Read Uab Meto 2 RAJA-RAJA 14 Bible Online

2 RAJA-RAJA 14 - Uab Meto bible

2 RAJA-RAJA 14

¹Anbi ton nua Nai Yoas Nai Yoahas anmone in ana' aplenat anbi Israel, Nai Amazia Nai Yoas anmone anfani kesel anbi Yehuda.

²Anbi tabu nane in uan ton bo'nua am nim, ma in naplenat anbi Yerusalem ton bo'nua am sio. In ainaf bi Yoadan na'ko Yerusalem.

³Nai Amazia antao ma anmo'e lasi le anhalin UISNENO In nekan, mes in ka on fa in amuf Nai Daud. On in amaf,

⁴in amsa ka naneku fa ale bale luli besa uisneno teta, talantia to natulu piut ma notu atu fomeni bale nane.

⁵Leka in atokon nahel ma namep, Nai Amazia namate in ate-ate sin le namate in amaf.

⁶Mes in ate-ate sin anhenu in ka namate fa sin, natuin in natuin plenat UISNENO anbi Sulat Nai Musa le in hanan nak, “Kais mumate amaf sin natuin lasi amle'ut le sin anah-anah sin anmo'e, ma kais mumate anah-anah sin natuin lasi amle'ut le sin amaf sin anmo'e. Atoni mese nabe'i namate natuin lasi amle'ut le in anmo'e kun.”

⁷Anbi makenat ma manuat mese, Nai Amazia namate solalus Edom atoni 10.000 anbi Nonof Minmali, ma nasik nan kot Sela. Kot nane in nakanab Yokteel. Talantia neno kot nane in kanan Yokteel.

⁸Nalali te Nai Amazia ansonu haef neu Nai Yoas Kesel Israel he nati' anlaban in anbi makenat.

⁹Mes Kesel Nai Yoas in ansonu han taes i, “Anbi tabu mese kisan makatila anbi Nuaf Libanon ansonu hanaf i neu hau aijob, nak, ‘Hoi hau aijob, amfe ho anfeto neu au anmone hen fani in fenai.’ Mes namuni te mu'it fui mese in anao nok bale nane le anteli nale'un kisan makatila nane.

¹⁰Mes ho, Amazia, ho mumoko'om mulalilen, natuin ho mis ma ambe'u mulali atoni Edom. Nah, ai lasi mnisat nane ka noka fa ka? Leko nesi ho mumaika mubalah anbi ho ume! Neu sa' ho mami lasi le al of nale'un ho aom ma ho to?”

¹¹Mes Nai Amazia Kesel Yehuda in ka nen nani fa Nai Yoas Kesel Israel in hanan nane. Es nane te, Kesel Nai Yoas nok in solalus sin anfen ma anao neu Bet-Semes anbi Yehuda ma anmaken nok Nai Amazia anbi nane.

¹²In nis ma anbe'u solalus Yehuda ma in solalus sin naen anfani neu sin ume mese-mese.

¹³Nai Yoas anheke Nai Amazia, ma in anao neu Yerusalem ma anpukai baki lape kot nane amnanun oni meter natun nua, na'ko Eno Naek Efraim talantia Eno Naek Si'un.

¹⁴Ale noni mnatu ma noni muti ma ale bale pakaet le in napeni sin anbi Ume UISNENO, onane amsa ale a'maus anbi sonaf nanan, nok atoni fauk-fauk le anbi nane Nai Yoas neki sin anao neu Samaria.

¹⁵Lasi nu'un bian antom Kesel Nai Yoas, ma in amonin on meo pa'e anbi makenat anlaban Nai Amazia Kesel Yehuda antui nalali sin anbi Sulat Anaof ale Kesel Israel.

¹⁶Nai Yoas nasaebon ma ansub in anbi naukel ale kesel anbi Samaria. Nai Yerobeam II in anmone anfani kesel anseka in.

¹⁷Leka Nai Yoas Kesel Israel anmate, Nai Amazia Kesel Yehuda fe in anmoni ton 15 anteni.

¹⁸Anbi Yerusalem anmu'i amalokin lasi pukan mese he namate Nai Amazia. Es nane te in naen neu Lakhis, mes in musu-musu sin anli'u in antia bale nane ma namate in. In aon nitu nasaeb neu bikase neki anao neu Yerusalem, oke te ansub in anbi kesel sin naukel anbi Nai Daud in Kot. Ma to Yehuda sin nasaeb Nai Uzia, Nai Amazia anmone anfani sin kesel. Anbi tabu nane Nai Uzia in fe nan ton 16. Lasi nu'un bian antom Kesel Nai Amazia antui nalali sin anbi Sulat Anaof na'ko ale Kesel Yehuda.

²²Leka in amaf anmate nalali, Nai Uzia nasik nan nafani kot Elat ma nahakeb nafani anteni.

²³Anbi ton bo'es am nim Nai Amazia Nai Yoas anmone in ana' aplenat anbi Yehuda, Nai Yerobeam II Nai Yoas anmone anfani Kesel Israel, ma naplenat anbi Samaria ton 41 sin a'lon.

²⁴In nasanab neu UISNENO, fun in natuin taos mo'et amle'ut. Kesel Nai Yerobeam I le anfuli atoni Israel anmo'e sanat.

²⁵Nai Yerobeam II le i in es nasik nan nafani ale nakat Israel ok-oke, na'ko lanan anao neu Hamat anbi bian a'li talantia Tasi Maten anbi bian a'ne'u. Lasi nane anmatom nok lasi manba'an UISNENO atoni Israel, nanete natuin In ate, Mafefa Knino Nai Yunus Nai Amitai anmone atoni Gat-Hefer.

²⁶Fun UISNENO nit nalali atoni Israel sin susal nukat ma'fen le'uf, ma katit fa es amsa le hen bab sin.

²⁷UISNENO kan lomi fa he nale'un naskuku Israel talantia nabal-bal, es nane te In anbab sin nanate natuin Kesel Nai Yerobeam II.

²⁸Lasi nu'un bian antom Kesel Nai Yerobeam II, ma in monin on meo pa'e anbi makenat ma manuat ma in nasik nan nafani Damsyik onme ma Hamat na'ko Yehuda neu Israel, antui nalali sin ok-oke anbi Sulat Anaof na'ko ale Kesel Israel.

²⁹Nai Yerobeam II nasaebon ma ansub in anbi kesel sin naukel. In anmone Nai Zakharia anfani kesel anseka in.