Read Uab Meto 2 RAJA-RAJA 13 Bible Online

2 RAJA-RAJA 13 - Uab Meto bible

2 RAJA-RAJA 13

¹Anbi ton bo'nua am tenu leka Nai Yoas Nai Ahazia anmone anfani Kesel Yehuda, Nai Yoahas Nai Yehu anmone anfani kesel anbi Israel ma in ana' aplenat anbi Samaria ton bo'es am hitu.

²Papmese on Kesel Nai Yerobeam le ana' aplenat nahunun in, Nai Yoahas anmo'e sanat neu UISNENO ma anmo'e to Israel sin nasanab amsa. In ka nasaitan nit fa ale in taos in mo'et amle'ut sin amsa.

³Es nane te UISNENO nato'an to Israel talantia In nafetin Nai Hazael kesel Siria ma in anmone Nai Benhadad, sin nis ma anbe'u Israel piut-piut.

⁴Oke te Nai Yoahas in onen toti neu UISNENO, ma UISNENO au neu In onen nane, natuin UISNENO nit neu kesel Siria nameku to Israel mafena anae le'uf.

⁵UISNENO anfe neu Israel afetin mese le nafetin sin na'ko Siria in kuasat talantia sin anmoni nok tainine anteni on afi ahunut.

⁶Maski onane amsa atoni Israel ka nasnas fa na'ko anmo'e ale sanat le afi Kesel Nai Rehabeam anmo'e nalali. Sin anmo'e sanat nane piut, ma sin nafetin le'u mahuma uisneno teta Fenai Asyera anhake piut anbi Samaria.

⁷Kesel Siria nale'un nalali solalus amakenat Israel talantia Kesel Nai Yoahas alaha in anmu'i solalus asae bikase 50, aklet makenat 10, ma solalus 10.000.

⁸Lasi nu'un bian antom Kesel Nai Yoahas ma ale in amonin on meo pa'e antui nalali sin anbi Sulat Anaof ale Kesel Israel.

⁹In nasaebon ma ansub in anbi Samaria. In anmone Nai Yoas anfani kesel anseka in.

¹⁰Anbi ton bo'tenu am hitu Kesel Nai Yoas in ana' aplenat anbi Yehuda, Nai Yoas Nai Yoahas anmone anfani kesel anbi Israel ma in naplenat anbi Samaria ton 16.

¹¹In amsa anmo'e sanat neu UISNENO natuin in mo'e natuin ale lasi amle'ut Kesel Nai Yerobeam le anhel to Israel ma sin anmo'e sanat.

¹²Lasi nu'un bian antom Kesel Nai Yoas, ma in amonin on meo pa'e anbi makenat anlaban Nai Amazia Kesel Yehuda, antui antui nalali sin anbi Sulat Anaof ale Kesel Israel.

¹³Nai Yoas nasaebon ma ansub in anbi ale kesel sin naukel anbi Samaria. In anmone Nai Yerobeam II anfani kesel anseka in.

¹⁴Anbi tabu mese Mafefa Knino Nai Elisa namen mafena, ma Kesel Nai Yoas nem ma ankiso in. Leka in ankiso nit nak ala kle'ot Nai Elisa hen mate, kesel nane ankae ma nak, “Koi au Ama, koi au Ama, apesit anaet to Israel!”

¹⁵Nai Elisa anlenu in nak, “Maiti ho klaot ma in as'anef sin!” Nai Yoas in naiti sin,

¹⁶oke te Nai Elisa anlenu in he naloitan neu he naklao. Kesel amsa naloitan, ma Nai Elisa antao in niman neu kesel niman.

¹⁷Nalali te anmatom nok sa' le Mafefa knino nane anlenu, kesel anfai eno kiso le anbaina neu Siria. Nai Elisa anlenu in nak, “Muklaon ho as'anef nai!” Nok labah leka kesel naklaon nalali in aklaot nane, Mafefa knino nane anbai nak, “UISNENO In aklaot es ko. Nok aklaot nane UISNENO In of nis ma anbe'u Siria. Of ho maken ma amlaban atoni Siria anbi Afek talantia ho mis ma ambe'u sin.”

¹⁸Nai Elisa anlenu Kesel Nai Yoas naiti in as'anef bian sin ma antepon sin neu nain, kesel anbeso nain hae tenu, oke te in nasnas.

¹⁹Nai Elisa in nato', ma in nak, “So mes hom beso nain talantia hae nim ai hae ne, of nabe'i ho mule'un muskuku to Siria. Mes of ho mis ma ambe'u in alaha hae tenu.”

²⁰Ma namuni ka lo fa na'ko nane Nai Elisa anmate ma ansub in. Anbi batan nane pukan asikat atoni Moab sin antak antam neu pah Israel hae mese anbi ton mese he nasik.

²¹Anbi neno mese leka atoni fauk-fauk sin fe ansub atoni amates mese, nok askeken sin nit pukan atoni asikat Moab sin nem. Ma sin anpolin amates nane neu Nai Elisa in naukel oke te sin naenan. Leka atoni amates nane in aon nitun antoman Nai Elisa in nuifen, amates nane anmoni anfani oke te in anfen anhake.

²²Leka Nai Yoas in ana' aplenat, Nai Hazael kesel Siria anhamu'i atoni Israel piut.

²³Mes UISNENO In nek ma namnau In nonot ma In ansako sin sanat. In kan lomi fa nale'un sin mes In anbab sin, natuin In lasi manba'an nok Nai Abraham, Nai Ishak ma Nai Yakub. Talantia neno i In ka nikan fa In nonot sin.

²⁴Namuni te Nai Hazael kesel Siria anmate, ma in anmone Nai Benhadad anfani kesel.

²⁵Oke te Nai Yoas Kesel Israel in nis ma anbe'u Nai Benhadad hae tenu ma in nasik nafani kot-kot le Nai Benhadad nasik nan sin anbi neno Nai Yoas amaf Nai Yoahas in ana' aplenat.