Read Uab Meto 1 RAJA-RAJA 8 Bible Online

1 RAJA-RAJA 8 - Uab Meto bible

1 RAJA-RAJA 8

¹Nalali te Kesel Nai Salomo anlenu ale mnasi-mnasi uf Israel ma ale anakaf to Israel nem neu in anbi Yerusalem he natnanib Peti Fef Bela UISNENO na'ko Sion, Kot Nai Daud, neu Ume UISNENO.

²Sin al-al sin nem neu Nai Salomo anbi Neno Naek La' Hau No' anbi funan Etanim.

³Leka ale mnasi-mnasi ma ale anakaf to Israel nane sin nem nabua nalali, ale Ana' fuat knino sin naiti Peti Fef Bela nane.

⁴Fun ale Ana' fuat knino ma atoni Lewi sin naiti Peti Fef Bela ma sin amsa natnanib nani Um-ume UISNENO ma ale in bale ok-oke neu Ume UISNENO.

⁵Kesel Nai Salomo ma ale nonot Israel ok-oke sin nabua anbi Peti Fef Bela matan oke te sin natulu neu UISNENO bibi kase ma bijae le kat so'i tabe'i fa sin amfaukenu.

⁶Nalali te ale Ana' fuat knino nane sin neki Peti Fef Bela nane neu Ume UISNENO nanan ma antao nani anbi Ke'an Knino Le'uf anbi ahake neno sin ninen nupun.

⁷Ahake neno sin ninen nane naufon ma an amunan peti nane ma ale hau le anloi peti nane.

⁸Fun hau loi en nane amnanu le'uf, talantia sin tunken tit sin na'ko Ke'an Knino Le'uf matan. (Ale hau nane fe nabala esan talantia neno i.)

⁹Anbi Peti Fef Bela nane nanan katit fa sa' es amsa alaha fatu nua. Fatu-fatu nane Nai Musa es natam nalali sin anbi Tubu Sinai, leka UISNENO anmo'e lasi fef bela nok Israel anbi tabu sin anpoi na'ko Mesir anao neu Kanaan.

¹⁰Anbi tabu ale Ana' fuat knino anpoi na'ko Ume UISNENO nane nok askeken ume nane nahenu nok nope.

¹¹Nope nane mas apinat natuin UISNENO In apinat anbine talantia Ana' fuat knino kan tam anfini fa neu Ume UISNENO he nanaoba sin mepu.

¹²Onane te Nai Salomo in onen toti nak, “Koi UISNENO, Ho es amtao manas anbi neno atnanan. Mes Hom lomi amnesi he mutua anbi nope mesokan in nanan.

¹³Neno i au uhakeb ume amasat mese neu Ko, neu bale Ho mutua anbine talantia nabal-bal.”

¹⁴Leka Kesel Nai Salomo in onen toti nalali te, in nabain'on neu to ok-oke le fe anhake anbi nane, oke te in antoti tetus Uisneno neu sin.

¹⁵In nauab nak, “Afi ahunut UISNENO anmanba'an nalali neu au ama Nai Daud nak on i, ‘Na'ko neno Au eki upoitan Au nonot anpoi na'ko Mesir, anbi pah Israel ok-oke katit fa kot mese amsa le Au beti hen fani bale he hi mihakeb ume neu he miluli mibes neu Kau. Mes ho, Nai Daud, Au beti ko he muplenat Au nonot. Pules maliatas neu Ko UISNENO Israel sin Uisneno le Ho muhakeb mulali Ho lasi manba'an nane!”

¹⁶

¹⁷Ma oke te Nai Salomo in nak, “Au ama Nai Daud in natenab nalali he nahakeb ume luli besa neu UISNENO Israel sin Uisneno.

¹⁸Mes UISNENO nakua a'an neune nak, ‘Ho tenab nane leko.

¹⁹Mes, ka ho fa so mak ho anah es of nahakeb Au ume nane.’

²⁰Neno i UISNENO nanokab nalali In lasi manba'an nane. Au fani Kesel nalali neu Israel au seka au ama, ma au mo'e ulali ume amsa anfani bale luli besa neu UISNENO, Israel.

²¹Anbi Ume UISNENO nane in nanan au uloitan ulali bale neu Peti Fef Bela le matua nok fatu lasi manba'an anbi UISNENO nok hit amaf sin leka In neki sin anpoi na'ko Mesir.”

²²Nalali te, anbi to le nabua sin matan Nai Salomo in anhake anbaina neu baki tulu oke te in naiti in niman nua sin

²³ma in onen toti nak, “Koi UISNENO, Israel! Anbi neno tunan ai anbi pah pinan amsa katit fa es on Ho! Ho munokab Ho lasi manba'an ma Ho mulile Ho manekam neu Ho nonot le na'ki ma natuin Ko nok sin nekan ok-oke.

²⁴Ho munokab mulali Ho lasi manba'an neu au ama Nai Daud. Sa' le Hom ba'an mulali neno i Ho munokab mani.

²⁵Hom ba'an mulali amsa neu au ama mak kalu in sufan sin namneo-namneo natuin Ho plenat on in, onane te mese na'ko in sufan sin of anfani kesel piut neu Israel. Neno i, koi UISNENO Israel, Ho munokab mulali ale sa' le Hom ba'an mulali nane neu Ho ate, au ama Nai Daud.

²⁶

²⁷Mes, koi Uisneno, namneo ka Hom lomi he mutua anbi pah pinan i? Neno tunan ok-oke amsa in menuan ka nanokbon fa neu Ko, sa' anteni ume luli besa le au mo'e le i!

²⁸Koi UISNENO, Ho ate es kau! Maski onane amnen fa au onen totis, ma amsimo fa au han totis neno i.

²⁹So nati' fai manas Ho muneo ma muhafo ume i le Hom beti mulali on bale luli besa neu Ko. So nati' na'ko Ho bale maika anbi sonaf neno tunan Hom nen ma amsako ale au sanat ma Ho nonot sin leka hai aim meu Ko anbi ume i ma am onen toti neu Ko.

³⁰

³¹Leka atoni mese in aon bian natlak in nak in nasanab ma neki in nem neu Ho baki tulu anbi ume luli besa i in nanan he nati' ansup nak in ka nasanab fa,

³²koi UISNENO, so nati' Ho amnen anbi sonaf neno tunan ma mufek Ho ate-ate sin lasi. Amfe kasat neu ale asanat sin anmatom nok sin taos sin mo'et ma mufetin sin le ka nasanab fa.

³³Leka Ho nonot Israel musu anbe'u sin natuin sin nasanab, oke te sin nate'un ma anfani nem neu Ko ma natola Ko on UISNENO, oke te sin nem neu Ko anbi ume luli besa le i ma sin onen ma antoti neu Ko lasi sako sanat,

³⁴so nati' Hom nen sin anbi sonaf neno tunan. So nati' Hom sako Ho nonot sin sanat, ma meki sin anfani nem neu pah le Hom fe mulali neu sin amfenu.

³⁵Leka Ho nonot sin nasanab neu Ko ma Hom fe kasat neu sin ka musanut fa ulan neu sin oke te sin nate'un na'ko sin sanat ma natola Ko on UISNENO, nalali te sin nem neu Ko anbi ume luli besa i ma sin onen ma antoti neu Ko,

³⁶so nati' na'ko sonaf neno tunan Hom nen ma mutnin sin. Ma amsako Ho nonot Israel sin sanat ma sin kesel sin sanat. Munoina sin he nati' sin antao ma anmo'e lasi sa' le amneot. Nalali te, koi UISNENO, so nati' Ho musanut ulan neu Ho pah i, pah le Hom fe mani neu Ho nonot sin hen fani sin in-ini talantia nabal-bal.

³⁷Leka lasi amnahas ai menas amle'ut ansanu nem neu pah i, ma ale mana ma luat anin maputu nale'un, ane namle'u natuin kaun ane ai a'kelo es nale'un, ai leka musu hen laban Ho nonot sin, ai menas nem neu Ho nonot sin, so nati' Hom nen sin onen totis.

³⁸Leka na'ko Ho nonot Israel sin anmu'i le nekan antu' ma nanuka ma sin onen toti neu Ko ma sin natnopan sin niman an ali ume luli besa i,

³⁹so nati' Ho anbi Ho bale maika anbi sonaf neno tunan amnen ma amsako sin sanat ma ambab sin. Al Ho es muhin atoni pah pinan sin nekan nanan. Es nane te so nati' amseunbanin neu mese-mese anmatom nok sin taos sin mo'et,

⁴⁰he nati' Ho nonot natuin Ko piut leka sin fe natua anbi pah le Hom fe mani neu sin amfenu.

⁴¹Leka atoni anao amnemat anbi pah a'lo sin nen neu Ho lasi neka none ma neu ale Ho lasi sanmakat le Ho mo'e mulali neu Ho nonot sin, oke te sin nem anbi ume luli besa i neu he natola Ko ma an onen toti neu Ko,

⁴²

⁴³so nati' na'ko Ho bale maika anbi sonaf neno tunan Hom nen sin onen totis ma amsimo sin han totis. Nok nane te ale uf anbi pah pinan ok-oke sin nahin Ko ma natuin Ho plenat sin on Ho nonot Israel. Sin of nahin nak ume le au uhakeb i nane bale neu he naluli nabes neu Ko.

⁴⁴Leka Ho muplenat Ho nonot sin he sin anao hen maken anlaban musu oke te anbi me amsa sin anbin, sin anbaina neu Ho kot le Hom beti i ma sin an onen an ali ume i le au uhakeb ulali neu Ko,

⁴⁵so nati' anbi sonaf neno tunan Hom nen sin onen totis nane, ma amfe lasi mnisat neu sin.

⁴⁶Leka Ho nonot sin nasanab neu Ko — namneo-namneo katit fa atoni mese amsa le ka nasanab fa — oke te natuin Ho to'as in maputun Ho mufetin sin ma musu nis ma anbe'u sin, ma neki sin onle atoni le anheke nan sin anbi makenat neu pah mese le na'lo ai anhaumak,

⁴⁷so nati' Hom nen sin onen totis. Kalu anbi pah nane sin nasaitan ale sin sanat-sanat sin, ma sin onen toti neu Ko ma sin au ma nak sin nasanab nalali ma sin anmo'e amle'ut, amnen sin onen totis, koi UISNENO.

⁴⁸Kalu anbi pah nane sin nok nek aknino ma namneo-namneo nasaitan sin sanat, ma sin onen toti neu Ko ma anbaina neu pah ik le Hom fe mani neu hai amfenu, an ali kot le Hom beti mani ma ume luli besa le au uhakeb ulali neu Ko i,

⁴⁹so nati' na'ko Ho bale maika anbi sonaf neno tunan so nati' Hom nen sin onen totis ma amnek ma mumnau sin.

⁵⁰Amsako ale sin sanat ma sin tanhais neu Ko, ma anmo'e ale sin musu-musu sin he nati' antao ma anmo'e sin nok alekot.

⁵¹Sin le nane Ho to kun le afi Ho meki sin anpoi na'ko Mesir pah le afi anhamu'i sin anbine.

⁵²So nati' Ho, koi UISNENO, ampanat Ho nonot Israel piut nok sin kesel. Ma nati' Hom lomi hem nen sin onen totis leka sin anbai antoti Ko hem bab sin.

⁵³Koi UISNENO, Hom beti mulali sin na'ko ale uf he sin anfani Ho nonot kun, onle Ho muton mulali neu sin nanete natuin Ho ate Nai Musa, leka Hom tuntaku hai amaf sin anpoi na'ko Mesir.”

⁵⁴Onle nane Nai Salomo anli'tu ma an onen toti anbi baki tulu ma in antopan in niman neki ansae. Nalali te in anfen

⁵⁵ma anhake ma nok hanaf le anaek in antoti tetus Uisneno neu ale atoni le sin nabua anbi nane nak,

⁵⁶“Pules ma liatas neu UISNENO le anfe nalali halan ma tainine neu In nonot onle In anba'an nalali nanete natuin in ate Nai Musa le In natis ma nanokab nalali.

⁵⁷So nati' UISNENO In nok kit onle In nok hit amaf sin. So nati' In ka nasaitan kit fa.

⁵⁸So nati' In anmo'e kit atfani atoni-atoni le na'ki neu In he nati' hit moni piut tatuin In lomin ma tatuin ale In aplenat ma In lekat lulut sin le In anfe nalali sin neu hit amaf sin.

⁵⁹So nati' UISNENO, In namnau piut onen totis ma han totis le au utiaba ulali i neu In. So nati' In nalile In nek mahoet piut neu In nonot Israel ma In kesel ma anfe neu sin sa' le sin nami anbi neno-neno.

⁶⁰Ma nok nane te ale uf anbi pah pinan of sin nahin nak al UISNENO In anmes kun Uisneno, ma katit fa bian anteni.

⁶¹So nati' hi al-al ki, In nonot ki mi'ki piut neu UISNENO, ma mituin ale In aplenat sin ma ale In lekat lulut sin onle hi anmo'e anbi neno i.”

⁶²Nalali onane te Kesel Nai Salomo ma ale to le sin nabua anbi nane sin natulu fua tulu neu UISNENO.

⁶³Neu fua tulu halan Nai Salomo natulu bijae 22.000 ma bibi kase 120.000. Onle nane kesel ma ale to ok-oke sin anmo'e luli besa na'kiab Ume UISNENO.

⁶⁴Neno nane amsa Nai Salomo nakiab po'an anbi atnanan Ume UISNENO matan. Nalali te anbi po'an nane in natulu fua tulu mnotu, fua tulu ane kase, mu'it in balun neu fua tulu halan. Ale fua tulu nane in natulu sin anbi nane.

⁶⁵Anbi Ume UISNENO nane Nai Salomo ma nonot Israel ok-oke sin naliatas Neno Naek La' Hau No' neno hitu in a'lon. Atoni amfau le'uf le sin nabua anbi nane. Sin nem na'ko pah Lanan Hamat anbi bian a'li talantia nakat Mesir anbi bian a'ne'u.

⁶⁶Anbi neno bo'es am fanu Nai Salomo anlenu ale to nane anfani neu sin ume mese-mese. Sin al-al sin anpules Nai Salomo oke te sin anfani neu sin ume mese-mese nok amlilat, natuin ale tetus le UISNENO anfe nalali neu In ate Nai Daud ma neu to Israel In nonot sin.