Read Uab Meto 2 RAJA-RAJA 20 Bible Online

2 RAJA-RAJA 20 - Uab Meto bible

2 RAJA-RAJA 20

¹Anbi neno mese Kesel Nai Hizkia namen men fu'un le matani talantia ala kle'ot in hen mate. Mafefa Knino Nai Yesaya Nai Amos anmone nem ma ankiso in ma nak neune nak, “UISNENO nakua a'an he nati' Usi ho muleko ale lasi, natuin Usi ho of ka muleko fa. Fun ka lo fa anteni of Usi ho mate.”

²Nai Hizkia naklel'on neu klipit oke te in onen toti nak,

³“Koi UISNENO, mumnau kau fa natuin au aetnok ulali neu Ko nok aki'at ma nok nekaf amneot. Au uhelnok piut he utuin Ho lomim.” Oke te Nai Hizkia ankae nok nek nu'ut.

⁴Nai Yesaya nasaitan Nai Hizkia, mes leka in fe kan poi fa na'ko sonaf po'an atnanan, UISNENO anlenu in anao

⁵anfani neu Nai Hizkia, kesel neu UISNENO In to, ma natiaba neune a'at i nak, “Au, UISNENO Kau, Uisneno Nai Daud ho Ba'i le naluli ma nabes neune. In nen nalali ho onen totis ma In nit nalali ho matnu. Au of uleko ko; ma anmeu te of hom nao meu Au Ume.

⁶Au of a'sato ho uam eki ton 15 anteni. Ho ma kot Yerusalem of Au ufetin na'ko kesel Asyur. Au of unini kot i natuin Au kanak ma natuin Au lasi manba'an nok Au ate Nai Daud.”

⁷Oke te Nai Yesaya anlenu atoni ma naiti bub fua ma antao neu fu'un anbi kesel he nati' in naleko.

⁸Kesel Nai Hizkia in natoti nak, “In a'takan sa' ka nak UISNENO of naleko kau ma nak anmeu te of nabe'i au he nao neu Ume UISNENO anteni?”

⁹Nai Yesaya natae nak, “UISNENO of In anfe a'taka neu Usi ko nak In of nanokab In lasi manba'an nane. Es nane te, lasi me ka es hom lomi: Mafon le anlek anbi tabu manas le Kesel Nai Ahas anmo'e nane in anao mat tuis 10 ai anao koti tuis 10?”

¹⁰Nai Hizkia in nak, “Neu het mo'e mafon nane anao mat tuis 10, nane lasi makafa. Es nane te anmo'e in anao koti tuis 10.”

¹¹Nai Yesaya in onen toti neu UISNENO, oke te UISNENO anmo'e mafon nane anao koti tuis 10 neu a'lek tabu manas nane.

¹²Anbi tabu nane kesel Babel, Nai Merodakh-Baladan Nai Baladan anmone, in nen nak Kesel Nai Hizkia fe naleko na'ko menas. Es nane te in ansonu haef he neki sulat ma atnatas neu Nai Hizkia.

¹³Nai Hizkia ansimo haefen nane ma in nalile neu sin ale in amaus ok-oke, mnatu ma noni muti, ale fobona ma mina fomeni, ma ale bale makenat in solalus sin. Katit fa sa' es amsa anbi in sonaf ma anbi in aplenat ok-oke le in ka naton nani neu sin.

¹⁴Oke te Mafefa Knino Nai Yesaya in nem neu Kesel Nai Hizkia ma natoti in nak, “Ale atoni-atoni i sin nem na'ko me ka? Ma sin na'uab nak sa' ka?” Nai Hizkia natae nak, “Sin nem na'ko Babel, pah a'lo.”

¹⁵Nai Yesaya natoti anteni nak, “Sin nit sa' ka anbi sonaf?” Nai Hizkia natae nak, “Ale sa' anbi au sonaf sin nit nalali ok-oke. Katit fa sa' es amsa anbi au maus sonaf nanan le au ka ulile ani fa neu sin.”

¹⁶Oke te Nai Yesaya nak neu kesel nak, “UISNENO nakua a'an nak

¹⁷of leka in neno antia ale ho maus ok-oke anbi ho sonaf nanan ma le ho amfen sin nibun nabuab nalali antia neno i, of naiti neki sin anao neu Babel. Katit fa le of he namaika nani.

¹⁸Ma na'ko ho anah sin of naiti bian ma anmo'e sin anfani ate anbi sonaf nanan he nati' antuthae kesel Babel.”

¹⁹Kesel Nai Hizkia natae nak, “Leko amsa UISNENO In a'an le ho mutiaba neu kau.” In natae onane natuin in natenab nak, “Leka au fe amoni au plenat of anmu'i tainine ma halan piut.”

²⁰Lasi nu'un bian antom Kesel Nai Hizkia, antom in lasi-lasi meo pa'e anbi makenat, ma in anmo'e nifu ma anmo'e lolok onme he neki oe neu kot, antui nalali sin anbi Sulat Anaof na'ko ale Kesel Yehuda.

²¹Nai Hizkia nasaebon, oke te in anmone Nai Manasye anfani kesel anseka in.