Read Uab Meto 1 RAJA-RAJA 20 Bible Online

1 RAJA-RAJA 20 - Uab Meto bible

1 RAJA-RAJA 20

¹Anbi neno mese Nai Benhadad, kesel Siria, nabuab ale in solalus ok-oke, ma in nok kesel bian 32 nok sin aklet makenat, ma sin bikase sin, in niusnan ma nape' kot Samaria.

²Oke te in ansonu haef neu Nai Ahab, Kesel Israel, anbi kot nane neki uab a'at i,

³“Kesel Nai Benhadad antoti ko nok matani he nati' ho amfe neune ho noni mnatu, ho noni muti, ma ho fenai sin, ma ho anah sin le abe'it ma matani sin.”

⁴Nai Ahab natae nak, “Mitonan Kesel Nai Benhadad mak au lomi. In nabe'i anpal kau ma ale au mu'ik ok-oke.”

⁵Nalali te ale haefen nane sin anfani neu Nai Ahab he natiaba neune han totis bian na'ko Nai Benhadad. Han totis matani nane nak on i, “Afi ahunut hai kesel antoti ko nok matani he nati' ho muna'at neune mnatu ma noni muti ma ale ho fenai sin ma ho anah-anah sin.

⁶Mes neno i in of ansonu in solalus anakaf sin he nati' anpukai ho sonaf ma ale ho ameput sin ume, ma sin naiti ale sa' le maupa anbi sin matken. Sin of nem neu i anbi neno noka fa onle tabu i.”

⁷Onane te Kesel Nai Ahab no'en ale ana' plenat Israel ma nak, “Him saksi ala ki oke nak atoni i anlomi he nale'un kit. In antoti nok aseke he nati' au fe neune ale au fenai sin, ma au anah-anah in ma au noni mnatu ma au noni muti sin ma au ka tite fa sin han totis nane.”

⁸Ale ana' plenat ma to sin nak, “Kais amlae in, Usi! Kais mutuin in alomin.”

⁹Es nane te Nai Ahab natae Nai Benhadad in haefen nane nak on i, “Mitonan hi Usi, hi kesel nane mak au lomi utuin in han totis ahunut, mes in han totis pa' nua nane au ka lomi ani fa.” Ma haefen nane sin anao, nalali te sin anfani nem anteni neu Nai Ahab ma nak neune nak,

¹⁰“Hai kesel of ansonu solalus amfau le'uf onane he nale'un naskuku nani ho kot, talantia afu skuku na'ko ale fatu tutnae ho kot nane nabe'i sin neki nani al neki sin nimken. In ansup he nati' ale uisneno teta ankas in, ma anesi na'ko nane namate in, kalu in ka nanaoba fa lasi nane!”

¹¹Kesel Nai Ahab natae nak, “Mitonan Kesel Nai Benhadad mak: Solalus abe'it amneot of in naliabon leka anmaken nalali, mes ka naliabon fa leka fe kan maken fa.”

¹²Han taes Nai Ahab nane sin natiaba nani neu Nai Benhadad anbi tabu in nabua nok ale kesel bian le sin nekaf mese ma le fe sin ninun anbi sin um-ume. Leka sin nen han taes nane te Nai Benhadad anfe plenat neu ale in solalus nakaf sin he nabalab he nape' kot Samaria. Es nane te sin nabalab amsa.

¹³Anbi tabu nane, mafefa knino mese anao neu Kesel Nai Ahab ma nak, “UISNENO nakua a'an nak, ‘Ho mit solalus le amfau le'uf nane? Of Au fe ko lasi mnisat neu sin anbi neno i. Ho of muhin nak namneo Au lo UISNENO Kau.’ ”

¹⁴Nai Ahab natoti nak, “Sekau ka es mes he naiti makenat ma manuat nahunu ka?” Mafefa knino nane natae nak, “Ale solalus munif sin, atuin ale ana' plenat sin. Onle nane UISNENO nakua a'an.” “Ma sekau ka es mes anfani nakaf neu makenat ma manuat nane?” onane kesel natoti anteni, “Usi ho mekinom,” onane mafefa knino nane natae.

¹⁵Es nane te kesel amsa nabuab ale solalus munif atuin ana' plenat sin. Sin amfaun ok-oke solalus 232. Nalali te in anmo'e papmese neu solalus Israel. Sin amfaun ok-oke solalus 7.000.

¹⁶Sin anfatan makenat anbi manas namtetu anbi tabu Nai Benhadad ma kesel bo'tenu am nua le nekaf mese nokan fe sin ninu ma anmafu anmate anbi sin um-ume nanan.

¹⁷Le antam nahun neu makenat nane ale solalus munif sin. Atoni-atoni le Nai Benhadad anlenu sin hen haitan musu, sin naton neu Nai Benhadad nak anmu'i solalus pukan mese sin anpoi nem na'ko Samaria.

¹⁸Nai Benhadad anfe plenat he nati' solalus musu nane anheke sin nok ahonis, kat so'i fa neu sin nem hen makenan ka ai sin nem neki lasi halan.

¹⁹Solalus munif le Kesel Nai Ahab anlelu sin nane sin anpoi na'ko kot Samaria, ma solalus Israel sin natuin sin na'ko sin koitken.

²⁰Sin mese-mese namate musu le sin natef nokan. Atoni-atoni Siria sin naen, ma atoni Israel anli'u sin. Mes Nai Benhadad in naen nafetnon kun. In naen nafetin in aon neki bikase nok in solalus asae bikase sin fauk-fauk.

²¹Kesel Nai Ahab in amsa antam anbi makenat in nanan oke te nale'un naskuku ale aklet makenat ma namate ale bikase-bikase sin. Anbi neno nane atoni Israel anbe'u nani atoni Siria.

²²Nalali te mafefa knino nane nem neu Nai Ahab ma nak neune nak, “Tabu le i, leko te hom fani nai ma muloitan nai nok lek-leko, natuin kesel Siria of in anfani nem he nape' ma anken ko anbi ton amnemat.”

²³Ale solalus nakaf Kesel Nai Benhadad sin nak neu Nai Benhadad nak, “Uisneno le to Isreal naluli ma nabes neune anmu'i kuasat anbi neten sin, es nane te sin nis ma anbe'u kit. Mes of hit tis ma atbe'u sin leka hit atmaken ma atmanua atbi bale mnela.

²⁴So leko nesi Usi hom seka kesel bo'tenu am nua nane meki Usi ho solalus nakaf sin anmes.

²⁵Nalali te nati' Usi ho meki ho solalus pukan anaek mese on afi Usi ho solalus ahunut sin le sin nis ma anbe'u nalali sin nane, meki bikase ma aklet makenat on afi ahunut nane amsa. Hit of atmakentok to Israel nane anbi bale mnela, ma hae es le i namneo-namneo of hit tis ma atbe'u sin.” Kesel Nai Benhadad anlomi oke te natuin fainekat na'ko in solalus nakaf sin nane.

²⁶Anbi ton amnemat in neki in solalus sin anfen anao neu kot Afek he nape' ma anken atoni Israel.

²⁷Atoni Israel amsa sin naloitan sin solalus sin ma sin anao. Oke te solalus Israel nane sin anfen ma anao mat anbi pukan nua ma nahakeb sin um-ume mabaina nok atoni-atoni Siria nane. Solalus Siria sin nasan'ok nahenu pah menuan nane, mes solalus Israel ankiso sin onle bibi pukan nua.

²⁸Oke te mafefa knino mese nem neu Kesel Nai Ahab ma nak neune nak, “I lasi le UISNENO nakua a'an nak: ‘Natuin atoni-atoni Siria nane sin natenab nak Au al amu'in kuasat anbi pah neten ma ka mu'i fa kuasat anbi bale mnela, es nane te of Au fe ko lasi mnisat neu sin solalus sin le amfaune matain le'uf nane. Ho ma ho to sin of hi mihin mak Au UISNENO Kau.’ ”

²⁹Anbi neno hitu in a'lon atoni Siria ma atoni Israel sin namaika nabalah anbi sin um-ume, anmabaina neun es nok es. Ma anbi neno hitu te makenat ma manuat nanaobon. Anbi makenat ma manuat nane atoni Israel namate atoni Siria 100.000.

³⁰Atoni-atoni le nafetnon, sin naen neu kot Afek, mes baki lape kot nane natsel ma ankub nanan atoni 27.000 na'ko sin. Nai Benhadad amsa in naen kot nane ma natolo' anbi ume mese anbi ke'an nane in nupun.

³¹Ale in solalus nakaf sin nem neu in ma nak neune nak, “Haim nen atoni namolok nak, ale Kesel Israel nane kesel le sin anmu'i nek amahoet. Es nane, te mufetin kai he hai amnao mieku mok Kesel Israel nok haim pake bale kulut anfani ataka nak hai mimtau ma hai ampake tani anbi hai neom ai hai to'am anfani atakaf nak hai mina'tom. So nati' in ka namate fa hai Usi ko.”

³²Es nane te sin anpake bale kulut ma sin anpake tani anbi sin neon, oke te sin anao ma naeku nok Nai Ahab ma sin nak, “Nai Benhadad nane Usi ho ate. In antoti he nati' Usi kais mumate in.” Nai Ahab natae nak, “Au bae nane, in fe anmoni ka?”

³³Namneo solalus nakaf Nai Benhadad nane sin fe anpao takaf alekot na'ko Nai Ahab. Es nane te, leka Nai Ahab nauab nak “au bae”, onane te sin natae lab-lab nak, “Namneo, Nai Benhadad nane Usi ho bae kun.” Oke te Nai Ahab nak, “Meki in nem neu i!” Leka Nai Benhadad in nem antia, Nai Ahab anhone in ansae neu in aklet.

³⁴Oke te Nai Benhadad nak neune nak, “Of au fe ufani neu au Usi ko kot-kot le au ama nasik nalali sin na'ko au Usi ho ama. Au Usi ko amsa nabe'i muhakeb kot ainaf masosa anbi kot Damsyik onle au ama anmo'e anbi Samaria.” Nai Ahab natae nak, “Natuin anbi Usi ho han manta'en nane au of ufetin ko.” Oke onane te Nai Ahab anmo'e lasi manta'en nok Nai Benhadad nalali te nafetin in.

³⁵Natuin UISNENO In aplenat, mafefa knino mese na'ko mafefa knino pukan mese anlenu in biaf mese he beso in. Mes in biaf nane kan lomi fa.

³⁶Oke te mafefa knino nane nak, “Natuin ho ka mutuin fa UISNENO In aplenat, meo asu of namate ko leka hom meki amfani mu'ko bale i.” Namneo. Leka in neki anfani na'ko bale nane, meo asu natef nokan ma namate in.

³⁷Nalali te mafefa knino nane in anao anteni neu atoni bian ma nak, “Ambeso kau nai!” Ma atoni nane anbeso in nok matain le'uf talantia napapa'.

³⁸Oke onane te mafefa knino nane am amu in human meki pilu tuka mese, he nati' atoni kais nahin in, oke te in anao ma anhake anbi lanan ninen hen pao Kesel Israel hen koenon anfini nok lanan nane.

³⁹Leka kesel ankoenon anfini nok lanan nane, mafefa knino ankoa neune nak, “Koi Usi Apinat, anbi tabu au fe maken anbi bale makenat, solalus mese neki nem neu kau musu mese le anheke nan in. Solalus nane nak, ‘Ampao atoni i lek-leko. Kalu in naen, mes namate ko amseka in ai hom baen noni muti 3.000!’

⁴⁰Mes leka au fe mepu nok matani, atoni nane in naen kun.” Kesel natae nak, “Ho meki nom mufek kum ho lasi. Ho mes amsutai kum lasi nane.”

⁴¹Mafefa knino nane ansefi pilu amut na'ko in human, oke te kesel nahin in on mafefa knino mese.

⁴²Oke te mafefa knino nane nak neu kesel nak, “UISNENO nakua In a'an nak on i: ‘Atoni le Au fe plenat neu ko he nati' ho mumate ho mufetin in ma in anao kun. Es nane te ho mes amate amseka in. Ho solalus sin of sin namle'u natuin sin nafetin solalus na'ko musu sin ma sin naen nafetnon.’ ”

⁴³Kesel neki anfani neu Samaria nok nekan le namle'u ma nato' nok.