Read Uab Meto 1 RAJA-RAJA 5 Bible Online

1 RAJA-RAJA 5 - Uab Meto bible

1 RAJA-RAJA 5

¹Nai Hiram, kesel Tirus, in anmo'e soba piut nok Nai Daud. Leka Nai Hiram in nen nak Nai Salomo in anfani nalali kesel anseka in amaf Nai Daud, in ansonu haef neu Nai Salomo.

²Oke te Nai Salomo amsa ansonu han ba'an i neu Nai Hiram nak,

³“Kesel Apinat Nai Hiram! Oni Usif ho muhin nak au ama Nai Daud naseke'on piut hen maken natuin ale musu-musu na'ko pah-pah anfun ma natef kai sin nem anlaban ma anken kai. Ma natuin UISNENO fe kan fe neune fa mnisat he nis ma anbe'u ale in musu-musu sin, in ka napeni fa sona he nahakeb ume luli besa neu in UISNENO.

⁴Mes muni i au UISNENO anfe nalali neu kau lasi tainine neu au pah ok-oke anbi au plenat in nanan. Au ka mu'i fa musu, ma kan mu'i lasi amle'ut le nem he nale'un au pah.

⁵UISNENO In anmanba'an nalali nok au amaf Nai Daud nak on i, ‘Ho anmone le of Au aiti anfani kesel anseka ko in es of nafena ume bale luli besa neu Kau.’ Es nane te, Hiram Usif Apinat, au, Nai Salomo, au ufek ulali he uhakeb ume nane.

⁶Usif ho muhin mulali nak anbi au to sin kan mu'i fa ahinet hen se' ma nafae hau on ho to. Es nane te au toti ko he hom lelu ho to sin hen se' ma nafae ale hau aijob Libanon neu kau. Of au lelu au to sin hen bab sin ma ho to sin baen le ho mufek of au baen ani sin.”

⁷Nai Hiram in anmalin anae le'uf leka in ansimo hanaf nane. In nak, “Pules ma liatas neu UISNENO anbi neno i, natuin In anfe neu Nai Daud anmone ahinet mese ma anfani kesel neu nonot anaek nane.”

⁸Oke te Nai Hiram ansonu han taes i neu Nai Salomo nak, “Au simo ulali au Usif ho han totis. Au of uloitan hau aijob Libanon ma hau aijob bian anteni matom nok Usif ho han totis.

⁹Au to sin of sin neki hau nane ansanu na'ko Libanon neu tasi. Anbi bale nane ale hau uf nane of sin anfutu sin anfani a'belo ma of sin nasaiba sin anao nok noe ninen neu bale le Usif hom lek mani. Anbi bale nane ale a'belo nane anpukai sin ma nana'at sin neu Usif ho to sin he sin nabalab nani sin. Na'ko ko Usif, au toti he nati' Usif ho muloitan haot fatis neu abit sonaf nanan sin.”

¹⁰Es nane te Nai Hiram anfe neu Nai Salomo ale hau aijob Libanon ma hau aijob bian anteni le in anlomi.

¹¹Ma neu hen fe haot fatis neu Nai Hiram in abit sonaf nanan sin nane, anbi ton mese in nanan Nai Salomo anfe neu Nai Hiram ane kase kilo 322.500 ma mina bub fua mina in anakan liter 4.400.

¹²UISNENO nanokab In lasi manba'an ma anfe neu Nai Salomo nek mahine. Anbi Nai Hiram ma Nai Salomo anmu'i malutas alekot, ma sin nua sin anmo'e nalali mafutus lasi manta'en.

¹³Kesel Nai Salomo anlek atoni 30.000 na'ko Israel ok-oke neu mepu plenat,

¹⁴ma naiti Nai Adoniram anfani apanat neu sin. Nai Salomo anbati sin anfani pukan tenu, pukan mese te atoni nifun bo'mese. Atoni pukan tenu nane sin anmaseka funan mese sin anbi Libanon ma funan nua sin anbi sin ume.

¹⁵Nai Salomo anlek atoni 80.000 amsa hen sapi fatu na'ko tubu ma atoni 70.000 hen loi ale fatu-fatu nane.

¹⁶In naiti atoni apaot 3.300 he sin anpanat mepu nane.

¹⁷Ma natuin in aplenat amsa sin ansapi fatu-fatu naek alekot neu Ume UISNENO in a'tu'in.

¹⁸Onle nane Nai Salomo in ameput sin ma ale ameput Nai Hiram ma ale atoni-atoni na'ko kot Gebal sin naloitan fatu ma hau neu he nahakeb Ume UISNENO nane.