Read Uab Meto 1 RAJA-RAJA 9 Bible Online

1 RAJA-RAJA 9 - Uab Meto bible

1 RAJA-RAJA 9

¹Leka Nai Salomo nahakeb nalali Ume UISNENO ma kesel in sonaf ma ale sa' le in natenab nani,

²UISNENO nalile anteni In aon neu Nai Salomo onle anbol anbi Gibeon.

³UISNENO nakua a'an neune ma nak, “Ho onen totis nane Au simo ulali, ma nok i te Au uton neu ko nak ume le ho muhakeb mulali i anfani bale le Au beti uteta ani he nati' hi miluli ma mibes neu Kau talantia nabal-bal. Of Au kiso piut ma panat bale i piut.

⁴Kalu hom aetnom meu Kau nok ho nekam aknino ma amneot on ho ama Nai Daud, ma ho mutuin Au plenat ma Au lekat lulut sin,

⁵onane te Au of utis ma unokab Au lasi manba'an neu ho ama Nai Daud nak in sufan batnes neu batnes of sin es naplenat Israel piut.

⁶Mes kalu ho ai ho sufam ankoti Kau ma ka natuin fa ale Au plenat sin ma Au lekat lulut sin ma ho mululi mubes neu uisneno teta,

⁷onane te of Au li'u Au nonot Israel na'ko pah le Au fe ulali neu sin. Au amsa of usaitan ume i le ho muteta mani anfani bale luli besa neu Kau. Anbi me-me of nakle'at ma anmanis atoni Israel.

⁸Ume luli besa i of anfani fatu tutnae talantia atoni mese le anao nok bale nane of in naskek ma namtau. Sin of namolok nak, ‘Nansa' UISNENO antao ma anmo'e onane neu pah ma ume i?’

⁹Ma of atoni natae nak, ‘Natuin sin nasaitan UISNENO, le neki sin amaf sin anpoi na'ko Mesir. Sin naluli ma nabes neu uisneno teta. Es nane te UISNENO nasanut lasi amle'ut i neu sin.’ ”

¹⁰Nai Salomo in nahakeb Ume UISNENO ma kesel in sonaf anbi ton bo'nua in a'lon.

¹¹Ale hau aijob Libanon ma hai aijob bian ka na'ko fa Libanon ma ale noni mnatu le Nai Salomo in anlomi neu he nahakeb ume nane Kesel Nai Hiram anfe nalali sin neune. Leka anmepu nasopu mepu nane, Kesel Nai Salomo anfe kot bo'nua anbi pah Galilea neu Nai Hiram.

¹²Es nane te Nai Hiram in anao ma ankiso sin, mes in kan malin fa nok ale kot nane.

¹³In nak neu Nai Salomo nak, “Au hae ko, kot-kot le hom fe neu kau sin le nane, sin maskenu onane ka?” Es nane te pah nane fe antek nak Kabul.

¹⁴Nai Hiram in ansonu neu Nai Salomo noni mnatu anesi na'ko kilogram 4.000.

¹⁵Kesel Nai Salomo in anpake lanan mepu maseke he nahakeb Ume UISNENO, kesel sonaf, baki lape Yerusalem ma he nae nain anbi Ume UISNENO aon bian a'ne'u. In nahakeb nafani kot Hazor, Megido ma Gezer in anpake lanan mepu maseke amsa. (

¹⁶Kot Gezer nane kot le afi Kesel Mesir anlaban ma anbe'u nani, oke te kot nane tuaken namate nani sin ma sin notu nani kot nane. Namuni te Kesel Mesir anfe kot nane on lasi manekat neu in anfetnai anbi neno in anmamone nok Nai Salomo.

¹⁷Ma Nai Salomo in es nahakeb nafani kot nane.) Nok mepu maseke nane, Nai Salomo nahakeb nafani Bet-Horon-Hilir,

¹⁸Baalat, Tamar anbi mnela snaen Yehuda,

¹⁹kot-kot bale uf aklet makenat ma in bikase sin. Ale in tenab ne'ob ma in salit he nafena Yerusalem, Libanon, ma anbi ale in bale plenat in nanaoba nalali.

²⁰Neu mepu maseke nane Nai Salomo anlenu atoni-atoni Amori, Het, Feris, Hewi ma Yebus. Sin le nane atoni Kanaan sin sufan le atoni Israel ka namate fa sin leka sin antoko pah nane. Talantia neno i sin sufan fe anfani ate.

²²Anbi Israel Nai Salomo kan mo'e fa sin anfani on ate; mes anlenu sin anfani solalus, solalus nakaf, nakaf makenat anaet, nakaf solalus aklet makenat, ma nakaf solalus asae bikase.

²³Ameput 550 Nai Salomo nana'at sin mepu hen panat mepu maseke anbi ale mepu le Nai Salomo he nafena ale mepu.

²⁴Nain anbi Ume UISNENO aon bian a'ne'u Nai Salomo in anae leka in fenai, Kesel Mesir in anfetnai, natnani na'ko Kot Nai Daud neu sonaf le Nai Salomo nahakeb nani neune.

²⁵Hae tenu anbi ton mese in nanan Nai Salomo natulu fua tulu mnotu ma fua tulu halan anbi baki tulu le in nahakeb nalali neu UISNENO. In amsa notu fomeni neu UISNENO. Onane Nai Salomo nasopu mepu fena Ume UISNENO.

²⁶Neu in abnao makenat anbi tasi, Nai Salomo in anmo'e ale abnao anbi Ezion-Geber, anhaumak Elot anbi ninen Tasi Akaba, pah Edom.

²⁷Kesel Nai Hiram ansonu in ameput-ameput abnao le mahine hen lak tasi bua-bua nok Nai Salomo in ameput-ameput abnao sin.

²⁸Ma sin afi anlak tasi anao neu pah Ofir ma sin naiti mnatu kilo 14.000 ma sin neki neu Nai Salomo.