Read Uab Meto 2 RAJA-RAJA 1 Bible Online

2 RAJA-RAJA 1 - Uab Meto bible

2 RAJA-RAJA 1

¹Leka Nai Ahab Kesel Israel anmate, pah Moab anfen ma anlaban Israel.

²Anbi neno mese Kesel Nai Ahazia anmofu na'ko bale toko anbi ke'an fafon in sonaf anbi Samaria, talantia in napap mafena. In ansonu haef he natoti neu Baal-Zebub, uisneno teta kot Ekron anbi Filistin, neu of in naleko ai kahaf.

³Mes ahake UISNENO anlenu Nai Elia, Mafefa knino na'ko Tisbe, anao ma ansenu ale haef na'ko Kesel Nai Ahazia nane he na'uab nak, “Ai anbi Israel katit fa UISNENO talantia hi amnao hem toti fainekat na'ko Baal-Zebub, uisneno teta kot Ekron nane?

⁴Miton nai neu kesel mak UISNENO nakua a'an nak on i, ‘Ho of ka muleko fa, ho of amate!’ ” Leka Nai Elia nanaoba nalali plenat UISNENO nane,

⁵oke te haefen nane sin anfani neu kesel, oke te kesel natoti nak, “Nansa' him fani aim?”

⁶Sin natae nak, “Atoni mese nem natef nok kai, ma anlenu kai hai amfani aim he miton neu ko Usi mak UISNENO nakua a'an on i neu ko Usi, ‘Ai anbi Israel katit fa Uisneno, talantia hom lenu hem toti fainekat na'ko Baal-Zebub, uisneno teta kot Ekron? Ho of ka muleko fa, mes ho of amate!’ ”

⁷“Atoni nane in human onme ka?” onane kesel in natoti.

⁸“In sobalu betkone ma in pasu futu nane na'ko pasu,” onane sin natae. “O, nane Nai Elia!” kesel nak onane.

⁹Oke te in anlenu solalus nakaf mese nok solalus sin bo'nim anao hen heke Nai Elia. Solalus nakaf nane in anao oke te in natef nok Nai Elia in fe antoko anbi nu'af aon bian, ma in nak, “Hoi, ate Uisneno,” onane solalus nakaf nane in nak, “kesel naplenat he hom sanu!”

¹⁰“Kalu namneo au le i ate Uisneno kau,” onane Nai Elia in natae, “so nati' ai ansanu na'ko neno tunan ma notu nani ko mok ale ho solalus sin!” Anbi tabu le nane amsa ai ansanu ma notu solalus nakaf nane nok in solalus sin bo'nim ok-oke.

¹¹Oke te kesel ansonu solalus nakaf mese bian anteni nok in solalus sin bo'nim amsa. Sin anao ma nak neu Nai Elia nak, “Hoi, ate Uisneno, kesel naplenat he nati' anbi tabu le i amsa ho amsanu nai!”

¹²“Kalu namneo au le i ate Uisneno kau,” onane Nai Elia in natae, “so nati' ai ansanu na'ko neno tunan ma notu nani ko mok ale ho solalus sin!” Anbi tabu nane amsa ai ansanu na'ko Uisneno ma notu nani solalus nakaf nane nok in solalus sin bo'nim ok-oke.

¹³Haefes anteni kesel ansonu solalus nakaf mese nok solalus bo'nim. Solalus nakaf nane ansae neu nu'af ma leka in antia Nai Elia in matan in anli'tu ma in nak, “Amsako kai hai sanat, koi ate Uisneno! Amnek mumnau kau nok ale au solalus sin le i. Kais mumate kai!

¹⁴Nakaf solalus nua en bian nane nok sin solalus sin anmate natuin ai na'ko neno tunan, mes au toti ko, amnek mumnau kau!”

¹⁵Anbi tabu nane amsa ahake UISNENO nak neu Nai Elia nak, “Kais mumtau! Mutuin in amsanu nai mu'ko nu'af i.” Es nane te Nai Elia in nok solalus nakaf nane sin anao neu kesel.

¹⁶Oke te Nai Elia nak neu kesel nak, “UISNENO nakua a'an nak, ‘Hom lenu atoni hen toti fainekat na'ko Baal-Zebub uisneno teta kot Ekron onle anbi Israel katit fa Uisneno le nabe'i hom toti neune. Es nane te ho of ka muleko fa, mes ho of amate!’ ”

¹⁷Onane te Nai Ahazia anmate onle UISNENO nak neune nanate natuin Nai Elia. Natuin Nai Ahazia kan mu'i fa anmone, es nane te Nai Yoram in biaf anfani kesel anseka in. Nane anbol anbi tabu Nai Yehoram Nai Yosafat anmone anfani kesel anbi Yehuda nanaoba plenat nan ton nua.

¹⁸Lasi nu'un bian antom sa' le Kesel Nai Ahazia anmo'e antui nalali sin anbi Sulat Anaof na'ko ale Kesel Israel.