Read Uab Meto 2 RAJA-RAJA 23 Bible Online

2 RAJA-RAJA 23 - Uab Meto bible

2 RAJA-RAJA 23

¹Kesel Nai Yosia no'en ale mnasi-mnasi Yehuda ma Yerusalem.

²Oke te in nok sin anao neu Ume UISNENO fun ale Ana' fuat knino natuin in, ale Mafefa knino ma to ok-oke, leko amamu'it ma amu'it. Anbi sin matken ok-oke, anhaumak ni fatu le anbeti nateta nani neu kesel, kesel anhake ma anso'i nok hanan anaek sulat fef bela in nesan ok-oke le napeni anbi Ume UISNENO nanan. Oke te kesel anmo'e lasi manba'an nok UISNENO he natuin In nok aki'at, ma nanaoba nok sin nekan ok-oke ma nok sin smanan ok-oke ale aplenat ma In lekat lulut sin. Kesel amsa anmanba'an he nanokab ale lasi manba'an UISNENO nok in nonot le matui anbi sulat plenat nane. To ok-oke sin anmanba'an nak sin of natuin ma na'ki neu lasi manba'an nane.

⁴Oke onane te kesel anfe plenat neu Ana' Fuat Knino Amnanut Nai Hilkia, fun ale atuthaes Ana' fuat knino ma ale apaot le antuthae anbi eno Ume UISNENO, he nati' napoitan ale bale pakae le anpake he naluli neu Baal, uisneno teta Fenai Asyera, ma afkun-afkun na'ko Ume UISNENO. Ale bale nane Kesel Nai Yosia notu nani sin anbi kot kotin anhaumak Nonof Kidron, oke te in afu nane neki anao neu Betel.

⁵In nasnasban ale ana' fuat le ale Kesel Yehuda naiti sin hen tuthae anbi bale luli besa neu uisneno teta anbi kot-kot Yehuda ma anfun natef Yerusalem; onane amsa ale ana' fuat le natulu fua tulu neu Baal, neno, funan, afkun alimat ma afkun-afkun.

⁶Ma napoitan le'u mahuma uisneno teta Fenai Asyera na'ko Ume UISNENO, ma neki anpoi na'ko kot neu Nonof Kidron. Ma notu nani ale le'u mahuma nane anbi bale nane, ma oke te napau in atu nane mnula-mnula, ma in afu nane napoitan nani neu naukel to mfaun.

⁷Ale ke'an-ke'an anbi Ume UISNENO le ale akaket-akaket ume le'u le sin anpake hen mo'e lasi kake le anfani on luli besa neu uisneno teta, in nale'un nani sin. (Anbi ke'an-ke'an nane ale bife sin antenu akloe ma pilu hen pake anbi luli besa neu uisneno teta Fenai Asyera.)

⁸Ale Ana' fuat knino le natua anbi kot-kot Yehuda Nai Yosia anlenu sin nem neu Yerusalem, oke te anbi me-me anbi pah Yehuda ok-oke in nale'un nani ale baki fuat neu uisneno teta le ale ana' fuat nane sin natulu nalali fua tulu. Ale Ana' fuat knino nane ka nafetin fa sin he nanaoba luli besa anbi Ume UISNENO. Mes, nabe'i sin anbukae utunu' le kan pake fa lalu haef le sin biafen naloitan neu sin. Ale baki fuat le anbeti nateta he naluli ma nabes neu uisneno teta anhaumak Eno Naek Nai Yosua, Walikota pah nane, in natseleb nani. Eno Naek nane anhake anbi aon bian a'li Eno Naek le'uf anbi lanan antam neu kot nanan.

⁹

¹⁰Tofet, bale luli besa neu uisneno teta anbi Nonof Hinom, in nale'un nani. Nok nane te katit fa es anteni le nabe'i he natulu in anah on fua tulu mnotu neu uisneno teta Molokh.

¹¹Ale bikase le ale Kesel Yehuda anbeti nateta sin neu he naluli ma nabes neu neno in anpolin nani sin, ma ale aklet le anpake anbi luli besa in notu nani sin. (Ale aklet nane nahakeb sin anbi Ume UISNENO matan — anhaumak eno naek — ka na'lo fa na'ko ke'an-ke'an Nai Natan Melekh, atoni ameput mese natua anbine.)

¹²Ale baki fuat le ale Kesel Yehuda nahakeb sin anbi ume penen amnela anbi fafon ke'an-ke'an Kesel Nai Ahas, in nale'un nani sin. Onane amsa ale baki fuat le Kesel Nai Manasye nahakeb sin anbi Ume UISNENO po'an nua sin, Nai Yosia nale'un naskuku nani, oke te anpolin nani sin neu Nonof Kidron.

¹³Onane amsa ale baki fuat anbi aon neno saen Yerusalem, anbi aon bian a'ne'u Nu'af Amle'ut in nale'un nani sin. Ale baki fuat nane Kesel Nai Salomo es nahakeb sin he naluli ma nabes neu ale uisneno teta manisit — esle' Asytoret uisneno teta bife uf Sidon, Kamos uisneno teta uf Moab, ma Milkom uisneno teta uf Amon.

¹⁴Ni fatu-ni fatu uisneno teta ma le'u mahuma ma uisneno teta Fenai Asyera in natseleb nani sin, oeke te nain le ni fatu-ni fatu nane anhake anbine ma ale le'u mahuma le nahakeb sin anbi nane, Nai Yosia in nae nani bale nane neki ale atoni sin nuifenu.

¹⁵In amsa nale'un nani bale fuat anbi Betel le Kesel Nai Yerobeam Nai Nebat anmone nahakeb nani — kesel le anfuli nalali atoni Israel ma anmo'e sanat. Oke te Nai Yosia nape' baki fuat anbi bale fuat nane, ma notu nani nok le'u mahuma uisneno teta Fenai Asyera le anbi bale nane.

¹⁶Oke te Nai Yosia in nike kotin, ma in nit naukel fauk-fauk anbi neten nane tunan. In anlenu ma anpukai ale naukel nane, ma napoitan ale nuifen oke te notu nani sin anbi baki fuat le fe anputu nane. Onle nane in anmo'e nale'un baki fuat nane. Lasi nane anbol natuin sa' le afi Mafefa Knino UISNENO naton nalali leka Kesel Nai Yerobeam fe anhake anhaumak baki fuat nane anbi neno naek mese. Oke onane te Nai Yosia in nit naukel mese anteni.

¹⁷Ma in natoti nak, “Sekau in naukel esle' i ka?” Atoni-atoni Betel sin natae nak, “Nane naukel Mafefa Knino UISNENO le afi in na'ko Yehuda nem neu i, ma in naton lasi-lasi le fe kesel anmo'e neu baki fuat i.”

¹⁸Ma kesel anfe plenat nak, “Kais hi mo'e sa'-sa' neu naukel nane. Maut he in nuifen anbi nane, kais mitnanib sin!” Es nane te Mafefa knino na'ko Yehuda sin nuifen nane kan mo'e fa sa'-sa' neu sin; onane amsa nuifen Mafefa knino na'ko Samaria le ansub sin anbi nane.

¹⁹Anbi ale kot anbi Israel, Kesel Nai Yosia natseleb nani ale bale fuat neu uisneno teta le ale Kesel Israel sin nahakeb nani, ma le anmo'e UISNENO ma In nato'; sa' le Kesel Nai Yosia anmo'e anbi Betel, nane in anmo'e amsa neu ale baki fuat anbi Israel ok-oke.

²⁰Ale ana' fuat le antuthae anbi bale-bale fuat neu uisneno teta in namate sin anbi baki fuat nane le sin antuthae anbine. Ma anbi baki fuat mese-mese nane Nai Yosia notu atoni nuifen anbi nane. Oke onane te in anfani neu Yerusalem.

²¹Oke te Kesel Nai Yosia naplenat to he naliatas neno naek Paskah onle antui nani anbi Sulat Fef Bela Nok UISNENO. Nok nane te sin natola UISNENO, sin Uisneno.

²²Na'ko neno ale meo pa'e sin naplenat Israel fe katit fa Kesel Israel mese ai Kesel Yehuda mese le he naliatas neno naek Paskah onle nane.

²³Ala anbi ton bo'es am fanu leka Nai Yosia in ana' aplenat onane te sin naliatas anteni neno naek Paskah anbi Yerusalem he natola UISNENO.

²⁴He nati' nanaoba ale aplenat le matui anbi sulat le Ana' Fuat Knino Amnanut Nai Hilkia napeni anbi Ume UISNENO, ale amno'en sman-nitu ma ale amolok neu lasi neno amnemat Kesel Nai Yosia anli'u sin na'ko Yerusalem ma na'ko Yehuda ok-oke, oke te in anpolin ale uisneno teta anbi ume toko mese-mese, ale le'u mahuma, ma ale bale' le anpake neu hen fua ale uisneno teta.

²⁵Katit fa es on Kesel Nai Yosia le in atenon neu UISNENO nok in nekan ok-oke, ma nalile lasi nane anbi in monin ma in mo'et anmatom nok ale plenat le matui anbi Nai Musa in Sulat. Ma namuni na'ko Kesel Nai Yosia, katit fa kesel mese anteni he on in.

²⁶Mes toas mo'et Uiskesesl Nai Manasye nafena nalali to'as UISNENO neu Yehuda; ma In lasi to'as nane kan sanu fa.

²⁷UISNENO nakua a'an nak, “Sa' le Au mo'e ulali neu Israel, of Au mo'e ani neu Yehuda. Atoni Yehuda of Au polin sin na'ko pah le Au fe ulali neu sin. Au of a'tite Yerusalem, kot le Au beti ani, onane amsa Au Ume i, le natuin Au a'ak of anfani bale luli besa neu Kau.”

²⁸Kesel Nai Yosia anmate anbi makenat anbi Megido leka in anao ma anken Nai Nekho Kesel Mesir, le fe in anfen ma anao nok in solalus sin hen tuntaku kesel Asyur anbi Noe Efrat ninen. Kesel Nai Yosia in ate sin neki in aon ta'un nok aklet neu Yerusalem. Fun ansub in anbi nane anbi ale kesel sin naukel. Oke te Yehuda sin anbeti ma naiti in anmone Nai Yoahas anfani kesel anseka in. Lasi nu'un bian antom Kesel Nai Yosia antui nalali sin anbi Sulat Anaof na'ko ale Kesel Yehuda.

²⁹

³⁰

³¹Nai Yoahas in uan ton 23 leka in anfani Kesel Yehuda, ma in ana' aplenat anbi Yerusalem funan tenu. In ainaf kanan bi Hamutal Nai Yeremia anfeto na'ko kot Libna.

³²Nai Yoahas nasanab neu UISNENO on in amaf sin.

³³Nai Yoahas in aplenat namsopu leka Nai Nekho Kesel Mesir anheke in anbi Ribla, anbi pah Hamat, ma naseke Yehuda ma anbaen noni neki noni muti kilo 3.400 ma mnatu kilo 34.

³⁴Oke te Kesel Nekho naiti Nai Yosia anmone Nai Elyakim anfani Kesel Yehuda, ma nabaina in kanan Nai Elyakim anfani Nai Yoyakim. Ma neki Nai Yoahas neu Mesir ma in anmate anbi nane.

³⁵Neu he nati' anbaen noni le Kesel Mesir antoti nane, Kesel Nai Yoyakim antoti noni poni na'ko to natuin sin be'in mese-mese.

³⁶Nai Yoyakim in uan ton 25 leka in anfani Kesel Yehuda, ma in ana' aplenat anbi Yerusalem ton 11. In ainaf kanan bi Zebuda, Nai Pedaya anfeto na'ko kot Ruma.

³⁷Nai Yoyakim anmo'e sanat neu UISNENO on in amaf sin.