Read Uab Meto 2 RAJA-RAJA 19 Bible Online

2 RAJA-RAJA 19 - Uab Meto bible

2 RAJA-RAJA 19

¹Leka Kesel Nai Hizkia in nen lasi le Nai Elyakim, Nai Sebna ma Nai Yoah natiaba neune, in anpisu in bale pake ma anpake bale kulut anfani on atakaf neu in nekan nasusbon, oke te in anao neu Ume UISNENO.

²Oke te in ansonu Nai Elyakim, nakaf sonaf nanan, Nai Sebna lultunis pah nanan, ma ale amnasit anbi Ana' fuat knino, he nao neu Mafefa Knino Nai Yesaya Nai Amos anmone. Sin amsa anpake bale kulut.

³I han ba'an na'ko Nai Hizkia le sin natiaba neu Nai Yesaya nak, “Neno i neno susal nukat; ankas kit ma nakle'at kit. Hit onle bife le he nahoni mes hit kat mu'i fa be'it ma matani.

⁴Kesel Asyur ansonu nalali in solalus nakaf mese he nasi'u Uisneno amonit. Oni UISNENO In nen nalali lasi si'ut nane, ma of ankas sin le sin namolok nalali! Es nane te hom onen toti nai neu Uisneno antom hit atoni-atoni sin le fe sin anmoni.”

⁵Leka in ansimo nalali han ba'an na'ko Kesel Nai Hizkia nane,

⁶Nai Yesaya anlenu haefen nane natiaba han taes i nak, “UISNENO nakua a'an nak, ka nabe'i fa Usi ho mumtau leka hom nen uab na'ko ate-ate kesel Asyur le sin nak UISNENO ka nabe'i fa he nafetin kit.

⁷UISNENO of anmo'e kesel Asyur ma in nen lasi luman mese talantia in anfani neu in pah, ma of namate in anbi nane.”

⁸Solalus nakaf nane in napeni hanaf nak in kesel nasaitan nalali Lakhis ma fe anmaken ma anlaban kot Libna, ka na'lo fa na'ko nane. Solalus nakaf nane in anao neu bale nane he natef nok in kesel nane.

⁹Kesel Asyur ansimo nalali hanaf nak Nai Tirhaka kesel Sudan in neki solalus Mesir pukan mese ansae nem he nape' sin. Es nane te, kesel Asyur ansonu sulat neu Nai Hizkia Kesel Yehuda.

¹⁰Sulat nane in hanan nak on i, “Kais mufnekan ho Uisneno In lasi manba'an le In namo'e ko nak of ka nana'at ko fa neu au nimak nanan.

¹¹Hom nen mulali nak pah mese-mese le ale kesel Asyur nape' sin, fun naskuku nani sin ok-oke. Kais ho mutenab neu of ho he mufetnom!

¹²Anbi tabu au amaf sin naskuku kot Gozan, Haran, ma Rezef, ma namate atoni Eden le natua anbi Telasar, katit fa es amsa na'ko sin uisneno teta le nabe'i he nafetin sin.

¹³Ale kesel kot Hamat, Arpad, Sefarwaim, Hena ma Iwa sin es me ka?”

¹⁴Nai Hizkia ansimo sulat nane na'ko ale haef sin, oke te in anso'i. Nalali te in anao neu Ume UISNENO, ma in nauf sulat nane anbi UISNENO matan,

¹⁵oke te in onen toti nak, “Koi UISNENO, atoni Israel sin Uisneno, le amtunom anbi ahake neno tunan sin tunken, fun namneo-namneo Ho mes kum Uisneno Ko neu ale plenat pah pinan. Ho es amtao ma anmo'e neno tunan ma pah pinan.

¹⁶Koi UISNENO, amkiso nai sa' le fe anbol anbi kai. Amnen ma mutnin nai ale lasi si'ut Nai Sanherib neu Ko, Uisneno amonit!

¹⁷Hai al-al kai mihin, koi UISNENO, nak ale kesel Asyur nale'un nalali uf namfau ma naskuku nalali ale sin pah-pah sin.

¹⁸Ale sin uisneno teta in notu nani sin ma naskuku nani sin, natuin sin uisneno teta namneo-namneo kan mu'i fa kuasat. Sin ala le'u mahuma na'ko hau ma fatu le atoni pah pinan sin anmo'e.

¹⁹Koi UISNENO, hai Uisneno, mufetin kai nai na'ko atoni-atoni Asyur nane, he nati' ale uf anbi pah pinan sin nahin nak ala Ho mes kum Ho Uisneno Ko.”

²⁰Oke te Nai Yesaya ansonu in a'an neu Kesel Nai Hizkia nak lasi nane on han taes neu kesel in onen totis,

²¹fun UISNENO nakua a'an nak, “Kot Yerusalem anmanis ko ma nakle'at ko, Sanherib.

²²Fun ho muhin ai kahaf neu sekau ka esle' ho muakan ma mukle'at nane? Au, Uisneno atoni Israel, Uisneno le aknino kun! Ho mu'moko' ho monim anae le'uf neu Kau.

²³Hom sonu ho haef ma namoko'on nak nok ho aklet makenat amfaun nane ho mis ma ambe'u tubu-tubu amnanut anbi Libanon. Ho mumoko'om mak ho amse' ale aijob uf le amnanu le'uf ma mas le'uf ma anfini ma ankono ale in a'lamu ma in nasi naek sin.

²⁴Ho amsa mumoko'om mak ho amhani oe mata ma minu oe anbi pah-pah bian, ma ale ho solalus sin anteli Noe Nil talantia anmeti.

²⁵Ai ho fe kam nen fa nak ale lasi nane Au tao ma mo'e ulali na'ko afi ahunut? Ma neno i Au unaoba ani. Au es a'fe neu ko kuasat he muskuku mani kot-kot mabaki lape anfani fatu tutnae.

²⁶Atoni-atoni le natua anbi nane sin ole ma limae; sin naskek ma namtau. Sin on hun anbi mnela ai' on hun le anmoni anbi ume tefin, le anmeto leka anin maputu na'ko neno saen anfu nani.

²⁷Mes Au uhin ale lasi oke antom ho aom. Au uhin lasi sa' le ho mo'e ma ho hem nao meu me.

²⁸Au uhin neu ho muto'an Kau nae le'uf, ma Au nen ulali neu ho lasi moko' nane. Es nane te Au falo ulali ho panam ma Au ufleu ulali ho fefam, he nati' Au hel ko amfani amnao mok lanan le afi ho aum amnao mokan.”

²⁹Nai Yesaya ansonu i a'an in amsa neu Nai Hizkia nak, “Lasi le i es of anfani a'taka neu ko. Ton i ma ton amnemat atoni of sin nah ane kase le anmoni anmese kun. Mes oke onane te sin nabe'i ansen ane kase ma tua min kase ma sin nah in fuan nane.

³⁰Atoni Yehuda le sin fe anmoni of anmoni nok alekot on luat le in a'ba'an nane namnanu kun ma in nafua kun.

³¹Anbi Yerusalem ma anbi Tubu Sion in tunan of anmu'i atoni le nafetnon, natuin UISNENO anlek nalali nak lasi nane of anbol.

³²I lasi le UISNENO naton nalali antom kesel Asyur nak, ‘In of kan tam nit fa neu Yerusalem ai naklaon in aklaot neu kot nane. In solalus sin le anpake ben besi tika katit fa esle' of anhaumak kot nane, ma anfun natef kot nane of ka nahakeb fa bale pesit he nape' kot nane.

³³Kesel Asyur of in anfani anao nok lanan le afi in nem anao nokan, ma of kan tam nit fa neu kot nane. Au, UISNENO Kau, ukua ulali Au a'ak.

³⁴Kot Yerusalem of Au pesi in ma unini ani natuin Au kanak ma natuin Au lasi manba'an nok Au ate Nai Daud.’ ”

³⁵Fun anbi fai nane amsa Ahake UISNENO nem neu um-ume atoni Asyur ma namate solalus 185.000. Leka nok-nok ana' te ale amates nasitbon ma nasan'on kun.

³⁶Onane te Nai Sanherib kesel Asyur in anhelon ma anfani neu Niniwe.

³⁷Anbi neno mese, leka in fe naluli ma nabes anbi ume le'u Nisrokh, Nai Adramelekh ma Nai Sarezer, in anmone sin namate in neki suni. Oke onane te sin naen neu pah Ararat. Onane te Nai Esarhadon, in anmone bian, anfani kesel anseka in.