matan. Papmese on Kesel Nai Yerobeam, Nai Zimri amsa anmo'e sanat neu UISNENO, ma in anhel nonot Israel anmo'e sanat amsa.

²⁰Lasi nu'un bian antom Nai Zimri, ma malokin lasi le in anmo'e nane, antui nalali sin anbi Sulat Anaof na'ko ale Kesel Israel.

²¹Uf Israel anpe' ma anbation pa' nua natuin to bian anlomi he naiti Nai Tibni Nai Ginat anmone hen fani kesel, mes to bian amsa anlomi Nai Omri hen fani kesel.

²²Namuni te to le anpesi Nai Omri sin nis. Nai Tibni anmate ma Nai Omri anfani kesel.

²³Lasi nane anbol anbi ton bo'tenu mese anbi tabu Kesel Nai Asa in naplenat anbi Yehuda. Nai Omri naplenat on kesel anbi Israel ton bo'es am nua. Anbi ton ne ahunut in naplenat anbi Tirza.

²⁴Mes namuni te in ansos nan nu'af mese in osan noni muti 6.000 na'ko atoni mese in kanan Nai Semer. Oke te in nahakeb kot mese anbi nu'af nane ma in nakanab Samaria, natuin Nai Semer kanan, nu'af tuaf in kanan.

²⁵Nai Omri antao ma anmo'e sanat-sanat amle'ut le anae le'uf anesi na'ko kesel-kesel le naplenat nahunun in le sin anmo'e.

²⁶On Nai Yerobeam, Nai Omri anmo'e sanat, ma anmo'e to Israel anmo'e sanat amsa ma naluli nabes neu uisneno teta. Es onanate sin nafena UISNENO In toas, Uisneno le atoni Israel mes nabes neune.

²⁷Lasi nu'un bian antom Kesel Nai Omri, ma ale sa' le in anmo'e nalali antui nalali sin anbi Sulat Anaof na'ko ale Kesel Israel.

²⁸Leka Nai Omri nasaebon ma ansub in anbi Samaria, in anmone Nai Ahab anfani kesel anseka in.

²⁹Anbi tabu Kesel Nai Asa naplenat anbi Yehuda ton bo'tenu am fanu, Nai Ahab Nai Omri anmone anfani kesel anbi Israel ma in naplenat anbi Samaria ton bo'nua am nua.

³⁰In anmo'e sanat-sanat amle'ut le anae le'uf anbi UISNENO In human In matan anesi na'ko ale kesel le nahunun in.

³¹Fe ka noka fa neune amsa anmoni anbi sanat-sanat amle'ut on Kesel Nai Yerobeam, mes in anmafe anteni bi Izebel on in fenai Kesel Etbaal na'ko Sidon in anfetnai, ma in naluli nabes neu Baal.

³²In nahakeb ume luli besa anbi Samaria neu Baal ma anbi ume luli besa nane in nanan in anmo'e baki fuat mese neu uisneno teta nane.

³³In anmo'e amsa le'u mahuma uisneno teta Fenai Asyera. In anmo'e sanat amle'ut anae le'uf anesi na'ko ale Kesel Israel le naplenat nahunun in. Es onanate sin nafena UISNENO In toas, Uisneno le atoni Israel mes nabes neune.

³⁴Anbi batan Nai Ahab nanaoba plenat, Nai Hiel atoni Betel nahakeb nafani kot Yerikho. Mes onle UISNENO nakua nalali In a'an nahunu na'ko nane nanete natuin Nai Yosua Nai Nun anmone, Nai Hiel naneku in anmone nua: Nai Abiram in anmone nael le anmate leka Nai Hiel nahakeb kot nane a'tu'in, ma Nai Segub in anmone kliko anmate leka Nai Hiel nahakeb eno-eno baki lape kot nane.