Read Uab Meto 1 RAJA-RAJA 17 Bible Online

1 RAJA-RAJA 17 - Uab Meto bible

1 RAJA-RAJA 17

¹Anmu'i mafefa knino mese in kanan Nai Elia. In na'ko Tisbe, kot mese anbi pah Gilead. Anbi neno mese in nem neu Kesel Nai Ahab ma in nak neune nak, “Anbi UISNENO amonit, Uisneno le atoni Israel sin naluli ma nabes neune ma le au tuthae In, au uton neu Usi ko nak anbi ton nua ai ton tenu amnemat le i of katit fa akum ai ulan an-ana mese amsa, so mak kalu au uton ani.”

²Nalali te UISNENO nakua a'an neu Nai Elia nak,

³“Musaitan bale i nai, amnao nai meu neno saen Noe Yordan ma mutolo' anbi nane nai haumak Noe ana' Kerit.

⁴Nabe'i ho minu na'ko noe ana' nane, ma kolo ka' of Au lenu he neki mnahat neu ko.”

⁵Nai Elia natuin UISNENO In aplenat nane, ma in anao neu ana' Noe Kerit oke te in natua anbi nane.

⁶In ninu oe na'ko noe ana' nane, ma in anbukae u tunu ma sisi le kolo ka' nane neki nem neune anbi nok-noka ma anbi neno anmabe.

⁷Ma suk a'lo onane te, noe ana' nane anmeti amsa natuin katit fa ulan.

⁸Oke te UISNENO nakua a'an neu Nai Elia nak,

⁹“Tabu le i mes hom fen ma amnao nai meu kot Sarfat anhaumak Sidon ma mutua anbi nane. Au lelu ulali bife banu mese anbi nane he nati' in anhao ko.”

¹⁰Ma Nai Elia in anao neu Sarfat. Leka in nem antia kot nane in eno, in nit bife banu mese fe in anau hau hopit. Oke te Nai Elia nak neu bife banu nane nak, “Ain, ambab kau fa bati kau fa oe mninu akle'o.”

¹¹Leka bife banu nane fe in anao he naiti oe mninu te, Nai Elia no'en natuin in nak, “Ain, meki kau fa u tunu akle'o amsa.”

¹²Bife banu nane natae nak, “Anbi UISNENO amonit, Uisneno le Ama ho mululi ma mubes neune, au sup ak au ka mu'i fa utunu'. Alaha au mu'i ut nima mese anbi au pika mako, ma mina bub fua mina akle'o anbi au botol. Au fe anau hau hopit he uhan sa' le akle'o nane, he nati' au ma au anah hai nua kai hem bukae. Nane hai bukae amsoput esle' nane; ma oke onane te of haim pao neu he mate.”

¹³Nai Elia natae nak, “Kais mumtau, Ain!” onane Nai Elia nak neune, “So ho mepu nai bukae neu ko ma ho anah. Mes nahunu na'ko nane ho mepu muhunun utunu' ana' mese na'ko ut nane ma mina nane, oke te meki nem neu kau.

¹⁴Natuin UISNENO, le atoni Israel sin naluli ma nabes neune, naton nak pika mako nane of nahenu piut nok ut, ma botol nane of nahenu piut nok mina talantia neno UISNENO ansonu ulan nem neu pah pinan.”

¹⁵Oke te bife banu nane in anao ma anmo'e sa' le Nai Elia naton nalali neune. Ma sin tenu sin anmu'i bukae nanokbon piut antia neno fauk-fauk in a'lon.

¹⁶Ma onle UISNENO naton nalali nanete natuin Nai Elia, pika mako nane nahenu piut nok ut, ma botol nane nahenu piut nok mina.

¹⁷Neno fauk namuni te bife banu nane in anah napeni menas. Menas nane mafena piut talantia li'ana nane namuni te anmate.

¹⁸Oke te bife banu nane nak neu Nai Elia nak, “Ate Uisneno, nansa' Ama ho mo'e lasi i neu kau? Ai Ama ho aum meu i he mo'e Uisneno namnau au sanat sin, talantia au anah mes anmate?”

¹⁹Nai Elia natae nak, “Meki li'ana nane nem neu i.” Oke te Nai Elia naiti li'anmone nane na'ko in ainaf, ma neki neu ke'an fafon, neu ke'an le Nai Elia natua anbine. Nai Elia natupa li'ana nane anbi bale tupa,

²⁰oke te in onen toti nok han anaek nak, “Koi UISNENO, au Uisneno, nansa' Ho musanut amle'ut i neu bife banu i? In anfe kau bale he utua bi in ume ma tabu i Ho mumate in anah!”

²¹Nalali onane te in anbenton neu li'ana nane hae tenu, ma in onen toti nak, “Koi UISNENO, au Uisneno, so nati' Ho amfe li'ana i hen moni anfani!”

²²UISNENO In nen Nai Elia in onen totis, ma li'ana nane in nasnas ma anmoni anfani.

²³Oke te Nai Elia ansanu na'ko in ke'an ma neki li'ana nane nem neu in ma nak, “Ain, ho anah es i Ain! In anmoni anfani!”

²⁴Bife banu nane natae nak, “Namneo-namneo au uhin nak Ama ho ate Uisneno ko ma ho uab ma ho a'at nane lo namneo na'ko kun UISNENO!”