Read Uab Meto 1 RAJA-RAJA 2 Bible Online

1 RAJA-RAJA 2 - Uab Meto bible

1 RAJA-RAJA 2

¹Leka anhaumak tabu neu in he nasaebon, Nai Daud no'en Nai Salomo, in anmone, ma anfe neune han ba'an-han ba'an amsoput. Nai Daud nak,

²“Tabu antia neu au he usaebok. So nati' ho nekam na'ki ma amhataniom nai.

³Amtao ma mo'e sa' le ho UISNENO naplenat nani neu ko. Mutuin ale in plenat-plenat sin ma ale In lekat lulut sin le antui nani sin anbi Nai Musa in Sulat, he nati' ho hem nao meu me amsa of ho mis anbi ale ho mepu sin.

⁴Kalu ho mu'ki neu UISNENO, In mes nanokab In lasi manta'en nak ho ume nanan sin of naplenat Israel, alaha nati' nok sin nekan oke ma sin asmanan oke sin na'ki ma natuin piut In plenat-plenat sin.

⁵Anmu'i lasi mese anteni! Namneo ho fe mumnau sa' le Nai Yoab anmo'e nalali neu kau esle' in namate solalus anakaf Israel nua, Nai Abner Nai Ner anmone ma Nai Amasa Nai Yeter anmone. In namate sin anbi neno halan hen seunbanin lasi maten le sin anmo'e anbi neno makenat. In namate atoni le ka nasanab fa mes au es asutai in mo'et ma au es asutai lasi mafena.

⁶Nah, au anmone, ho mes amtao ma mo'e neu in lasi sa' le ho mutenab leko; alaha nati' kais mufetin in hen mate nok lek-leko.

⁷Mes neu Nai Barzilai na'ko Gilead in anmone sin so nati' ho mo'e alekot neu sin. Ho mes ampanat sin amonin neno-neno, natuin sin anmo'e nalali alekot neu kau leka au aen u'ko ho tataf, Nai Absalom.

⁸Neu Nai Simei Nai Gera anmone na'ko kot Bahurim anbi pah Benyamin, anmu'i amsa au han ba'an neu ko. Anbi au lanan au nao eu Mahanaim, Nai Simei nane afi in ansukat kau nok matani. Mes namuni te, leka in nem ma ansenu kau anbi Noe Yordan, au sup neune anbi UISNENO ak au of ka umate fa in.

⁹Mes i au han ba'an neu ko: kais mufetin in he in nafetnon na'ko lasi kasat. Au uhin ho nek mahine ko; es nane te, maski nak in namnasien, mes mami lanan he nati' namate in.”

¹⁰Nalali te Nai Daud nasaebon ma ansub in anbi Kot Nai Daud.

¹¹In anfani Kesel Israel ton bo'ha: ton hitu anbi Hebron, ma ton bo'tenu am tenu anbi Yerusalem.

¹²Nalali te Nai Salomo anfani kesel anseka Nai Daud, in amaf. Nai Salomo in kuasat ma in aplenat on kesel nahel ma namep kun nok matani.

¹³Anbi neno mese, Nai Adonia in anao neu bi Batsyeba. Bi Batsyeba natoti Nai Adonia nak, “Ho aum meu kau le i ho meki lasi alekot ka?” Nai Adonia natae nak, “Namneo.”

¹⁴Oke te in antutan in uab nak, “Anmu'i lasi sa'-sa' esle' au lomi he toti na'ko aina.” Bi Batsyeba natoti nak, “Lasi sa' ka?”

¹⁵Nai Adonia natae nak, “Ain ho muhin nak namneo au mes es he fani kesel, nane Israel ok-oke sin napane ma nafnek onane. Mes le anbol ka onfa nane; au olif es anfani kesel, natuin UISNENO anlomi onane.

¹⁶Tabu le i au mu'i han totis mese, nati' Ain kais hom tite lasi nane.”

¹⁷Bi Batsyeba natoti nak, “Ho hem toti lasi sa' ka?” Nai Adonia natae nak, “Au toti Ain hom toti Kesel Nai Salomo he nafetin kau he au aiti bi Abisag li'feto na'ko Sunem nane hen fani au fenai. Au uhin Nai Salomo of kan tite fa Aina ho han totis nane.”

¹⁸Bi Batsyeba natae nak, “Leko, au simo ho han totis nane.” “Au of umolok lasi nane ok kesel neu ko.”

¹⁹Es nane te bi Batsyeba in anao neu kesel he namolok lasi nane antom Nai Adonia. Kesel anfen ma ansenu in ainaf ma ma nabes neune, oke te antunon anteni anbi in a'toko. Oke te in anlenu atoni he naloitan a'toko anbi in aon bian a'ne'u neu in ainaf.

²⁰Leka in antoko nalali te, bi Bartsyeba nak, “Au lomi he toti lasi an-ana mese na'ko ko. Ain au toti he nati' kais hom tite lasi nane.” Nai Salomo natoti nak, “Lasi sa' ka, Aina?” Of au ka tite fa.”

²¹Bi Batsyeba natae nak, “Mufetin Nai Adonia, ho tataf nane he naiti bi Abisag hen fani in fenai.”

²²“Nansa' Ain hom toti lasi nane neu kau?” Nai Salomo natoti nak, “Lasi nane papmese nok hom toti he nati' au fe toko plenat i neu in. Ai in le nane ka au tata' fa es in ka? Anesi teni te Ana' Fuat Knino Nai Abyatar ma Nai Yoab sin anpesi nalali in!”

²³Leka in nauab nalali onane te Nai Salomo ansup anbi UISNENO ma nak, “So nati' UISNENO In kasat antoman kau, kalu au ka umate fa Nai Adonia natuin in lasi totis nane!

²⁴UISNENO nahelan ma namepan nalali au tokok anbi au ama Nai Daud, in toko plenat. UISNENO nanokab nalali In han manba'an ma In anfe nalali plenat le i neu kau ma au ume nanan sin. Au sup natuin UISNENO amonit nak Nai Adonia of in anmate amsa anbi neno le i!”

²⁵Ma Kesel Nai Salomo anfe plenat neu Nai Benaya, oke te Nai Benaya anao ma namate Nai Adonia.

²⁶Nalali te Kesel Nai Salomo nak neu Ana' Fuat Knino Nai Abyatar nak, “Amnao neu ho kuan anbi Anatot. Namneo-namneo au mes he umate ko, mes neno i au ka umate ko fa, natuin leka ho fe mok au ama, hom naben ale susal mafena mok au ama. Ma ho amsa es ampaloli Peti Fef Bela UISNENO.”

²⁷Oke te Nai Salomo napoitan Nai Abyatar na'ko mepu on Ana' fuat knino. Nok taos mo'et nane sa' le afi UISNENO naton nalali anbi Silo antom Ana' Fuat Knino Nai Eli in ume nanan anbol nalalien.

²⁸Nai Yoab in nen ale lasi le anbol nalali le nane. In namtau natuin in anpesi nalali Nai Adonia. Mes, afi ahunut in kan pesi fa Nai Absalom. Es nane te in naen neu Um-ume UISNENO ma in ana' sunaf-sunaf anbi baki tulu.

²⁹Sin naton lasi nane neu Kesel Nai Salomo. Es nane te kesel anlelu Nai Benaya he namate Nai Yoab.

³⁰Nai Benaya anao neu Um-ume UISNENO ma nak neu Nai Yoab nak, “Kesel anlelu ko he hom poi mu'ko bale nane!” “Kahaf.” Nai Yoab natae nak, “Au he mate a'bi bale i.” Nai Benaya anfani ma naton lasi nane neu kesel.

³¹Leka kesel anen lasi nane in nak, “Amnao nai ma munaoba sa' le in anlomi nane. Mumate in ma amsub in, he nati' au ma au ama ume nanan hai kam sutai amteni fa neu lasi maten le Nai Yoab anmo'e neu neu atoni le ka nasanab fa.

³²UISNENO of anfe neune kasat natuin lasi maten le in anmo'e nalali le au ama ka nahin nok fa lasi nane. Nai Abner solalus nakaf Israel, ma Nai Amasa solalus nakaf Yehuda, sin nua sin ka nasanab fa. Sin naleko nesin Nai Yoab, mes in namate sin.

³³Lasi kasat natuin solalus nakaf nua en nane sin amaten Nai Yoab ma in ume nanan of sin ansutai talantia nabal-bal. Mes au ama in ume nanan ok-oke le anfani kesel, of UISNENO anfe neu sin tetus piut — ma of sin napeni lasi mnisat.”

³⁴Ma Nai Benaya in anao neu Um-ume UISNENO ma namate Nai Yoab anbi bale nane. Oke te ansub Nai Yoab anbi in ume anbi kot kotin.

³⁵Nalali te kesel naiti Nai Benaya anfani solalus nakaf amnanut amakenat anseka Nai Yoab, ma naiti Nai Zadok anfani Ana' fuat knino anseka Nai Abyatar.

³⁶Oke onane te kesel no'en Nai Simei oke te nak neune nak, “Amtao ho ume anbi Yerusalem i. Mutua anbi nane ma kais ampoi mu'ko kot.

³⁷Kalu nabe'i hom poi ma ho amnao amlak amfini Noe ana' Kidron, ho mes namate ko; ma ho es amsutai kun lasi sanat nane.”

³⁸Nai Simei natae nak, “Leko, Usi Apinat.” “Au of utuin Usi ho plenat.” Es nane te Nai Simei in natua anbi Yerusalem tabu fauk-fauk in a'lon.

³⁹Leka ton tenu samsopu onane te lasi mese anbol on i: Ate nua na'ko Nai Simei sin naen neu Gat, neu Kesel Nai Akhis Nai Maakha anmone. Leka natonan Nai Simei neu lasi nane,

⁴⁰in napeni in bikase luke mnanu oke te anao neu Kesel Nai Akhis anbi Gat he nami in ate nua en nane. In napeni sin oke te neki sin anfani nem.

⁴¹Leka Nai Salomo in nen sa' le Nai Simei anmo'e,

⁴²in anlelu no'en Nai Simei oke te nak neune nak, “Au mo'e ulali ko ma ho manta'en neu UISNENO mak ho of ka musaitan fa Yerusalem. Ma au amsa umnauba ulali ko ak leka hom poi mu'ko Yerusalem, ho mes namate ko. Nah, ho manba'an mulali ma hom lomi he mutuin au plenat nane, ai ka?

⁴³Mes nansa' neno i ho musuan ho lasi manba'an nane ma amtanhai au plenat?

⁴⁴Ho muhin lek-leko neu ale ho lasi amle'ut sin le ho mo'e neu au ama. Es nane te UISNENO of anfe kasat neu ko,

⁴⁵mes In of anfe tetus neu kau ma In of nahelan ma namepan au ama In aplenat talantia nabal-bal.”

⁴⁶Leka in nakua nalali in a'an onane te, kesel anfe plenat neu Nai Benaya oke te in anao ma namate Nai Simei. Nalali te Nai Salomo in kuasat nahenu ma nathoe anbi in plenat nanan.