Read Uab Meto 2 RAJA-RAJA 17 Bible Online

2 RAJA-RAJA 17 - Uab Meto bible

2 RAJA-RAJA 17

¹Anbi ton bo'es am nua Kesel Nai Ahas ana' aplenat anbi Yehuda, Nai Hosea Nai Ela anmone anfani kesel anbi Israel, ma in naplenat anbi Samaria ton sio.

²In nasanab neu UISNENO, mes in sanat ka namfau fa on ale Kesel Israel le sin ana' aplenat nahunun in.

³Nai Salmaneser kesel Asyur anken in ma nis ma anbe'u in, talantia ton-ton in mes anbaen noni poni neu kesel Asyur.

⁴Mes anbi neno mese, Nai Hosea ansonu haef neu Nai So Kesel Mesir ma antoti hen bab in. Oke te Nai Hosea in nasnas ma kan baen fa noni poniton neu Asyur. Leka Nai Salmaneser in nen antom taos mo'et Nai Hosea nane, in anheke Nai Hosea ma natam in neu o'of nanan.

⁵Nalali te Nai Salmaneser kesel Asyur nape' Israel ma anfun natef nan Samaria. Anbi ton tenu na'ko anfun natef nan bale nane,

⁶— le anfani ton sio Nai Hosea ana' aplenat — Nai Salmaneser nasik nan Samaria. Oke te atoni Israel le nis nan sin anbi makenat in naiti neki sin anao neu Asyur. Bian na'ko sin in antao sin anbi kot Halah, ma bian anhaumak Noe Habor anbi pah Gozan, bian anteni anbi kot-kot anbi pah Madai.

⁷Samaria in anmofu natuin atoni Israel nasanab neu UISNENO, le nafetin nalali sin na'ko Kesel Mesir, ma neki sin anpoi na'ko pah nane. Sin naluli ma nabes neu uisneno teta,

⁸ma sin natuin taos mo'et ale uf le UISNENO anli'u nalali sin na'ko neno to Israel ansae ma anken uf-uf nane. To Israel sin natuin taos mo'et le ale Kesel Israel sin natetab nalali,

⁹ma antao ma anmo'e ale lasi le UISNENO kan lomi nani fa. Sin nahakeb bale-bale luli besa neu uisneno teta anbi ale sin kot, hen bi kot an-ana ai anbi kot anaek.

¹⁰Anbi ale tubu amnanut sin tunken, ma anbi ale hau naek sin ukenu, sin nahakeb ale ni fatu ma le'u mahuma uisneno teta Fenai Asyera.

¹¹Sin amsa notu atu fomeni anbi ale baki tulu neu uisneno teta, onle taos mo'et uf-uf le UISNENO anli'u nalali sin na'ko pah Kanaan. Sin naluli nabes neu hau le'u ma fatu le'u maski UISNENO nakain nalali sin. Ale sin taos ma sin mo'et amle'ut nane nafena UISNENO In to'as.

¹³UISNENO ansonu ale haef ma ale In Mafefa knino sin neu nonot Israel ma Yehuda he natiaba neu sin lasi mnatu i: “Misnas nai na'ko amtao lasi amle'ut ma mituin nai ale aplenat ma lekat lulut le Au fe ani neu hi amfen nanete natuin ale Mafefa knino, Au ate-ate nane sin.”

¹⁴Mes Israel ma Yehuda sin kan lomi fa he nen. Sin a'nak fatu on sin amfen le sin nekan ka nateb fa neu UISNENO.

¹⁵Israel ma Yehuda sin kan lomi fa he natuin UISNENO In plenat-plenat sin ma sin ka na'ki fa neu lasi manba'an le sin anmo'e nalali nok sin amfenu. Fun sin kan lae ma kan sian fa In fainekat-fainekat sin, mes sin naluli ma nabes neu hau le'u ma fatu le'u le ka maota fa, talantia sin amsa anfani ka maota fa. Sin natuin taos mo'et uf-uf le anhaumak sin, maski UISNENO nakain nalali sin.

¹⁶Sin antanhai ale plenat UISNENO, ma anmo'e bijae nua na'ko noni molo he naluli ma nabes neune. Sin anmo'e le'u mahuma uisneno teta Fenai Asyera, naluli ma nabes neu ale afkun ma naluli ma nabes neu uisneno teta Baal.

¹⁷Sin natulu ma natnat sin anhenu on fua tulu mnotu neu sin uisneno teta. Sin anpake le'u mahine ela-ela amle'ut ma antoti fainekat na'ko ale mnane le nabe'i anmalut nok ale asmanaf amle'ut. Sin nahelnok matani antao ma anmo'e ale lasi le kan halin fa UISNENO In nekan

¹⁸talantia UISNENO nato'an sin matani ma kan lae ma kan sian fa sin anteni. In anpolin sin na'ko pah le In anfe nalali neu sin; ale aplenat Yehuda es nabalah.

¹⁹Atoni-atoni Yehuda amsa ka natuin fa plenat-plenat UISNENO. Sin natuin ale taos mo'et atoni Israel,

²⁰es nane te UISNENO antite nonot Israel ok-oke. In ankas sin ma nana'at sin neu sin musu-musu sin le kan mu'i fa lasi manekat. In kan lae ma kan sian fa sin anteni mes anpolin sin na'ko pah le In anfe nalali neu sin.

²¹Leka UISNENO anbeti nateta Israel na'ko Yehuda, atoni Israel sin naiti Nai Yerobeam Nai Nebat anmone anfani sin kesel. Oke te Nai Yerobeam anmo'e sin nasaitan UISNENO ma antao ma anmo'e sanat-sanat le anae le'uf kun.

²²Sin natuin taos mo'et Nai Yerobeam ma sin anmo'e ale sanat piut le sin anmo'e,

²³talantia namuni te UISNENO kan lae ma sian fa sin anteni, mes anpolin sin na'ko pah le In anfe neu sin. Lasi nane anbol anmatom nok lasi amnaut le UISNENO anfe nani neu sin nanete natuin In ate-ate sin, ale Mafefa knino. Onle nane naiti neki atoni Israel neu bale polin anbi Asyur, ma sin natua anbi nane talantia neno i.

²⁴Anfani on aseka atoni Israel le naiti neki sin neu bale polin nane, kesel Asyur natokob sin anbi kot-kot Samaria, atoni-atoni na'ko Babel, Kuta, Awa, Hamat, ma Sefarwaim. Atoni-atoni nane antoko kot-kot nane ma sin natua nabalah anbi nane.

²⁵Anbi tabu fe sin natua anbi bale nane sin kan tola fa UISNENO; es nane te UISNENO ansonu ale asu fui ma anpisu bian na'ko sin.

²⁶Oke te atoni naton lasi nane neu kesel Asyur nak atoni-atoni le in natokob sin anbi kot-kot Samaria sin ka nahin fa uisneno pah nane in plenat-plenat sin. Es nane te uisneno nane in ansonu asu fui ma anpisu sin.

²⁷Es nane te kesel Asyur anfe plenat he nati' Ana' fuat knino mese na'ko sin le nis sin anbi makenat ma la anpolin neu Asyur, ansonu nafani in neu Samaria. Kesel nak, “Amlenu in anao anfani ma natua anbi nane he nati' in nanoina atoni-atoni nane plenat-plenat uisneno pah nane.”

²⁸Es nane te Ana' fuat knino Israel mese, le naiti neki in nalali na'ko Samaria neu Asyur, in anao anfani ma natua anbi Betel. Anbi nane in nanoina to neu onme he naluli nabes neu UISNENO.

²⁹Mes atoni-atoni le natua anbi Samaria nane sin anmo'e piut hau le'u ma fatu le'u ma sin antao anbi ume-ume le'u le afi atoni-atoni Israel sin nahakeb nani leka sin natua anbi kot nane. Uf mese-mese sin anmo'e kun sin hau le'u ma sin fatu le'u anbi kot le sin natua anbine:

³⁰Atoni Babel sin anmo'e le'u mahuma uisneno teta Sukot-Benot, atoni Kuta sin anmo'e le'u mahuma Nergal, atoni Hamat anmo'e le'u mahuma Asima,

³¹atoni Awa anmo'e le'u mahuma Nibhas ma Tartak, ma atoni Sefarwaim sin natulu sin anah-anah sin on fua tulu mamnotu neu uisneno teta Adramelekh ma Anamelekh.

³²Fun sin naluli ma nabes neu ale uisneno teta nane, mes ain amsa naluli ma nabes neu UISNENO. Sin anbeti na'ko sin atoni huma-huma hen mepu on Ana' fuat knino ma he natulu fua tulu anbi ume-ume le'u uisneno teta.

³³Es nane te, sin naluli ma nabes neu UISNENO, mes sin naluli ma nabes neu sin uisneno teta anmatom nok taos mo'et na'ko pah le sin nem nakone.

³⁴Sin fe nanaob sin taos mo'et talantia neno i. Sin ka nausi fa neu UISNENO ma sin ka natuin fa amsa ale lekat lulut ma ale In aplenat sin le In anfe nalali neu Nai Yakub in sufan, le In nakanab nani amsa Israel.

³⁵UISNENO anmo'e nalali lasi manba'an i nok Israel nak, “Kais miusi neu uisneno teta; kais miluli ma mibes neu sin ai amtuthae sin, ai mitulu fua tulu neu sin.

³⁶Au UISNENO Kau, amtola Kau nai, fun Au es upoitan ulali ki na'ko Mesir nok kuasat anaek; miluli ma mibes neu Kau ma mitulu fua tulu neu Kau nai.

³⁷Mituin piut ale Au lekat lulut sin ma ale Au plenat sin le Au tui ulali sin neu ki.

³⁸Kais miusi neu uisneno teta sin, ma kais amnikan lasi manba'an anbi Kau ok ki.

³⁹Mituin Kau nai, UISNENO hi Uisneno, onane te Au of ufetin ki na'ko ale hi musu-musu sin.”

⁴⁰Mes Samaria tuakenu sin kan lomi fa he nen; sin ana' nahel piut neu sin taos sin mo'et kun.

⁴¹Es nane te, sin naluli ma nabes neu UISNENO, mes sin amsa naluli ma nabes neu sin hau le'u ma sin fatu le'u. Sin anah-anah sin fe antao ma anmo'e lasi nane talantia neno i amsa.