Read Uab Meto 2 RAJA-RAJA 2 Bible Online

2 RAJA-RAJA 2 - Uab Meto bible

2 RAJA-RAJA 2

¹Fun in tabu antia neu UISNENO he naiti Nai Elia neu neno tunan nanate natuin anin slutuf anaek mese. Anbi tabu nane Nai Elia ma Nai Elisa sin anao nalali na'ko Gilgal,

²ma anbi lanan atnanan Nai Elia nak neu Nai Elisa nak, “Ho mumaika ambi i. UISNENO anlenu kau he au nao neu Betel.” Mes Nai Elisa natae nak, “Anbi UISNENO amonit ma natuin Ama ho monim, au of ka usaitan ko fa Ama.” Es nane te sin nua sin anao piut talantia Betel.

³Mafefa knino pukan mese le sin natua anbi nane sin anao natef nok Nai Elisa ma natoti nak, “Ho muhin ai kahaf nak anbi neno le i ho Usif of nasaitan ko natuin UISNENO of naiti in?” “Namneo, au uhin,” onane Nai Elisa in natae. “Mes mautu nai, kais hit tamolok lasi nane.”

⁴Nalali te Nai Elia nak neu Nai Elisa nak, “Ho mumaika ambi i, UISNENO anlenu kau he au nao neu Yerikho.” Mes Nai Elisa natae nak, “Anbi UISNENO amonit ma anbi Ama ho monim, au of ka usaitan ko fa Ama.” Es nane te sin nua sin anao piut talantia sin nem antia Yerikho.

⁵Mafefa knino pukan mese le sin natua anbi nane sin anao ma natef nok Nai Elisa ma sin natoti nak, “Ho muhin ai kahaf nak anbi neno le i ho Usif of Uisneno naiti ma nasaitan ko?” “Namneo, au uhin,” onane Nai Elisa in natae. “Mes namautu nai, kais hit tamolok lasi nane.”

⁶Nalali te Nai Elia nak neu Nai Elisa nak, “Ho mumaika ambi i. UISNENO anlenu kau he au nao neu Noe Yordan.” Mes Nai Elisa natae nak, “Anbi UISNENO amonit ma anbi Ama ho monim, au of ka usaitan fa Ama.” Onane te sin anao piut ma sin antia Noe Yordan,

⁷ma Mafefa knino bo'nim natuin sin. Oke te Nai Elia ma Nai Elisa sin nasnas anbi noe ninen, ma Mafefa knino bo'nim nane sin anhake ka na'lo fa bale nane.

⁸Nai Elia ankasu in sobalu betkone, oke te in anunu ma in anbeson neu noe nane fafon. Oke te noe nane in anbation nua talantia Nai Elia ma Nai Elisa sin anlak natuin meto.

⁹Leka sin anlak ma antia noe aon bian, Nai Elia nak neu Nai Elisa nak, “Amtoti nai sa' le hom lomi na'ko kau nahunu na'ko UISNENO fe ka naiti kau fa ma au usaitan ko!” Nai Elisa natae nak, “Amfe neu kau Ama ho kuasat neu kau, he nati' au fani aseka neu ko Ama.”

¹⁰“Wah, lasi nane mafena nae le'uf kun,” Nai Elia natae onane. “Mes kalu ho mit kau anbi tabu UISNENO naiti kau, ho han totis nane of nanokab nani. Kalu ho ka mit fa, ho han totis nane of matite.”

¹¹Fun sin anao nok te, sin nua sin namolok piut. Fun nok askeken aklet ai mese le bikase ai mese anhel nem ma anbati sin nua sin oke te anin slutuf anaek mese naiti neki Nai Elia neu neno tunan.

¹²Nai Elisa ankiso nit in oke te in anbai nak, “Elia, au Ama! Au Ama! Aneot ahafot Israel abe'it ma matani! Ama ho ka mnita ko fa anteni!” Ma Nai Elia namneku kun na'ko Nai Elisa. Nok nek susal Nai Elisa anpisu in sobalu betkone anfani nua,

¹³ma in naiti Nai Elia in sobalu betkone le anmofu nane. Oke onane te in neki anfani ma anhake anbi Noe Yordan ninen,

¹⁴oke te in anbeson Nai Elia in sobalu betkone nane neu noe nane ma in nak, “Esme ka UISNENO, Nai Elia in Uisneno nane?” Oke onane te in anbeson sobalu betkone nane neu noe nane, oe nane anbation nua ma in anao neu noe aon bian.

¹⁵Mafefa knino bo'nim anbi Yerikho nane sin ankiso nit in oke te sin nak, “Nai Elia in kuasat natnani nalali neu Nai Elisa!” Sin nem neu in oke te sin anli'tu anbi in matan

¹⁶ma sin nak, “Hai al-al kai hai bo'nim, hai mibe'i ma matani. Es nane te, aim nai hit atnao he tami ho Usif Nai Elia. Oni UISNENO In Smanan knino naiti neki in neu nu'af ai neu nonof, oke te namaika in anbi nane.” Nai Elisa natae nak, “Ka nabe'i fa!”

¹⁷Mes natuin sin naseke in piut oke te in natuin sin. Es nane te Mafefa knino bo'nim nane sin anao nami Nai Elia neno tenu in a'lon, mes sin ka natef fa in.

¹⁸Oke te sin anfani nem neu Nai Elisa le fe in anpao anbi Yerikho. Nai Elisa nak neu sin nak, “Ai au ka uton ulali fa neu ki ak ka nabe'i fa he hi amnao?”

¹⁹Atoni fauk-fauk na'ko Yerikho sin nem neu Nai Elisa ma sin nak neune nak, “Ama, onle Ama ho mit mulali, kot i leko, mes in oe namle'u ma onane te anmo'e bife ao matua sin, sin namofu li'ana.”

²⁰“Maiti meki nem neu kau a'mako fe'u mese,” onane Nai Elisa in nak, “ma amtao masi neu in nanan.” Ma sin neki nem neu in sa' le in antoti.

²¹Oke te Nai Elisa in anao neu oe mata nane nalali te in anpolin masi nane neu oe nanan ma in na'uab nak, “UISNENO es nakua a'an le i: ‘Au uknino oe i he nati' kais neki lasi maten ai li'ana akolut!’ ”

²²Na'ko neno nane oe nane in naknino anmatom nok Nai Elisa in a'an.

²³Oke onane te Nai Elisa in anao na'ko Yerikho neu Betel. Anbi lanan atnanan li'ana pukan mese anpoi na'ko kot nane ma sin nasi'u ma naakan in. Sin nak, “Hoi nakboko, nakboko, amnao nai mu'ko i!’ ”

²⁴Nai Elisa nabain'on ma ankiso sin oke te ansukat sin anbi UISNENO In kanan. Anbi tabu nane amsa asu fui ainaf nua anpoi na'ko nasi ma anpisu li'ana bo'ha am nua na'ko li'ana sin le nane.

²⁵Nai Elisa anao anfini neu Tubu Karmel, oke te in anfani neu Samaria.