Read Uab Meto 2 RAJA-RAJA 25 Bible Online

2 RAJA-RAJA 25 - Uab Meto bible

2 RAJA-RAJA 25

¹Namuni te Nai Zedekia in anlaban Nebukadnezar kesel Babel. Es nane te Nebukadnezar nok ale in solalus sin ok-oke nem ma nape' Yerusalem anbi fun bo' antam neno bo'mese anbi ton sio neno Nai Zedekia in ana' aplenat. Sin nahakeb ume bale solalus anakaf antoko anbine anbi kot kotin, nahakeb baki lape anfun natef kot,

²ma anfun natef kot nane piut talantia ton 11 Nai Zedekia in ana' aplenat.

³Anbi ton ha antam neno sio anbi ton nane amsa lasi amnahas anaek anbol nok matani talantia to kan mu'i fa mnahat namneo-namneo,

⁴musu nape' baki lape kot. Anbi fai nane, maski atoni Babel sin fe anfun natef nan kot nane, ale solalus Yehuda sin naen anpoi ma naen an'ali Nonof Yordan. Sin naen nok lanan po'an sonaf nanan, oke te sin anpoi anao nok eno naek baki lape atnanken anbi bale nane.

⁵Mes solalus Babel sin anli'u Kesel Nai Zedekia, ma anheke in anbi mnela Yerikho. Ale in solalus sin naen nasaitan in.

⁶Oke te sin neki Kesel Nai Zedekia neu Kesel Nebukadnezar anbi kot Ribla, oke te nafek lasi neune.

⁷Namate in anmone anbi in matan. Oke onane te anlo'i napoitan Nai Zedekia in matan sin, oke te anfutu in neki kolen besi ma neki in neu Babel.

⁸Anbi fun nima antam neno hitu anbi ton bo'es am sio Nebukadnezar kesel Babel ana' aplenat, atoni mese in kanan Nai Nebuzaradan in nem neu Yerusalem. In le nane kesel afainekat ma solalus nakaf amnanut neu Nebukadnezar.

⁹Nai Nebuzaradan in notu Ume UISNENO, kesel sonaf, ma ume ale atomatas sin anbi Yerusalem.

¹⁰Oke te in solalus sin natseleb baki lape kot nane.

¹¹Nalali te to le fe anbi kot nane, ale atoni ameput mahine le fe nabalah, atoni-atoni amamu'it ma atoni-atoni le sin naen ma antam neu atoni Babel, Nai Nebuzaradan naiti neki sin ok-oke neu Babel.

¹²Mes to le amamu'it abainesit ma le kan mu'i fa maus namaika sin anbi Yehuda ma anlenu sin anmepu lene tua min kase ma lene-lene bian anteni.

¹³Ale ni niti molo ma ale aklet anbi Ume UISNENO ma in bale oe niti molo atoni Babel nale'un nani sin, oke te ale in niti molo sin naiti neki sin neu sin pah.

¹⁴Sin amsa naiti neki ale bale' i: ale askop, bale afu baki tulu, ale paku, ale a'mako le natne mu'it in na' le anlolo neu fua tulu, ale a'mako he notu atu fomeni, ma ale bale niti molo bian anteni le anpake sin anbi lasi luli besa.

¹⁵Ale bale mnatu ma noni muti, nane ale a'mako an-ana ma ale a'pika neu ai flae Nai Nebuzaradan in naiti neki sin.

¹⁶Ale bale niti molo le Kesel Nai Salomo anmo'e sin neu Ume UISNENO, esle' ni nua, aklet-aklet ma bale oe naek, ale nane mafena kun talantia kan tai nani fa sin.

¹⁷Ni niti molo nua en nane papmese; es-es te mnanun meter 8 nok nakaf mese na'ko niti molo mnanun meter 3, ma centi bo'tenu. Anfun natef ni nakfen nane nakano neki pake noas lin kase fuan na'ko niti molo.

¹⁸Nesi na'ko nane te, Nai Nebuzaradan anheke Ana' Fuat Knino Amnanut Nai Seraya, Nai Sefanya atuntakus Ana' fuat knino, ma atoni tenu anteni apaot Ume UISNENO, ma kesel in afainekat sin nim le fe anbi kot, solalus nakaf amnanut, ma atuntakus solalus nakaf amnanut le in es anakaf neu lultunis solalus, ma atoni anaet 60 bian anteni.

²⁰Ale atoni nane in neki sin neu Kesel Nebukadnezar anbi kot Ribla,

²¹anbi kot Hamat. Anbi nane anhamu'i sin oke te namate sin. Onle nane atoni-atoni Yehuda naiti sin na'ko sin pah ma neki sin neu bale polin.

²²Oke onane te Kesel Nebukadnezar naiti Nai Gedalya Nai Ahikam anmone Nai Safan upuf, anfani Kumlol anbi Yehuda he naplenat ale atoni le fe namaika anbi nane.

²³Leka ale solalus nakaf ma solalus Yehuda le ka nana'tok fa neu Babel sin amnen neu lasi nane, sin al-al sin nem neu Nai Gedalya anbi Mizpa. Ale solalus nakaf nane esle' Nai Ismael Nai Netanya anmone, Nai Yohanan Nai Kareah anmone, Nai Seraya Nai Tanhumet anmone na'ko kot Netofa, ma Nai Yazanya na'ko kot Maakha.

²⁴Nai Gedalya nak neu sin ok-oke nak, “Hi ka nabe'i fa mimtausan anaet-anaet ana' plenat Babel. Mitua ambi hit pah i ma amfani ate neu kesel Babel. Au panat ki of hi mipeni alekot.”

²⁵Mes anbi fun hitu ton nane Nai Ismael Nai Netanya anmone ma Nai Elisama upuf le fe kesel sufan, sin nok atoni bo'mese sin anao neu Mizpa. Sin nem ma namate Nai Gedalya nok atoni Yehuda ma atoni Babel le sin nok Nai Gedalya anbi nane.

²⁶To Yehuda ok-oke, amu'it ma amamamu'it, sin al-al sin nok ale solalus nakaf sin naen neu Mesir natuin sin namtausan atoni Babel.

²⁷Anbi fun bo'es am nua antam neno bo'nua am hitu anbi ton bo'tenu am hitu leka neki Nai Yoyakhin neu bale polin, Nai Ewil-Merodakh anfani kesel Babel. Anbi ton nane amsa in nalile in manekan neu Nai Yoyakhin, ma nafetin in na'ko o'of,

²⁸ma anmo'e in nok alekot. Anfe neu Nai Yoyakhin toko amnanut le anesi na'ko toko kesel bian le anpolin sin amsa neu Babel.

²⁹Nai Yoyakhin kan pake fa bale pake atoni o'of ma in anbukae anbi sonaf ma anfe neune noni neu in amonin.