Read Uab Meto 2 RAJA-RAJA 10 Bible Online

2 RAJA-RAJA 10 - Uab Meto bible

2 RAJA-RAJA 10

¹Kesel Nai Ahab anmu'i anah upuf bo'hitu anbi kot Samaria. Es nane te Nai Yehu antui sulat ma ansonu neu Samaria neu ale apanat Nai Ahab in anah upuf sin ma neu ale anakaf ma neu ale atomatas anbi kot nane. Sulat nane in nahan nak on i,

²“Hi es ampao ma ampanat Nai Ahab in anah upuf sin, ma hi mu'i aklet makenat, bikase, bale manuat ma kot mabaki lape. Es nane te, milab nai leka him simo sulat i,

³him beti es le alekot abainesit na'ko Nai Ahab in anah upuf sin hen fani kesel, oke te mabe'u nai hem pesi in.”

⁴Ale ana' aplenat Samaria sin namtau. Sin nak, “Kesel Nai Yoram ma Kesel Nai Ahazia amsa sin ka nabe'i fa hen laban Nai Yehu, nansa anteni hit!”

⁵Es nane te nakaf sonaf nanan ma ana' aplenat kot nanan nok ale atomatas to ma ale apanat apaot anah upuf na'ko Nai Ahab nane sin ansonu hanaf i neu Nai Yehu nak, “Hai miusi neu ko Usi ma haim lomi he minaoba sa' le Usi ho muplenat neu kai. Hai of ka maiti fa es amsa hen fani kesel. Munaoba sa' le alekot kun natuin Usi ho lomim.”

⁶Oke te Nai Yehu ansonu anteni sulat neu sin, in hanan nak, “Kalu him pesi mok kau, ma him lomi he mituin au plenat sin, mimate Nai Ahab in anah upuf sin, ma noka fa tabu onle i hi meki ale sin anakan neu kau anbi Yizreel.” Kesel Nai Ahab in anah upuf sin natua anbi atomatas-atomatas kot Samaria, ma sin anpanat ma anpao sin.

⁷Leka sin ansimo Nai Yehu in sulat, atomatas-atomatas kot Samaria nane sin namate Nai Ahab in anah upuf sin bo'hitu nane oke te antao sin anakan neu poni nanan ma ansonu sin neu Nai Yehu anbi Yizreel.

⁸Leka sin naton lasi nane neu Nai Yehu, in anfe plenat he nati' anakfen nane natupu sin tupu nua anbi eno naek kot, ma nabela sin anbi nane antia noka fa.

⁹Noka fa onane te Nai Yehu anpoi neu eno naek, oke te in nak neu atoni-atoni le sin nabua anbi nane nak, “Au es a malokin lasi ma laban Kesel Nai Yoram ma umate in; hi ka misanab fa anbi lasi nane. Mes atoni-atoni le i ok-oke au es ka umate fa sin.

¹⁰Lasi i anfani atakaf nak ale sa' le UISNENO nakua nalali In a'an antom Nai Ahab in anah upuf sin of anbol. UISNENO nanaoba nalali sa' le In naton nalali nanete natuin In ate Nai Elia.”

¹¹Nalali te Nai Yehu in namate Nai Ahab in biaf benuf sin le natua anbi Yizreel, ma ale in ate sin, ma ale in sob-leko sin ma in ana' fuat sin; katit fa es amsa le nafetin hen moni.

¹²Nai Yehu nasaitan Yizreel oke te in anao neu Samaria. Anbi lanan atnanan, anbi bale le antek nak “Kua Atukus”,

¹³in natef nok Nai Ahazia Kesel Yehuda in biaf in benuf sin. In natoti sin nak, “Hi sekau ki ka?” Sin natae nak, “Nai Ahazia in biafen sin anah es kai.” “Hai hem nao meu Yizreel hem kiso kesel in ume nanan sin ok-oke ma Kesel fenai bi Izebel in anah upuf sin.”

¹⁴Nai Yehu anfe plenat neu in ate sin nak, “Amheke sin nok ahonis!” Ma sin anheke atoni-atoni nane, oke te namate sin anhaumak oe hani le anmeto, sin al-al sin atoni bo'ha am nua. Katit fa es amsa le nafetin hen moni.

¹⁵Nai Yehu in anao anfini. Anbi lanan atnanan, Nai Yonadab Nai Rekhab anmone ansenu in. Nai Yehu anhosen in ma nak, “Ai hit ka nekaf mese kit fa ka? Hom lomi ka hem tuntaku kau?” Nai Yonadab natae nak, “Au lomi.” “Kalu onane, aum he hit atmatopu nimaf,” Nai Yehu ansuli onane. Sin anmatopu nimaf, ma Nai Yehu anbab Nai Yonadab nasaeb in neu in aklet nanan,

¹⁶ma nak neune nak, “Aum mutuin ma amsaksi meki ho matam neu onme au mepu uhelnok neu UISNENO.” Oke te sin bua-bua ansae aklet nao neu Samaria.

¹⁷Leka sin nem antia bale nane Nai Yehu namate Nai Ahab in biaf in benuf sin ok-oke, katit fa es le he nabalah. Lasi nane anbol anmatom nok sa' le UISNENO naton nalali neu Nai Elia.

¹⁸Nai Yehu anlenu to Samaria nabua oke te in nak, “Kesel Nai Ahab ka naluli nabes fa leko neu Baal; au of ululi ubes neu Baal anesi anteni na'ko in.

¹⁹Es nane te mibuab ale Mafefa Knino Baal ma in aluli abesa sin ma ale in ana' fuat sin; es amsa ka nabe'i fa he ka nok fa. Au of utulu fua tulu le anaek neu Baal. Sekau le ka nok fa of namate in.” Mes nane alaha lasi fulit mese na'ko Nai Yehu he namate ale aluli abesa neu Baal.

²⁰Nai Yehu anfe plenat i nak: “Ambeti miteta neno mese neu he miluli ma mibes neu Baal!” Es nane te sin anbeti nateta neno nane

²¹ma Nai Yehu in an etun ma naton lasi nane neu Israel ok-oke. Anbi neno nane ale aluli ma abesa neu Baal sin ok-oke, katit fa es amsa le he namaika. Sin antam ok-oke neu ume le'u Baal ma sin nahenu ume nane na'ko ume matan talantia ume kotin.

²²Nai Yehu anfe plenat he nati' ameput bale pake anbi ume le'u nane anfe ale bale pake nane neu atoni-atoni le nem he naluli nabes neu Baal. Leka nanaoba nalali plenat nane,

²³Nai Yehu antam neu ume le'u Baal nane nok Nai Yonadab Nai Rekhab anmone, ma in nak neu atoni-atoni le anbi nane nak, “Amtae milek-leko nai ai ale abuat anbi i alaha aluli ma abesa neu Baal. Kaisa abuat le nabua anbi i anmu'i atoni le naluli nabes neu UISNENO.”

²⁴Oke te Nai Yehu ma Nai Yonadab sin natulu fua tulu neu Baal. Anbi ume nane kotin, Nai Yehu nahakeb in ate ma in solalus nakaf sin 80. In amsa anfe nalali plenat i neu sin nak, “Hi mes mimate ale atoni nane ok-oke. Sekau nafetin es na'ko sin ma in naen nafetinon, of namate in anseka atoni nane!”

²⁵Leka Nai Yehu natulu nalali fua tulu nok labah in anpoi ma in nak neu ale apaot ma solalus nakaf sin nane nak, “Amtam nai ma mimate sin ok-oke. Kais mifetin atoni mese amsa he naen nafetinon!” Ma sin antam neki suni le nosu nani, ma namate ale atoni le anbi nane ok-oke, oke te sin anhel napoitan sin aon nitun ok-oke anpoi na'ko nane. Nalali te sin antam neu ume le'u nanan,

²⁶ma sin napoitan uisneno teta Baal oke te sin notu nani.

²⁷Ma uisneno teta nane sin nale'un nani nok in ume le'u oke te bale nane anmo'e anfani bale polin oe ai ma'lafu talantia neno i.

²⁸Onle nane Nai Yehu naneku nani nok lek-leko luli besa neu Baal anbi Israel.

²⁹Es nane te UISNENO nakua a'an neu Nai Yehu nak, “Ale sa' le Au uplenat neu ko he munaoba neu Nai Ahab in sufan sin ho munaoba mulalien. Es nane te Au manba'an ak ho anah upuf sin antia batan ha of anfani kesel neu Israel.” Mes Nai Yehu ka natuin fa UISNENO, Israel sin Uisneno In aplenat nok in nekan ok-oke. In natuin taos mo'et na'ko Nai Yerobeam le naluli nabes neu bijae noni mnatu le in nahakeb anbi Betel ma anbi Dan.

³²Anbi tabu nane UISNENO anhaklelat pah Israel. Nai Hazael kesel Siria in nasik nan pah Israel ok-oke,

³³na'ko Noe Yordan neno saen talantia kot Aroer neno aonbian a'ne'u anhaumak Noe Arnon, natam nan pah Gilead ma Basan, ma bale na'ko uf Gad, Ruben ma Manasye neno saen.

³⁴Lasi nu'un bian antom Nai Yehu, ale sa' le in anmo'e on atoni meo pa'e, antui nalali sin anbi Sulat Anaof ale Kesel na'ko Israel.

³⁵Nai Yehu ana' aplenat on Kesel Israel ton bo'nua am fanu. In nasaebon ma ansub in anbi Samaria. Oke te Nai Yoahas in anmone anfani kesel anseka in.