Read Uab Meto 1 RAJA-RAJA 6 Bible Online

1 RAJA-RAJA 6 - Uab Meto bible

1 RAJA-RAJA 6

¹Nai Salomo anfatan mepu nahakeb Ume UISNENO anbi funan Ziw, fun nua, anbi ton ha in ana' aplenat, ton 480 leka nonot Israel anpoi na'ko Mesir.

²Ume UISNENO in a'su'an, anbi in nanan on i: amnanun meter 27, meunuan meter 9, amnanun neki ansae meter 13 ma batis.

³Anbi eno matan Ume UISNENO nane anmu'i po'an in amnanun meter 4 ma batis ma meunuan meter 9 on Ume nane in meunuan ok-oke.

⁴Anbi baki lape ume nane anmu'i bola' eno kiso le anmeunua antam.

⁵Anfun natef ume nane kotin, anbi baki lape aon bian kotin nahakeb ke'an-ke'an maktuta neki ansae. Anmu'i ke'an tenu maktuta neki ansae, mese-mese amnanun meter 2 ma batis.

⁶Anbi ke'an ahunut maktuta neki ansae, ke'an mese in meunuan meter 2 ma batis, anbi ke'an pa' nua neki ansae in meunuan meter 2,7 ma anbi ke'an pa' tenu neki ansae in meunuan meter 3,1. Baki lape anbi ume pinan in mafaun anesi na'ko baki lape anbi fafon, talantia nonof-nonof ke'an nane anmalutab sin nok baki lape Ume UISNENO nane ka na'bola fa baki lape nane.

⁷Ale nonof-nonof nane anpake hau aijob Libanon. Eno neu ke'an-ke'an bian neki ansanu anbi ume aon bian neno a'ne'u, ma neu ke'an fafon pa' nua ma pa' tenu anmu'i elak nafunkon. Nalali te Nai Salomo in anmo'e ume nane in apupun amnela. Neu mepu nane in anpake suaf ma bena na'ko hau aijob Libanon. Leka nafena Ume UISNENO nane, kat nen tani fa tutu in hanan, fani in hanan ai besi in hanan, natuin fatu-fatu le in anpake he nahakeb ume nane afi naloitan nalali sin leka fe anhani sin anbi sin bale. Onle nane Nai Salomo in nahakeb Ume UISNENO talantia in nalali nani ok-oke.

¹¹UISNENO nakua a'an neu Nai Salomo nak,

¹²“Kalu ho mutuin ale Au plenat sin ma Au lekat lulut sin, Au of unokab neu ko sa' le Au ba'an ulali neu ho ama Nai Daud.

¹³Au of utua bi ume le ho muhakeb i in nanan anbi Au nonot Israel sin atnankenu. Au of ka usaitan fa sin.”

¹⁴Nai Salomo in anmepu nasopu Ume UISNENO nane on i:

¹⁵Baki lape anbi Ume nane in nanan ankus anteni hau aijob Libanon neune, na'ko ume pinan talantia ume po'of. Ume nanan het teli atbine anmo'e neki hau aijob bian anteni.

¹⁶Anbi Ume nanan nane, anbi aon bian kotin anmo'e ke'an le nahakeb klipit ma anke'an anbati ke'an nane neki hau aijob, na'ko nain talantia hau kbat anbi Ume in apupun. Ke'an nane nakanab nak Ke'an Knino Le'uf; in amnanun meter 9.

¹⁷Ke'an anbi Ke'an Knino Le'uf nane in matan antek nak Ke'an Anaek, ma in amnanun meter 18.

¹⁸Baki lape anbi Ume nane in nanan ok-oke ankus anteni neki hau aijob Libanon, talantia ale fatu baki lape nane katit fa sin anteni ok-oke. Hau aijob le ankus sin nane anpake noas sin neki malunat boko fuan ma ale tuna-tuna le fe anpe'.

¹⁹Ke'an Knino Le'uf le anmo'e anbi Ume UISNENO in nanan nane naloitan nani neu Peti Fef Bela UISNENO.

²⁰Ke'an nane in amnanun, in menuan ma in amnanun neki ansae al-al sin papmese, mese-mese te meter 9. Baki tulu anbi Ke'an Knino Le'uf matan anmo'e neki hau aijob Libanon. Anbi eno he tam teu ke'an nane anhel a'heke mnatu neune. Ume UISNENO in nanan ok-oke nok Ke'an Knino Le'uf nane ma baki tulu an amu nani neki noni mnatu nesaf.

²³Anbi Ke'an Knino Le'uf nane anmo'e ma antao nani amsa ahake neno tunan nua le anmo'e sin na'ko hau bub fua mina. Ahake neno tunan le anmo'e ma antao sin nane mese-mese te in amnanun neki ansae meter 4,4;

²⁴sin su'at papmese ma sin human papmese. Mese-mese te anmu'i ninef nua, ninef mese te amnanun meter 2,2. Sin ninek tunken nua sin anma'lonen es nok es meter 4,4.

²⁷Ahake neno tunan nua en le anmo'e sin nane antao sin mabaina neun anbi Ke'an Knino Le'uf in nanan talantia ninef mese na'ko ahake neno tunan le anmo'e sin nane antom neu klipit ma ninen bian na'ko ahake neno tunan nua en nane anmatom mafani anbi ke'an nane atnanan.

²⁸Ahake neno tunan nua en le anmo'e sin nane an amu sin neki mnatu.

²⁹Klipit ok-oke anbi Ke'an Knino Le'uf Ume UISNENO in nanan anpake noas nani neki malunat ahake neno tunan, petah, ma tuna-tuna le fe anbo.

³⁰Nain anbi Ume UISNENO in nanan ok-oke an amu neki noni mnatu.

³¹Anbi eno le he tam teu Ke'an Knino Le'uf nane in nanan nahakeb eno no' nua na'ko hau bub fua mina. Eno sutai anbi in fafon nane anoebton na'aik anbi in atnanan.

³²Eno no nua en nane anpake noas sin neki malunat ahake neno tunan, hau petah, ma tuna-tuna le fe anbo. Eno nof, ahake neno tunan le anmo'e sin ma hau petah maluna, an amu sin ok-oke neki mnatu.

³³Anbi eno he tam teu Ke'an Anaek, nahakeb ni eno na'ko hau bub fua mina, onle si'uf ha sin amnanun papmese.

³⁴Onane amsa anmo'e eno no' nua na'ko hau aijob bian ka na'ko fa Libanon le mese-mese te nabe'i atli' tani.

³⁵Ale eno nof nane anpake noas nani sin neki malunat ahake neno tunan, hau petah ma ale tuna-tuna le fe anbo. Ale malunat ok-oke nane an amu nani sin neki noni mnatu.

³⁶Anbi Ume UISNENO nane matan anmo'e po'an anbi nane. Po'an nane anfun natef nani neki baki lape kuni peni: anbi fatu kuni peni in fafon anmu'i anteni hau aijob Libanon kuni peni mese anteni.

³⁷Ume UISNENO in atokon ma in asukin nane nahakeb anbi funan Ziw, fun nua, ton ha neno Nai Salomo in ana' aplenat.

³⁸Ma anbi funan Bul, fun fanu, ton bo'es am mese neno Nai Salomo in anmepu nasopu Ume UISNENO, matom nok onle afi in lekat ma in lulut. In nahakeb ume nane anbi ton hitu in a'lon.