Read Uab Meto 1 RAJA-RAJA 18 Bible Online

1 RAJA-RAJA 18 - Uab Meto bible

1 RAJA-RAJA 18

¹Leka tabu fauk-fauk namuni te, anbi ton tenu fauknais nane, UISNENO nakua a'an neu Nai Elia nak, “Amnao nai mueku ma mutef mok Kesel Nai Ahab, natuin ka lo fa anteni of Au usanut ulan.”

²Onane te Nai Elia in anfen ma anao. Anbi tabu nane amnahas anae le'uf anbi Samaria.

³Es nane te Nai Ahab no'en Nai Obaja he nem neune. (Nai Obaja nane nakaf neu ume toko kesel sonaf nanan. In atoni mese le namneo-namneo naluli nabes neu UISNENO.

⁴Anbi tabu bi Izebel namate ale Mafefa knino UISNENO, Nai Obaja le i anbab Mafefa knino natun mese natuin in natolo' sin anbi nuat in nanan — atoni 50 anbi nuat mese — ma in anfe neu sin mnahat ma mninut.)

⁵Nai Ahab nak neu Nai Obaja nak, “Aum he hit atnono pah i ok-oke ma hit tami oe mata ai noe. Oni of hit tapeni hun ma naba he nati' hit tahoni hit bikase sin ma hit bikase luke mnanu sin, he nati' kais hit tamate mese amsa na'ko hit mu'it sin.”

⁶Leka anbati nalali pah le of sin he nono nane, onane te sin anfen ma anao. Nai Ahab in anao an ali bale mese ma Nai Obaja in anao an ali bale bian.

⁷Anbi lanan atnanan Nai Obaja in natef nok Nai Elia. Leka in ankiso nit Nai Elia, Nai Obaja anli'tu ma natola Nai Elia ma natoti nak, “Namneo ka Ama ho Nai Elia ko ka?”

⁸Nai Elia natae nak, “Namneo, au Nai Elia kau” “Amnao nai esle' i ma mutonan ho kesel mak au es kau i.”

⁹Nai Obaja natae nak, “Au usanab sa' ka talantia Ama ho muna'at kau neu Nai Ahab he namate kau ka?

¹⁰Anbi UISNENO amonit In kanan, Uisneno le Ama ho mululi mubes neune, au uton neu ko nak kesel anlelu kau he ami ko Ama anbi me-me. Leka anbi pah mese in ana' plenat nane nak Ama ho ka es ko fa nane, Nai Ahab naseke he nati' ana' plenat anbi pah nane ansup nak Ama namneo ka natef ko fa anbi nane.

¹¹Ma tabu le i Ama hom lomi he au nao neune ma uton neune ak Ama ho es ko i?

¹²Leka au nao u'ko bale i, Smanan Knino UISNENO oni of neki ko neu bale le au ka uhine fa! Ma kalu au uton neu Nai Ahab ak Ama ho es ko bale i, ma namuni te in ka natef ko fa Ama, namneo in of namate kau. Ho muhin, Ama, au le i namneo-namneo ululi ubes neu UISNENO na'ko fe au an-ana kau!

¹³Ai Ama ho fe kam nen fa nak leka bi Izebel namate UISNENO In Mafefa knino sin, au utolo' 100 na'ko sin anbi nuat in nanan — atoni 50 anbi nuat mese — ma au fe neu sin mnahat ma mninut?

¹⁴Mes tabu le i, nansa' Ama hom lelu kau he nao utonan kesel ak Ama ho es ko bale i? Namneo-namnei in of namate kau!”

¹⁵Nai Elia natae nak, “Anbi UISNENO Akuasat Afin-finit le au tuthae In, au manta'en ak anbi neno i amsa au ekinok of au et he utef ok kesel.”

¹⁶Es nane te Nai Obaja in anao ma naton lasi nane neu kesel, ma Nai Ahab amsa in anfen ma anao he antef nok Nai Elia.

¹⁷Leka Nai Ahab in nit Nai Elia, Nai Ahab ankoa nak, “In esle' i atoni anmo'e taisibu anbi Israel!”

¹⁸“Au ka atoni ataisibu kau fa,” onane Nai Elia natae, “mes Usi ho kum. Usi ma Usi ho ume nanan sin hi es anmo'e taisibu. Natuin hi miluli ma mibes neu uisneno teta Baal, Usi hom tanhai UISNENO In aplenat sin.

¹⁹Tabu le i, amfe plenat nai neu to Israel ok-oke he naeku nok kau anbi Tubu Karmel. Mafefa Knino Baal sin natun ha ma bo'nim ma mafefa knino uisneno teta Fenai Asyera sin natun ha ma bo'nim le bi Izebel anhao ma anfati sin nati' mok sin amsa!”

²⁰Ma Nai Ahab nabuab to ok-oke ma ale Mafefa Knino Baal nane anao neu Tubu Karmel.

²¹Oke te Nai Elia anhaumak to ma nak, “Talantia leka ka hi al-al ki hem nek nua om mibalah ka? Kalu UISNENO nane lo In Uisneno kun, miluli mibes nai neu UISNENO! Kalu Baal nane lo in Uisneno kun, miluli mibes nai neu Baal!” To le nabua anbi nane sin kan suli fa sa'-sa'.

²²Oke te Nai Elia nak, “Anbi UISNENO In mafefa knino sin alaha au mese es ubalah, mes anbi i anmu'i Mafefa Knino Baal 450.

²³Hi meki aim nai esle' i bijae keso nua. Amlelu Mafefa Knino Baal sin nane he sin naiti bijae mese ma anlolo, nalali te anheli oke te antao nani neu hau hopit fafon. Mes ka nabe'i fa he sin napina ai anbi nane. Ma bijae es anteni of au ubalab onane amsa. Of au lolo ma au heli amsa oke te au tao neu hau hopit fafon. Mes au amsa of au ka upina fa ai amsa anbi nane.

²⁴Ma mautu he Mafefa Knino Baal sin nane an onen toti neu sin uisneno teta, ma au amsa of au onen toti neu au UISNENO. Le natae ma ansonu ai nem, In le nane Uisneno kun.” To ok-oke sin al-al sin natae nak, “Haim lomi!”

²⁵Oke te Nai Elia nak neu ale Mafefa Knino Baal nane nak, “Natuin hi mifau, neu him beti mihun bijae mese ma miloitan nai, mes kais mipina ai neu hau sin. Nalali te am onen nai neu hi uisneno teta.”

²⁶Onane te sin anbeti bijae mese ma sin naloitan nani. Nalali te sin onen neu Baal na'ko nok-noka talantia manas namtetu ma sin anbai-anbai nak, “Baal, mutae kai nai!” Sin antao ma anmo'e ma nabso' anfun natef sin baki tulu nane. Mes katitfa es he natae.

²⁷Leka manas namtetu te Nai Elia nasi'u ma nakle'at sin nak, “Amonen toti mihel amteni! In uisneno teta kun, ai? Oni in fe natenab neu am nem, ai oni fe in anao es ke'an a'niu. Ai oni fe in anpoi ma anao! Ai oni in fe antup, ma hi mes he mifena in!”

²⁸Onane te ale Mafefa knino nane sin onen nahel-hel nok anteni. Ma onle sin antak hen tao ma anmo'e, sin anheli sin aoken neki suni ma auni talantia na' ansai.

²⁹Onle nane sin antao ma anmo'e piut-piut talantia neno anmabe on atoni nitu sae. Mes katit fa es he natae sin, ma katit fa es hen kiso sin.

³⁰Oke te Nai Elia nak neu to ok-oke nak, “Aim amhaumak nai anbi i!” Sin al-al sin nabua anfun natef nan in, nalali te in naloitan baki tulu UISNENO le natkua nalali.

³¹In naiti fatu bo'es am nua, fatu mese te anseka uf mese na'ko uf bo'es am neu Nai Yakub in sufan, atoni le afi UISNENO nakanab in Israel.

³²Nok fatu-fatu nane Nai Elia nahakeb baki tulu bale luli besa neu UISNENO. Ma in anhani lolok le anaek anfun natef baki tulu nane talantia nabe'i nalai oe anbine oni liter bo'es am nim.

³³In naloitan hau hopit anbi baki tulu fafon, oke te in anlolo bijae nane ma anheli nalali te antao neu hau hopit fafon. Oke te in nak, “Mitua kusi ha en nane meki oe talantia nahenu, oke te am opan oe nane neu fua tulu ma hau nane sin fafon.” Leka sin anmo'e nalali onane te,

³⁴in nak, “Hae mese anteni,” oke te sin nanaoba anteni. “Hae mese anteni,” onane Nai Elia in nak, ma sin nanaoba anteni amsa.

³⁵Ma oe ansai anfun natef baki tulu nane talantia in lolok nane amsa nahenu nok oe.

³⁶Leka tabu antia he natulu fua tulu anbi neno anmabe, Mafefa Knino Nai Elia anhaumak baki tulu nane oke te in onen toti nak, “Koi UISNENO, le Nai Abraham, Nai Ishak ma Nai Yakub naluli nabes neune, so nati' Ho muton nai anbi neno i nak Ho Uisneno Ko anbi Israel ma Ho ate es kau. Ma muton nai amsa nak ale lasi le au tao ma mo'e le i nane Ho plenat kun.

³⁷Mutae kau, koi UISNENO! Mutae kau he nati' to le i nahin nak Ho, koi UISNENO, nane lo Uisneno kun, ma nak Ho es anmo'e sin hen fani nem neu Ko.”

³⁸Oke te UISNENO ansonu ai na'ko neno tunan nem ma notu nani fua tulu nane ok-oke nok ale hau hopit, in fatu-fatu sin ma nain ma anlami nani oe le anbi lolok nane.

³⁹Anbi tabu to sin nit lasi nane sin anbentok neu nain ma sin nak, “UISNENO, nane lo In Uisneno kun! Namneo UISNENO nane lo In Uisneno kun!”

⁴⁰Es nane te Nai Elia nak neu sin nak, “Amheke ale Mafefa Knino Baal nane nai! Kais mifetin atoni mese amsa he nafetnon!” Oke te sin anheke ale Mafefa Knino Baal nane, nalali te Nai Elia neki sin anao neu Noe Kison ma anbi nane in namate sin ok-oke.

⁴¹Oke onane te Nai Elia nak neu Kesel Nai Ahab nak, “Leko nesi Usi hom koenom nai esle' i he ho ambukae! Ka lo fa anteni ulan of ansanu nem, natuin in aslutun nane au nen ulali.”

⁴²Oke te Nai Ahab in anao ma anbukae, ma Nai Elia in ansae neu Tubu Karmel in tunan. Anbi nane in naluli ma nabes in human antia nain anbi in tunen nua sin atnanken.

⁴³Ma in nak neu in ate nak, “Amsae nai meu tubu tunan ma amkiso ma ali neu tasi.” Ate nane in ansae, oke te in anfani nem ma nak, “Au ka it fa sa'-sa'.” Antia hae hitu Nai Elia anlelu in ate ansae ma ansanu neu hen kiso neu tasi.

⁴⁴Anbi hae hitu te ate nane in anfani nem ma in nak, “Au it nope an-ana mese on nimak nanan ansae nem na'ko tasi.” Ma Nai Elia nak neu in ate nak, “Amnao nei mei Kesel Nai Ahab, he nati' in ansae neu in aklet ma anfani nahunu na'ko ulan kan eka nan fa in.”

⁴⁵Alaha anbi smela mese onane te neno tnanan anope ma anin anaek anfen oke te ulan anaek ansanu nem. Nai Ahab ansae neu in aklet oke te in neki anfani neu Yizreel.

⁴⁶Anbi tabu nane Nai Elia napeni be'it matani na'ko UISNENO. In anli' in sobalu betkone neki ansae ma anfutun neu in atnanan oke te in naen nahunun Nai Ahab anbi lanan piut talantia eno naek kot Yizreel.