Read Uab Meto 2 RAJA-RAJA 16 Bible Online

2 RAJA-RAJA 16 - Uab Meto bible

2 RAJA-RAJA 16

¹Anbi ton bo'es am hitu Kesel Nai Pekah Nai Remalya anmone ana' aplenat anbi Israel, Nai Ahas Nai Yotam anmone anfani Kesel Yehuda.

²Anbi neno nane in uan ton 20 ma in naplenat ton 16 anbi Yerusalem. In ka natuin fa taos mo'et alekot na'ko Kesel Nai Daud, in na'if nane, mes in antao ma anmo'e lasi le kan halin fa UISNENO In nekan.

³In anmoni on ale Kesel Israel, ma anesi na'ko nane in natulu in anmone on fua tulu neu uisneno teta anmatom nok lasi amle'ut atoni-atoni le UISNENO anli'u sin na'ko pah Kanaan leka atoni Israel antam anbi pah nane.

⁴Nai Ahas natulu fua tulu ma notu atu fomeni anbi bale-bale luli besa uisneno teta anbi tubu tunan ma anbi ale hau naek sin ukenu.

⁵Anbi tabu nane kesel Edom naplenat nafani kot Elat ma anli'u atoni-atoni Yehuda le sin natua anbi nane. Atoni Edom namuni te sin nem ma natua nabalah anbi kot nane talantia neno i. Anbi tabu nane amsa Nai Rezin kesel Siria ma Nai Pekah kesel Israel sin nape' ma anfun natef nan Yerusalem, mes kan be'u fa Nai Ahas.

⁷Nai Ahas ansonu haef neu Nai Tiglat-Pileser kesel Asyur neki a'at i, “Ho ate kau le au u'ki neu ko; au toti neu ko, hom koenom aum ma mufetin kau na'ko kesel Siria ma Kesel Israel le fe nape' ma anfun natef nan kau.”

⁸Nai Ahas amsa in naiti mnatu ma noni muti na'ko Ume UISNENO, ma maus anbi sonaf, oke te ansonu sin on atnatas neu kesel Asyur.

⁹Kesel Nai Tiglat-Pileser ansimo han totis Nai Ahas, oke te in nape' ma nasik nan Damsyik. To le in nis sin anbi makenat in neki sin anao neu Kir, ma sin kesel, es Kesel Nai Rezin, in namate nani.

¹⁰Leka Kesel Nai Ahas in anao neu Damsyik naeku nok Kesel Nai Tiglat-Pileser, in nit baki tulu anbi kot nane. Oke te in ansonu Ana' Fuat Knino Nai Uria anbi Yerusalem lulat matui baki tulu nane nok in su'at papmese le anmatom lek-leko.

¹¹Ma Nai Uria in nahakeb baki tulu mese anmatom nok lulat baki tulu ma su'at le in ansimo nane, ma in anmepu nasopu nani, nahunun na'ko Nai Ahas fe kan fani nem fa.

¹²Leka in anfani nem na'ko Damsyik, Nai Ahas in nit baki tulu nane nahakeb nalali.

¹³Oke te in natulu fua tulu mu'it ma fua tulu ane kase anbi baki tulu nane in fafon. In amsa an'op fua tulu tua mina mtasa ma na' na'ko fua tulu halan anbi baki tulu nane in fafon.

¹⁴Nai Ahas in nit nak baki tulu niti molo le anbeti nateta neu UISNENO anhake anbi Ume UISNENO ma baki tulu fe'u sin atnanken. Es nane te baki tulu niti molo nane in natnanib nani na'ko eno Ume UISNENO neu baki tulu fe'u nane in aon bian a'ne'u.

¹⁵Oke onane te in nak neu Nai Uria nak, “Ampake au baki tulu anaek i he motu fua tulu nok-noka ma fua tulu anbi fai le kesel ma to natulu, ma am'op anbi nane fua tulu tua min kase na'ko to. Am'op amsa ale mu'it na' le natulu neu baki tulu nane in fafon. Ma baki tulu niti molo amna nane mautu he au pake he toti fainekat na'ko ale asmanaf.”

¹⁶Nai Uria in nanaoba kesel in aplenat.

¹⁷Nalali te Nai Ahas anpukai ale aklet niti molo le anpake anbi Ume UISNENO, ma in naiti ale bale oe na'ko ale aklet nane. Bale oe anaek le bijae niti molo bo'es am nua anloi nani in naiti amsa ma in antao nani anbi bale le ansuki neki fatu.

¹⁸Oke te he nati' anhalin kesel Asyur nekan, Nai Ahas anpukai kesel balan le to nem neune anbi Ume UISNENO, ma an ek eno le kesel nanoebon antam nokan.

¹⁹Lasi nu'un bian antom Kesel Nai Ahas antui nalali sin anbi Sulat Anaof na'ko ale Kesel Yehuda.

²⁰Nai Ahas nasaebon ma ansub in anbi naukel ale kesel sin anbi Nai Daud in Kot. In anmone Nai Hizkia anfani kesel anseka in.