Read Uab Meto 1 RAJA-RAJA 21 Bible Online

1 RAJA-RAJA 21 - Uab Meto bible

1 RAJA-RAJA 21

¹Anhaumak Kesel Nai Ahab in sonaf anbi Yizreel anmu'i lene tua min kase mese Nai Nabot in-ini.

²Anbi neno mese Nai Ahab nak neu Nai Nabot nak, “Amfe neu kau ho lene tua min kase nane neu kau, natuin lene nane anhaumak nok au sonaf. Au lomi he sen utan anbi lene nane. Ho of mupeni lene tua min kase naleko anesi anfini on anfani seka neu ho lene tua min kase nane, ai kalu hom lomi, of au sos ho lene tua min kase nane nok osaf mafena.”

³Mes Nai Nabot in natae nak, “Lene tua min kase le i au na'i ma au be'i sin ini. Anbi Uisneno In kanan, au ka nabe'i fa he fe neu au Usif ko!”

⁴Nok nekaf le namle'u ma nato' natuin in nen sa' le Nai Nabot nak neune onane, Nai Ahab anfani neu in ume ma antup anbi in ke'an ma naklelo in human ma kan lomi fa hen bukae.

⁵In fenai bi Izebel anao neune ma natoti nak, “Nansa' ho nekam namle'u?”

⁶Nai Ahab natae nak, “Au nekak kan malin fa neu Nai Nabot. Au toti he nati' in nasosa in lene tua min kase nane neu kau, ai au seka eki lene tua min kase bian, kalu in anlomi onane, mes in kan lomi fa!”

⁷“Ai ho ka kesel ko fa anbi Israel!” onane bi Izebel natae, “Amfen nai esle' i ma ambukae nai. Amhalin ho nekam nai, natuin of au fe ko Nai Nabot in lene tua min kase nane neu ko!”

⁸Ma bi Izebel antui sulat anbi Nai Ahab in kanan ma antao kesel malak neu sulat nane. In ansonu sulat nane neu ale ana' aplenat ma ale makana anbi Yizreel.

⁹Sulat nane in nesan nak on i, “Mitonan to ok-oke he nati' nanahon ma amlenu sin he nibun nabuabok. Ma anbi buat nane amfe bale toko makana neu Nai Nabot.

¹⁰Ma amlenu atoni abulalut nua antoko mabaina nokan ma nasanab in nak in ansukat nalali Uisneno ma kesel. Oke te meki in anpoi na'ko kot ma ampoli in meki fatu talantia anmate.”

¹¹Ale ana' aplenat ma ale makana anbi Yizreel sin nanaoba nani bi Izebel in aplenat.

¹²Sin natonan to ok-oke he nati' sin nanahon. Nalali te sin anlenu to ok-oke anibun nabuabok ma sin natokob Nai Nabot anbi toko makana.

¹³Ma atoni abulalut nua antoko mabaina nok Nai Nabot, ma sin ansaksi anbi to mfaun sin matan nak Nai Nabot ansukat nalali Uisneno ma kesel. Oke te sin anhel napoitan in na'ko kot ma anpoli in neki fatu talantia anmate.

¹⁴Nalali te sin ansonu han tonas neu bi Izebel neu sin namate nalali Nai Nabot.

¹⁵Leka bi Izebel ansimo nalali han tonas nane in nak neu Nai Ahab nak, “Nai Nabot anmate nalalien. Amnao esle' i ma maiti lene tua min kase nane le in kan lomi fa he nasosa neu ko.”

¹⁶Nai Ahab in anao neu bale nane nok labah ma in naiti lene tua min kase nane anfani in-ini kun.

¹⁷Oke te UISNENO nakua a'an neu Nai Elia, mafefa knino na'ko Tisbe nane nak,

¹⁸“Nai Ahab, kesel Samaria nane in fe es Nai Nabot in lene tua min kase he naiti lene nane hen fani in-ini kun. Es nane te, amnao nai meu bale nane,

¹⁹ma mutiaba neune mak Au, UISNENO, ukua Au a'ak ak on i, ‘Ho mumate mulali, mes fe musik amteni! Es nane te asu sin of anlami ho na' anbi bale le asu-asu sin anlami Nai Nabot in na'!’ ”

²⁰Leka Nai Ahab in nit Nai Elia, in nak, “Hoi musu, amsoput te ho mupeni kau!” “Namneo,” onane Nai Elia natae. “Natuin Usif ho meku ho nisim anmo'e lasi amle'ut anbi UISNENO In human In matan,

²¹es nane te i a'an UISNENO neu au Usif ko nak, ‘Of Au usanut neu ko lasi amle'ut. Of Au uneku ko, ma ale anmone anbi ho ume nanan, mnasi ma munif, of Au uneku sin.

²²Ho ume nanan of papmese on Kesel Nai Yerobeam Nai Nebat anmone ma papmese amsa on Kesel Nai Baesa Nai Ahia anmone ume nanan, natuin ho es amhel atoni Israel ma sin anmo'e sanat talantia nafena Au to'as.’

²³Ma neu bi Izebel, UISNENO nakua a'an nak asu of neku in aon anbi kot Yizreel.

²⁴Sekau am sekau na'ko ho ume nanan le anmate anbi kot nanan asu of neku nani sin, ma le anmate anbi kot kotin kolo of neku nani sin.”

²⁵Katit fa es le neku nisin nok matani hen mo'e amle'ut anbi UISNENO In human ma In matan onle Nai Ahab anmo'e. Ale lasi amle'ut le Nai Ahab anmo'e nane natuin bi Izebel, in fenai es naseke in.

²⁶Nai Ahab antao ma anmo'e sanat-sanat amle'ut le anae le'uf: in naluli nabes neu uisneno teta onle atoni Amori sin anmo'e, nane atoni-atoni le UISNENO anli'u sin na'ko pah Kanaan anbi neno atoni Israel sin antam neu pah nane.

²⁷Leka Nai Elia in namolok nalali te Nai Ahab anpisu in bale pake ma anpake bale kulut on atakaf in nanu'on, oke te in nanahon. Anbi tabu in antup amsa in anpake bale kulut, ma leka in anao, in human anmofu piut.

²⁸UISNENO nakua a'an neu Mafefa Knino Nai Elia nak,

²⁹“Ho mit mulali neu onme Nai Ahab in nabaun in aon anbi Au humak ma Au matak? Es nane te, of Au ka usanut fa amle'ut nem neune leka in fe anmoni. Anbi batan in anmone onane te of Au usanut amle'ut nem neu in ume nanan sin.”