Read Uab Meto 1 RAJA-RAJA 3 Bible Online

1 RAJA-RAJA 3 - Uab Meto bible

1 RAJA-RAJA 3

¹Kesel Nai Salomo anmo'e Mesir he nek bua nok in anao nok in naiti Kesel Mesir in anfetnai anfani in fenai. Anfetnai nane Nai Salomo in neki neu Nai Daud in kot he natua anbi nane talantia Nai Daud in sonaf ma Ume UISNENO ma baki lape anfun natef Yerusalem anmepu nalali sin.

²Natuin Ume UISNENO fe ka nahakeb fa anbi tabu nane, to fe natulu fua tulu anbi bale me-me.

³Nai Salomo in nek namnau UISNENO ma in natuin ale lekat lulut na'ko in amaf, mes in fe anlolo mu'it ma natulu mu'it anbi bale me-me.

⁴Bale luli besa le makana nane es anbi Gibeon. Nai Salomo in ha'e-ha'e natulu fua tulu anbi bale nane anfoenanat natulu fua tulu anbi bale nane. Anbi neno mese onle in antak nani, in anao antani neu bale nane.

⁵Anbi fai nane UISNENO nalil'on neune anbi nanait ma nakua a'an nak, “Salomo, amtoti nai sa' le hom lomi, ma of Au fe ani neu ko!”

⁶Nai Salomo natae nak, “Koi UISNENO, ho mulile ma muton mulali nak Hom nek ma mumnau mis au ama, Ho ate nane. In leko, amneot ma na'ki neu Ko. Ma anfani on atakaf mese nak Ho of amnek ma mumnau in piut, Ho amfe neune anmone mese le neno i in naplenat anseka in.

⁷Koi UISNENO, Ho maiti kau au fani kesel a'seka au ama, maski nak au fe munif kau ma au ka uhin fa neu au he uplenat ak onme.

⁸Au hake bi nonot le Hom beti sin anfani Ho nonot sin atnankenu. Sin nonot mese le anaek le kat so'i tabe'i fa sin amfauken.

⁹Es nane, koi UISNENO, so nati' Ho amfe neu kau lasi nek mahine le au ami he au uplenat Ho nonot i nok amneot ma he nati' nabe'i au beti uhin lasi me es alekot ma lasi me es amle'ut. Kalu ka onfa nane, onme ka nabe'i he au uplenat Ho nonot anaek i?”

¹⁰Uisneno anmalin nok han totis Nai Salomo nane,

¹¹ma nakua a'an neune nak, “Natuin hom toti lasi nek mahine he muplenat nok amneot, ma ka ua mnanu fa ai lasi mu'if fa neu ho aom ai ka lasi maten fa neu ho musu-musu sin amsa,

¹²es nane te ho han totis nane of Au unokab ani. Au of anmo'e ho nek mahine anesi ma ho muhin amnesi na'ko sekau amsa, he anbi tabu afinit ai anbi tabu amnemat.

¹³Ma sa' le ho kam toti fa of Au fe ani neu ko amsa esle': lasi mu'if anbi ho monim nanan ok-oke ma natola ko anesi na'ko ale kesel bian le he anbi me amsa.

¹⁴Ma kalu ho, onle ho ama Nai Daud, ho mu'ki neu Kau ma ho mutuin ale Au plenat-plenat sin, of Au fe neu ko ua mnanu.”

¹⁵Leka in anfen, Nai Salomo in nahin nak Uisneno namolok nalali nok in anbi nanait in nanan. Ma in anfani neu Yerusalem oke te in anhake anbi Peti Fef bela UISNENO ma natulu fua tulu mnotu ma tulu lasi halan. Nalali te in anmo'e fesat neu in ameput sin.

¹⁶Anbi neno mese, bife amapaisa nua sin nem naeku nok Kesel Nai Salomo.

¹⁷Es na'ko sin nak, “Koi Usi Apinat, au ok bife le i hai mitua ume mese. Katit fa atoni bian le he natua nok kai. Anbi tabu fauk-fauk afinit, au uhoni anmone mese. Neno nua namuni te bife le i amsa nahoni anmone mese amsa.

¹⁹Anbi fai mese leka fe hai amtup, bife i ka nok fa asafanut in nameku nis in anah talantia anmate.

²⁰Anbi fai atnanan fe au a'tup, in anfen oke te in naiti au anah na'ko au aon bian. Au anah nane in antao neu in hala tupa, ma in anah le anmate nalali nane in antao anbi au hala tupa.

²¹Ma leka au fen ma he ususu au anah nane, au upeni in anmate nalalien. Leka au kiso ulek-leko li'ana nane, namneo in ka au anah fa.”

²²Bife bian nane natae nak, “In na mo'e!” “Le amonit i au anah, ma le amates nane ho anah!” “Kahaf!” Bife ahunut nane natae onane ma in nak, “Le amates i ho anah, ma le amonit nane au anah!” Onle nane sin anmabanan anbi kesel in human.

²³Oke te Kesel Nai Salomo nakua a'an nak, “Hi mese-mese miteb mak anah le amonit i hi anah ma ka es fa amates nane.”

²⁴Leka kesel nakua nalali a'an onane kesel anlelu atoni naiti suni.

²⁵Nalali te kesel anfe plenat nak, “Am'ote ambati li'ana amonit nane tuka nua nai ma amfe neu bife nua en nane es te tuka mese.”

²⁶Leka sin nen plenat nane, ainaf amneot na'ko li'ana amonit in nak, “Au toti kais musesu kau, koi Usi, kais mumate li'ana nane. Amfe li'ana nane neu in.” Ainaf na'ko li'ana amonit nane nauab onane natuin in nek nis in anah kun. Mes bife bian nane nak, “Leko, am ote misan, mautu he es na'ko kai kais napeni li'ana nane!”

²⁷Nai Salomo nakua a'an nak, “Kais mimate li'ana nane! Mina'at in neu bife ahunut nane — in ainaf es nane.”

²⁸Leka to Israel sin nen lasi tfeka Nai Salomo neu in nafek lasi nane, sin namkak ma natola Nai Salomo. Natuin, namneo-namneo nak Uisneno anfe nalali nek mahine neune he nati' in anmo'e lasi amneot anbi lasi fef lasi.