Read Uab Meto 2 RAJA-RAJA 3 Bible Online

2 RAJA-RAJA 3 - Uab Meto bible

2 RAJA-RAJA 3

¹Anbi ton bo'es am fanu Nai Yosafat Kesel Yehuda in ana' aplenat, Nai Yoram Nai Ahab anmone anfani kesel anbi Israel ma in naplenat anbi Samaria ton bo'es am nua in a'lon.

²In anmo'e lasi amle'ut anbi UISNENO In matan, mes ka onfa in amaf Nai Ahab ma in ainaf bi Izebel. Le'u mahuma le in amaf anmo'e neu he naluli ma nabes neu Baal in nale'un nani.

³Mes, on Kesel Nai Yerobeam Nai Nebat anmone le naplenat nahunun in, in amsa anhel atoni Israel anmo'e sanat ma in ka nasnas fa na'ko hen mo'e lasi nane.

⁴Kesel Nai Mesa na'ko Moab in anhao bibi kase namfau. In anbaen noni poni neu Kesel Israel, ton mese te in anfe bibi kase ana' 100.000 ma bibi kase keso 100.000 sin nafun.

⁵Mes leka Kesel Nai Ahab anmate nalali, Kesel Nai Mesa anfen ma anlaban Kesel Israel.

⁶Es nane te Kesel Nai Yoram nasaitan Samaria ma in anao naloitan to ok-oke neu makenat.

⁷In ansonu haef neu Kesel Nai Yosafat anbi Yehuda nak, “Kesel Moab in anfen ma anlaban kau; hom lomi ka hit nua kit atlaban in anbi makenat?” “Leko,” onane Kesel Nai Yosafat in natae. “Au ma au solalus sin ma au solalus asae bikase of hai mok ko.

⁸Of hit he tape' ma atken sin atnao tok lanan me ka?” Nai Yoram natae nak, “Of hit nao tok lanan le an ali mnela snaen Edom.”

⁹Onane te Kesel Nai Yoram in anfen ma anao nok Kesel Yehuda ma kesel Edom. Leka sin anao nan neno hitu in a'lon, sin oe mninu oke, talantia sin solalus sin ma mu'it le nasae baut ka napeni fa he ninun.

¹⁰“Amle'ut neu kit!” onane Kesel Nai Yoram in anbai, “UISNENO ansali nalali he nana'at hit tenu kit neu kesel Moab!”

¹¹Kesel Nai Yosafat natoti nak, “Ai anbi i katit fa Mafefa knino le nabe'i he natoti UISNENO antom kit ka?” Solalus anakaf mese na'ko solalus Kesel Nai Yoram natae nak, “Nai Elisa Nai Safat anmone esan! Afi ahunut in anfani ababat neu Nai Elia.”

¹²Kesel Nai Yosafat nak, “Namneo! UISNENO nakua a'an nanete natuin in.” Es nane te kesel tenu en nane sin anao neu Nai Elisa.

¹³“Nansa' hom toti tuntakus na'ko kau?” Nai Elisa nak onane neu Kesel Israel. “Amnao nai neu ho ama in Mafefa knino sin!” “Kahaf!” onane Nai Yoram natae. “Natuin UISNENO es ansali he nana'at hai tenu kai neu kesel Moab.”

¹⁴Nai Elisa natae nak, “Natuin UISNENO amonit, le au tuthae In, au uton ko nok mat-mat nak kalu ka natuin fa Kesel Nai Yosafat le au tola in, au ka lae Usif ko fa.

¹⁵Meki nem neu kau esle' i atoni a'bae biola mese.” Leka atoni nane fe na'bae in biola Smanan Knino UISNENO ansanu neu Nai Elisa,

¹⁶talantia in namolok nak, “UISNENO nakua a'an nak on i: ‘Anmo'e lolok namfau anbi nonof i.

¹⁷Maski hi ka mit fa ulan ansanu ma hi ka mit fa anin le anfu, mes oe of ansae ma nahenu nonof i. Hi mok hi mu'it ma mu'it le hi misaeba hi blua' sin of napeni oe le nathoe neu he hi minu nok alekot.”’

¹⁸Oke te Nai Elisa nak anteni nak, “Mes nane lasi an-ana kun neu UISNENO. In of anfe ki lasi mnisat neu atoni Moab.

¹⁹Ale sin kot le mabaki lape namas ma naleko nane of hi mile'un mani sin, ale hau mafua of him se' mani sin ma ale sin lene maafa of him poli meki fatu talantia namle'u ok-oke.”

²⁰Anbi neno noka fa, tabu natulu fua tulu nok-noka, oe ansai nem na'ko Edom talantia nahenu nonof nane.

²¹Leka atoni Moab sin nen nak kesel tenu en nane sin nem he nape' ma anken sin, onane te — na'ko mnasi talantia munif — le anloi nabe'i bale makenat, fun neki sin ma antao sin anbi bale nakat.

²²Ma noka fa, leka sin anfen nok-noka, manas antaha oe fafon talantia ankiso te in me' kun onle na'.

²³Sin ankoa nak, “Nane na'! Namneo-namneo nane solalus-solalus na'ko kesel tenu en sin solalus sin anmaken ma anmanua mafani en ma anmamaten es nok es! Aim al kit atnao he tasik ale sa'-sa' le anbi sin um-ume!”

²⁴Mes leka atoni-atoni Moab sin nem antia um-ume, atoni Israel anken ma anbe'u sin ma anli'u sin ma namate sin

²⁵ma natseleb sin kot-kot sin. Ale lene maafa le sin anao nokan, sin anpoli neki fatu. Amsoput nane ale lene ok-oke sin ankub nani neki fatu. Atoni-atoni Israel amsa sin ankub ale oe mata ma anse' nani ale hau alekot le fe nafua. Le nabalah al kot Kir-Hareset, kot ainaf pah Moab. Namuni te aniusnan kot nane ma anpoli nale'un kot nane neki finu fatu.

²⁶Leka kesel Moab in nahin nak in kan laban nabe'i fa anteni, onane te in neki solalus 700 le anmaote nahin neki suni, oke te sin nami lanan he sin antam he nale'un kesel Edom, mes sin kan tam nanan fa.

²⁷Es nane te in naiti in anmone nael le hen fani kesel anseka in, oke te natulu in anbi baki lape kot in tunan, on fuat neu uisneno teta Moab. Atoni Israel sin namtau, talantia sin napoitan nafani sin solalus na'ko kot nane oke te sin neki anfani neu sin pah.