Read Uab Meto 2 RAJA-RAJA 21 Bible Online

2 RAJA-RAJA 21 - Uab Meto bible

2 RAJA-RAJA 21

¹Nai Manasye in uan ton bo'es am nua leka in anfani Kesel Yehuda, ma in ana' aplenat anbi Yerusalem ton 55. In ainaf kanan bi Hefzibah.

²Nai Manasye nasanab neu UISNENO, fun in natuin taos mo'et amle'ut na'ko uf-uf le UISNENO anli'u nalali sin na'ko Kanaan anbi neno atoni Israel antam neu pah nane.

³Bale-bale luli besa neu uisneno teta le Nai Hizkia in amaf nale'un nalali sin in nahakeb nafani sin. In nahakeb baki fuat he naluli nabes neu Baal, ma anmo'e le'u mahuma uisneno teta Fenai Asyera, onle Nai Ahab Kesel Israel anmo'e. Nai Manasye amsa in naluli nabes neu afkun-afkun.

⁴UISNENO nakua nalali In a'an nak Yerusalem nane anfani In bale maika ma bale luli besa neu In, mes anbi nane anbi Ume UISNENO, Nai Manasye nahakeb baki fuat neu ale uisneno teta.

⁵Anbi Ume UISNENO eno matan nua sin in nahakeb baki fuat he naluli ma nabes neu afkun-afkun.

⁶In natulu in anmone on fua tulu mnotu. Nai Manasye amsa in nanaoba lasi mnane, naton ale lasi natuin ankiso anbi bale afkun anpake ale lasi le'uf mahine le natolo'on, ma antoti fainekat na'ko ale smanaf-smanaf amle'ut. In nasanab anae le'uf neu UISNENO talantia in nafena UISNENO In to'as.

⁷Ma in antao le'u mahuma uisneno teta Fenai Asyera anbi Ume UISNENO nanan, mes bale nane UISNENO nakua nalali In a'an neu Nai Daud ma in anmone Nai Salomo nak, “Au Ume ma kot Yerusalem i, le Au beti ulali na'ko ale bale uf Israel bo'es am nua, nane bale le Au uteta ani on bale luli besa neu Kau.

⁸Ma kalu nonot Israel antao natuin ale Au plenat sin le Au ate Nai Musa anfe nani neu sin, Au of ka ufetin fa sin hen li'u sin na'ko pah le Au fe ulali neu sin amfenu.”

⁹Mes atoni Yehuda sin ka natuin fa UISNENO, mes Nai Manasye in es anfuli sin ma anmo'e ale sanat le anae le'uf kun nesi na'ko ale sanat le uf-uf Kanaan anmo'e le UISNENO anli'u nalali sin anbi neno nonot Israel antam neu pah nane.

¹⁰Es nane te nanete natuin ale Mafefa knino, UISNENO In ate sin, UISNENO nakua a'an nak,

¹¹“Kesel Nai Manasye anmo'e amle'ut anae le'uf kun. In mo'et amle'ut nane anesi anfini na'ko mo'et amle'ut atoni Kanaan. Nok ale le'u mahuma le in anmo'e in anfuli atoni Yehuda ma anmo'e sanat.

¹²Es nane te, Au, UISNENO Kau, Uisneno le atoni Israel naluli ma nabes neune, of Au fe neu in lasi amle'ut le anae le'uf neu Yerusalem ma Yehuda talantia es-es le sin nen lasi nane of sin naskek.

¹³Au of a'fe kasat neu Yerusalem onle Au fe kasat neu Samaria ma Nai Ahab Kesel Israel ma in anah-anah sin. Au of a'nako ma pik uknino Yerusalem on a'pika le Au boe uknino ma Au benit ani.

¹⁴Tuafen Yerusalem le fe nabalah of Au ufetin ani sin hen fani osaf neu in musu-musu sin, le of nateku ma nasik nani sin.

¹⁵Ale lasi nane of Au mo'e ani neu Au nonot natuin sin nasanab neu Kau ma nafena Au to'as na'ko afi sin amaf sin anpoi na'ko Mesir talantia neno i.”

¹⁶Anesi na'ko anmo'e atoni Yehuda nasanab neu UISNENO natuin naluli ma nabes neu uisneno teta, Nai Manasye amsa namate atoni amfau le'uf le ka nasanab fa talantia na' ansai anbi me-me anbi Yerusalem.

¹⁷Lasi nu'un bian antom Kesel Nai Manasye ma neu ale in sanat-sanat sin le in anmo'e nalali, antui nalali sin anbi Sulat Anaof na'ko ale Kesel Yehuda.

¹⁸Nai Manasye nasaebon ma ansub in anbi in po'an sonaf, Nai Uza in po'an. In anmone Nai Amon anfani kesel anseka in.

¹⁹Nai Amon in uan ton 22 leka in anfani Kesel Yehuda ma in naplenat anbi Yerusalem ton nua. In ainaf kanan bi Mesulemet Nai Harus anfeto, atoni Yotba.

²⁰Papmese on in amaf, in amsa anmo'e sanat neu UISNENO.

²¹In ankiso natuin taos mo'et amle'ut na'ko in amaf, ma naluli nabes neu ale uisneno teta le in amaf naluli ma nabes neune.

²²In monin ka natuin fa UISNENO In alomin, mes in nasaitan UISNENO, le in amaf ba'i sin nalali ma nabes neune.

²³Kesel Nai Amon in ate sin anmalokin lasi ma anlaban in ma oke te namate in anbi in sonaf.

²⁴Mes to Yehuda namate sin le namate Kesel Nai Amon nane, oke te sin naiti in anmone Nai Yosia, anfani kesel.

²⁵Lasi nu'un bian antom Nai Amon antui nalali sin anbi Sulat Anaof na'ko ale Kesel Yehuda.

²⁶Ansub Nai Amon anbi naukel anbi po'an Nai Uza. In anmone Nai Yosia anfani kesel anseka in.