Read Uab Meto 1 RAJA-RAJA 22 Bible Online

1 RAJA-RAJA 22 - Uab Meto bible

1 RAJA-RAJA 22

¹Ton nua in a'lon kan mu'i fa makenat anbi Israel ma Siria.

²Mes antam ton tenu onane te, Nai Yosafat Kesel Yehuda in anao ma ansenu Nai Ahab Kesel Israel.

³Nahunu na'ko nane Nai Ahab nak nalali in solalus anakaf sin nak, “Hi mihin nak kot Ramot anbi Gilead nane anfani hit ini! Nansa' hit ka tasik tafani fa na'ko kesel Siria?”

⁴Es nane te leka Nai Yosafat in nem, Nai Ahab natoti nak, “Hom lomi ka hem nao mok kau he hit tape' Ramot?” Nai Yosafat natae nak, “Leko! Hit atnao bua-bua. Au solalus ma solalus asae bikase of sin nabua nok ho solalus ma ho solalus asae bikase.

⁵Mes naleko nesi hit tatoti fe UISNENO.”

⁶Es nane te Nai Ahab nabuab oni Mafefa knino 400 oke te natoti sin nak, “Nabe'i ka au he nao he upe' ma ken kot Ramot ai kaisa?” “Leko!” onane sin natae. “UISNENO of nana'at kot nane neu ko Usi.”

⁷Mes Nai Yosafat natoti anteni nak, “Ai anbi i katit fa anteni Mafefa knino bian le nabe'i natoti neu UISNENO neu kit?”

⁸Nai Ahab natae nak, “Mese fe esan, Nai Mikha Nai Yimla anmone. Mes au ka lomi fa in, natuin in ka nabeno nit kau fa lasi alekot; alaha lasi le'uf piut.” Nai Yosafat natae nak, “Ah, kais mak onane!”

⁹Es nane te Nai Ahab no'en ameput mese anbi sonaf nanan oke te anlenu in anao labah hen hone Nai Mikha.

¹⁰Anbi tabu nane Nai Ahab ma Nai Yosafat, sin anpake bale pake anaet, sin antoko anbi toko plenat anbi bale teli ane kase anbi eno matan baki lape Samaria, ma ale Mafefa knino sin nem ma natiaba sin han beno sin.

¹¹Mese na'ko ale Mafefa knino nane in kanan Nai Zedekia Nai Kenaana anmone, in anmo'e sunaf-sunaf na'ko besi oke te in nak neu Nai Ahab nak, “UISNENO In nakua a'an nak on i, ‘Nok sunaf-sunaf onle i of Usi ho mautu Siria ma muskuku mule'un sin.’ ”

¹²Ale Mafefa knino bian sin anlomi natuin ma sin nak, “Mupe' ma amken Ramot nai, Usi of ho mis ma ambe'u. UISNENO of anfe mnisat neu ko Usi.”

¹³Onane te haef le anhone Nai Mikha, in nak neu Nai Mikha nak, “Ale Mafefa knino bian ok-oke sin nabeno lasi mnisat neu kesel. So nati' Ama amsa ho mubeno lasi alekot onle sin.”

¹⁴Mes Nai Mikha natae nak, “Anbi UISNENO amonit In kanan, of au uton sa' le UISNENO naton nani neu kau!”

¹⁵Leka Nai Mikha in nem antia Kesel Nai Ahab in matan, kesel natoti in nak, “Nabe'i ka au ma Kesel Nai Yosafat hai amnao he mipe' ma amken Ramot, ai he kaisa?” “Amaken nai!” onane Nai Mikha natae. “Namneo Usi of ho mis. UISNENO of anfe mnisat neu ko Usi.”

¹⁶Nai Ahab natae nak, “Kalu ho mumolok neu kau natuin UISNENO In kanan, so ho muton neu kau nok amneot. Hae fauken ka au mes he umnauba ko neu lasi nane?”

¹⁷Nai Mikha natae nak, “Au it solalus Israel sin nasitbok ma nasan'ok anbi nu'af-nu'af sin. Sin papmese onle bibi kase le kan mu'i fa atukus, ma UISNENO nakua a'an antom sin nak, ‘Atoni-atoni le i sin kan mu'in fa atukus. Maut he nati' sin anfani nok aomina.’ ”

¹⁸Oke te Nai Ahab nak neu Nai Yosafat nak, “Au molok nane namneo ai kahaf? In ka nabeno nit fa lasi alekot neu kau, alaha lasi amle'ut piut!”

¹⁹Nai Mikha in namolok anteni nak, “Amnen nai sa' le UISNENO he naton neu ko anbi tabu le i! Au it UISNENO antunon anbi In atoko anbi sonaf neno tunan, ma ale In ahake neno tunan sin anhake anhaumak In.

²⁰UISNENO natoti nak, ‘Sekau ka es hen fuli Nai Ahab he nati' in anlomi he nao hen maken ma anmate anbi Ramot anbi Gilead?’ Ahake neno tunan nane sin han taes anmasuli es nok es.

²¹Amsoput te smanaf mese anfonat antam. In anhaumak UISNENO ma in nak, ‘Au es of a'fuli in.’

²²‘Of hom fuli in meki lanan me ka?’ UISNENO natoti neune. Smanaf nane natae nak, ‘Au of anao ma mo'e ale Mafefa Knino Nai Ahab he nati' sin anmo'e lasi moel ma poi.’ UISNENO nakua a'an nak, ‘Leko, munaoba lasi nane, ho of amfuli man in.’ ”

²³Anesi na'ko nane Nai Mikha nak, “Nah, lasi nane es anbol! UISNENO anmo'e nalali ho Mafefa knino sin namo'e ko Usi natuin UISNENO natetab nalali hen fe amle'ut nem neu ko Usi!”

²⁴Ma Mafefa Knino Nai Zedekia in anao mat anhaumak Nai Mikha oke te anpas Nai Mikha in human ma nak, “Onme ka Smanan Knino UISNENO he nasaitan kau ma namolok neu ko?”

²⁵Nai Mikha natae nak, “Mes ho mit in atakan nane leka hom tam meu ke'an mese he mutolo'.”

²⁶“Amheke in!” onane Kesel Nai Ahab anfe plenat, “ma meki in neu Nai Amon, wali kota nane, ma neu Naimnuke Nai Yoas.

²⁷Amelnu sin he natam in neu o'of nanan, ma amfe neune mnahat ma mninut akle'o talantia au fani aum nok aomina ma aoleko.”

²⁸Nai Mikha nak, “Kalu Usi hom fani aum nok aomina ma aoleko, nane in otan nak UISNENO ka nakua fa In a'an nanete natuin kau! Sin al-al sin ok-oke anibun abuat le i sin anfani saksi.”

²⁹Nalali te Nai Ahab Kesel Israel, ma Nai Yosafat Kesel Yehuda sin anao ma nape' ma anken kot Ramot anbi Gilead.

³⁰Nai Ahab namolok ma nak neu Nai Yosafat nak, “Of au ubaina humak ma au ok a'bi makenat, mes ho ampake ho bale pake anaet.” Onle nane Kesel Israel nabaina human leka in anao hen maken.

³¹Anbi tabu nane solalus nakaf amakenat bo'tenu am nua le anfani nakaf neu aklet makenat Siria sin kesel naplenat nalali sin he nati' ala anken antumatan Kesel Israel.

³²Es nane te, leka sin nit Kesel Nai Yosafat, sin al-al sin natenab nak in le nane Kesel Israel. Es nane te sin anken antumatan in. Mes Nai Yosafat in anbai,

³³onane te sin nahin nak in ka Kesel Israel fa. Oke te sin nasnas ma kan ken fa in.

³⁴Solalus Siria mese in anhel in aklaot ma in naklao kun kan sali fa sa' es. Mes aklaot nane antoman Nai Ahab ma napisu in sobalu makenat anbi sobalu malutkenu. Ma in anbai neu in ana' afleu ai ana' kalat nak, “Antoman kau!” “Muleko aklet ma meki kau ampoi na'ko makenat i!”

³⁵Mes natuin makenat fe anpin piut, es nane te Kesel Nai Ahab anhake nabalah ma ansonlai in anbi in aklet nanan anbaina neu solalus Siria sin. In na' ansai na'ko in papa' ma naaekton anbi aklet nanan. Neno anmabe te in anmate.

³⁶Leka manas hen mofu te anfe plenat neu solalus Israel ok-oke he nati' sin anfani neu sin kot ma sin pah mese-mese,

³⁷natuin kesel in anmate nalali. Oke te sin neki anfani ma ansub Nai Ahab in aon ta'un anbi Samaria.

³⁸Leka sin anboe in aklet anbi nifu Samaria, bife-bife akaket ma amapaisa fe sin naniu anbi nane, ma asu sin anlami na' anbi aklet nane, anmatom nok UISNENO In a'an le afi In naton nalali.

³⁹Lasi nu'un bian antom Kesel Nai Ahab, antom sonaf sikal kase ma ale kot in nahakeb sin, antui nalali sin anbi sulat Anaof na'ko ale Kesel Israel.

⁴⁰Leka Nai Ahab anmate nalali te, in anmone Nai Ahasia anfani kesel anseka in.

⁴¹Leka Nai Ahab Kesel Israel in ana' aplenat nan ton ha, Nai Yosafat Nai Asa anmone anfani kesel anbi Yehuda.

⁴²Anbi tabu nane in ton bo'tenu am nim. In naplenat anbi Yerusalem ton bo'nua am nim in a'lon. In ainaf kanan bi Azuba Nai Silhi anfeto.

⁴³Papmese on Nai Asa, in amaf, Nai Yosafat anmo'e lasi alekot anbi UISNENO In human In matan. In naneku nani na'ko in aplenat ale akaket ma amapaisa atoni ma bife le sin anmepu anbi bale-bale luli besa neu uisneno teta le fe nabalah na'ko batan Nai Asa, in amaf. Mes bale-bale fuat nane ka nale'un nani fa sin. To sin fe natulu fua tulu ma atu fomeni anbi bale-bale nane. Nai Yosafat anmo'e abnao Tarsis sin he sin naiti mnatu na'ko Ofir, mes abnao nane sin ka nao nanan fa natuin namle'u anbi Ezion-Geber. Kesel Nai Ahazia na'ko Israel in antoti he nati' in ameput anbi in abnao sin anlak tasi bua-bua nok Nai Yosafat in ameput anbi in abnao sin, mes Nai Yosafat antite han totis nane maski in anmu'i lasi mafutus alekot nok Kesel Israel. Namuni te Nai Yosafat in nasaebon ma ansub in anbi kesel sin naukel anbi Kot Nai Daud. Nai Yoram in anmone anfani kesel anseka in amaf. Lasi nu'un bian antom Nai Yosafat, in on atoni meo pa'e ma in lasi makenat ma manuat antui nalali sin anbi sulat Anaof na'ko ale Kesel Yehud(...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²Anbi ton bo'es am hitu Kesel Nai Yosafat naplenat anbi Yehuda, Nai Ahazia, Nai Ahab anmone anfani kesel anbi Israel oke te in naplenat Israel ton nua in a'lon anbi Samaria.

⁵³In nasanab neu UISNENO in natuin in amaf ma in ainaf sin nobin ma Kesel Nai Yerobeam in nobin le anmo'e to Israel sin antao ma anmo'e sanat.

⁵⁴In naluli nabes neu Baal ma nausi neune. Ma on in amaf le naplenat nahunu, in amsa nafena UISNENO In to'as, Uisneno le atoni Israel sin naluli ma nabes neune.