Read Uab Meto 1 RAJA-RAJA 7 Bible Online

1 RAJA-RAJA 7 - Uab Meto bible

1 RAJA-RAJA 7

¹Nai Salomo in nahakeb sonaf mese neu in aon kun. In nahakeb sonaf nane anbi ton bo'es amtenu in a'lon.

²Anbi sonaf nane Nai Salomo in anmo'e ke'an le antek nak “Ume Naek Nasi Libanon.” In su'at nane on i: in amnanun meter 44, meunuan meter 22, ma in amnanun neki ansae meter 13,5. Ume naek nane in anmu'i in lanan tenu na'ko hau aijob Libanon; lanan mese te ni bo'es am nim ma anbi in fafon nane antao ale suaf na'ko hau aijob Libanon. On po'of nane anmo'e na'ko hau papmese onle suafen ma antefi nani suaf-suan nane.

⁴Klipit anbi a'li ma a'ne'u ume naek nane anbi klipit anmu'i eno kiso-eno kiso: klipit mese anbaina neu eno kiso lanan tenu anbi klipit bian anteni. Eno nane in haunu ma in eno kiso sin mnanun si'uf ha.

⁶Nai Salomo amsa in nahakeb “Ume Naek Ahelat”. In amnanun nane meter 22 ma in meunuan meter 13,5. Ma anmo'e po'an mese anbi ume nane in matan le anmu'i ni ahelat ma anmu'i a'teli.

⁷Ume naek bian esle' “Ume Naek Toko Mnatu” le nakanab amsa nak Ume Naek Lefi Lasi. Ume nane na'ko in nain antia in suafen anamu nani sin neki hau aijob Libanon. Anbi ume i Nai Salomo anlefi ale lasi anbine.

⁸Nai Salomo in bale maika on ume-ume bian ma in es po'an bian anbi Ume Naek Lefi Lasi in kotin. Ma Nai Salomo in nahakeb ume le papmese amsa neu in fetnai na'ko Mesir.

⁹Ale ume le in nahakeb sin nane, nok in po'an nok, na'ko in tu'in antia in apupun, anmo'e nani na'ko fatu-fatu alekot. Fatu-fatu nane naloitan sin anbi bale hani fatu, ma anmepu sin anmatom nok in su'at; fatu-fatu nane in nanan ma in kotin anhaeki sin neki a'heo.

¹⁰Ume-ume nane sin tu'in anmo'e na'ko fatu-fatu naek le maupa. Fatu-fatu nane bian amnanun meter 3,5 ma bian anteni meter 4.

¹¹Ma anbi fafon antao fatu-fatu bian le maupa ma anmepu sin natuin su'at, oke te an obe sin neki hau aijob Libanon.

¹²Baki lape sonaf po'an ma baki lape po'an anbi Ume UISNENO nanan, nok baki lape bale buat anbi Ume UISNENO matan, mese-mese te ni aijob Libanon masapi ketis mese ma fatu masapi ketis tenu.

¹³Anbi kot Tirus anmu'i atoni mese in kanan Nai Huram. Namneo-namneo in atoni mahine mese ma anbi in amonin in anmo'e ale bale na'ko niti molo. In amaf amates nane atoni Tirus mese ma in amsa atoni mahine mese anbi mepu bale na'ko niti molo. In ainaf na'ko uf Naftali. Kesel Nai Salomo anlelu anao nunan Nai Huram nem neu in ma in anfani nakaf neu ale ameput bale niti molo. Ma Nai Huram in nem ma anmepu sa' le Nai Salomo antoti.

¹⁵Nai Huram anmo'e ni nua na'ko niti molo mese-mese in amnanun neki ansae meter 8, ma tani le anius nan meter 5,3, ma in mafaun centi meter 7,4. Ni-ni nane ma'bola anbi sin atnankenu.

¹⁶Ni-ni nane in anmo'e ni nakaf nua na'ko niti molo, mese-mese amnanun meter 2,2 on

¹⁷atuna amasat amnanun neki ansae meter 1,8. Ni mese-mese te anpake noas nani neki lin kase fua nua na'ko niti molo. Ok-oke lin kase fuan natun nua neu ni nakaf mese-mese. Oke te Nai Huram nakano tani heke na'ko niti molo ma antao nani neu ale ni nane. Anbi ni mese-mese anmu'i tani heke makano hitu anbi sin fafon ma anbi tani makano nane sin fafon nane amsa anmu'i kapenit akbubu mese. Anbi kapenit akbubu i in fafon

²¹ale ni sin anakan nane le masan onle uk-uki sufan nane antao nani neu ale ni nane. Ni-ni nane antao nani sin neu eno hen tam neu Ume UISNENO — es anbi bian a'ne'u, ma anbi bian a'li. Abit bain a'ne'u nakanab nak Yakhin, ma abit bian a'li nakanab nak Boas. Onle Nane Nai Huram in nasopu mepu le in mepu ale ni-ni nane.

²³Nalali te Nai Huram anmo'e bale oe mese na'ko niti molo le in akbubu kun, in su'at on i: in amnanun neki ansanu meter 2,2, atnanan meter 4,4 ma anius natef meter 13,2.

²⁴Ma in ninen anfun natef anpake noas nani neki boko fua malunat lanan nua le anlape sin bua-bua neu bale oe niti molo nane.

²⁵Bale oe na'ko niti molo nane antao nani neu bijae niti molo malunat bo'es am nua sin fafon — tenu anbaina neu bian a'li, tenu anbaina neu bian a'ne'u, tenu anbaina neu neno tesan, ma tenu anbaina neu neno saen.

²⁶Bale oe na'ko niti molo nane in mafaun milimeter 75. In ninen onle mako antebi anpoi masan onle uk-uki in sufan. Bale oe na'ko niti molo nane in nan oe oni liter 40.000.

²⁷Nai Huram amsa anmo'e aklet na'ko niti molo bo'mese, mese-mese te in amnanun meter 1,8, menuan meter 1,8, amnanun neki ansae meter 1,3.

²⁸Aklet-aklet nane na'ko le amnanun ma menuan papmese le antao sin anbi ni in ninen nanan.

²⁹Ale bena-bena nane anpake noas sin neki meo asu malunat, bijae malunat ma ahake malunat. Anbi ni ninen nanan — anbi fafon ma pinan meo asu ma bijae malunat nane — tuna makano malunat naboni'on anbine.

³⁰Ale aklet nane mese-mese anmu'i hae akbubu niti molo ha fun hae akbubu ni usaf na'ko niti molo amsa. Anbi aklet nane in si'uf ha sin anmu'i ni le atoni natnat bale oe meu humaf na'ko niti molo le anpake noas neki tuna le nakano nani anbi in aon bian kotin.

³¹Anbi ni ha en nane fafon anlut nani neki ni ninen nanan akbubu mese he natnat bale oe meu humaf nane. Ni-ni atnatas nane anpoi anfini an amunan centimeter 44 anbi bena nane fafon, ma anbi in apinan centimeter 22. Anbi ni ninen nanan nane anmu'i malenat.

³²Ni in hae akbubu sin amnanun centimeter 66; antao sin anbi bena-bena nane a'pinan. Ni usaf in hae akbubu sin nok aklet anfani pa' mese.

³³Ni in hae akbubu sin papmese nok hae akbubu aklet makenat; hae akbubu ninen, aklulun, ni usaf ma aklulun na'ko hae akbubu nane atnanan anmo'e sin ok-oke na'ko niti molo.

³⁴Anmu'i ni atnatas ha anbi si'uf mese-mese anbi aklet nane in apinan. Ni-ni nane anfani pa mese nok aklet nane.

³⁵Anbi aklet nane anfun natef anmu'i ninen in amnanun centimeter 22. In atnatas ma in a'bena sin anfani pa' mese nok aklet.

³⁶Ni-ni atnatas ma in abena sin anpake noas sin neki ahake malunat, meo asu malunat ma hau pet no' malunat anbi bale me le luman neu hen lun nani, nok atuna makano malunat anfun natef.

³⁷Onle nane anmepu ale aklet-aklet nane. Ok-oke huma mese — in masan ma in su'at papmese kun.

³⁸Nai Huram anmo'e bale meu humaf anaek bo'mese mese-mese te neu aklet mese. Bale meu humaf mese in atnanan nane meter 1,8 ma in nan oe liter 800.

³⁹Nai Huram anmo'e aklet nim anbi Ume UISNENO aon bian a'ne'u, ma aklet nim anbi neno aon bian a'li. Bale oe na'ko niti molo in antao anbi neno saen bian a'ne'u.

⁴⁰Nai Huram amsa anmo'e ale tasu, ale skop ma ale mako. Oke te Nai Huram nasopu ale in mepu le Nai Salomo anlek nani he nahakeb Ume UISNENO. Le i ale bale le in anmo'e nalali sin: Ni naek nua Ni nakaf nua onle mako le antao sin neu ni nua en nane sin tunkenu Tani heke makano anbi ni mese-mese sin tunkenu Lin kase niti molo malunat natun ha le naketi sin anbi lanan nua anfun natef tani heke makano anbi ni mese-mese anakan Aklet bo'mese Bale oe meu humaf anaek bo'mese Bale oe niti molo Bijae niti molo bo'es am nua le natnat bale oe niti molo nane Tasu-tasu, ale skop ma ale a'mako. Ale bale neu Ume UISNENO nane, le Nai Huram anmo'e neu Kesel Nai Salomo, anmo'e sin na'ko niti molo ma anfon sin talantia nalim.

⁴⁶Kesel anlenu ma anmo'e ale bale nane anbi bale le anmo'e niti molo Sukot ma Sartan atnanken anbi Nonof Yordan.

⁴⁷Nai Salomo kan lenu fa hen tai ale bale niti molo nane, natuin sin aikenu amfau le'uf. Es nane te ale bale niti molo nane sin amfaukenu ka nahin nani fa.

⁴⁸Kesel Nai Salomo anlenu anmo'e ale bale bian na'ko noni mnatu neu Ume UISNENO. Bale-bale le anmo'e sin le nane esle' i: Baki tulu Mei hen tao utunu' neune he natulu neu Uisneno Tet paku bo'mese le antao sin anbi eno Ke'an Knino Le'uf, him anbi neno a'ne'u ma nim anbi neno a'li Ale tuna Ale paku Ale mako mninut Ale bale he namate paku Ale mako naek Ale pika hen tao fomeni Ale pika hen tao ai flae Ale hensel neu eno Ke'an Knino Le'uf ma eno-eno kotin Ume UISNENO.

⁵¹Leka Kesel Nai Salomo in mepu nalali Ume UISNENO, in antao ale noni muti, noni mnatu, ma ale bale-bale bian anbi ale ke'an-ke'an anbi ume nane, le in amaf Nai Daud natulu nalali sin neu UISNENO.